Di dalam bruk pala padai di labaih 200 hecta taneh di HTX Nhân Lợi, Ban Can Tho, dahlau diah, tuk padai yuak blaoh, pong cuh klak di mblang hamu. Bruk ini oh daok. Yuak padai blaoh, pong brei hu pataom tabiak mblang hamu. Pong hu dom urang dalam hop tac xa pandar piah ngak bamao, ngak khak huu co.

 Ong Tiêu Ngọc Lợi, Yam ndok HTX xa brei thau, urak ini urang dalam HTX hu pandar pong siam lagaih piah ngak bamao, pa-auk khak huu co atau pablei pong ka dom urang raong glang. Jien mek tame di rahra hu tagok rilo: “Hu sa kapul trun ieu dahlak hulin ngak gilang labik khik piah pong dahlak hulin pablei, kuhria jaik 2.000 dong/kg pong. Urak ini jien mek tame mai meng bruk pataom pong ralo jang dut haong cuh pong klak. Meyah bruk di dahlak hulin bo ngak hu lagaih ye mek hu jien biak glaong, ka sa lac di ala hamu drei palao raong ikan, blaoh pong ba mai drei mek bamao tabiak drei pablei, blaoh mek pong nan drei pagam haong khak var ro di bhum drei ngak jeng khak huu co, gam patakik jien buh tabiak gam patagok yaom kaom ndap nda”.

Bhum Taneran Kraong Cuu Long hu labaih 24 trieu tan pong yaok thun hu mai meng bruk pala padai. Meyah kuhria rah tapa, tok di sa danak dak ngak tabiak jaik 14 trieu tan pong meyah yaok thun ngak 2 mbang. Min, tukvak tapa dom pong hadei yuak padai bhian njauk cuh klak atau lam tame gluh. Kayua nan, sa drap ar praong oh hu pandar ka njauk piah duh ka bruk patagok bruk ngak nong kato kajap.

Tui Jabat Roh duah padai brah dunya (IRIR), gah padai brah Viet Nam hu rilo kein lagaih dalam bruk patagok chuoi ngak khak drak meng pong, kaya mbang ka lamo. Min, tui TS Nguyễn Văn Hùng, urang ilamo glaong pakat di IRIR, jeng daok dom kan kandah dalam bruk pandar pong piah parilo jang jien mek tame: “Puac bilan Dong Xuan saong akaok bilan He Thu lac cuh labaih 60% di Can Tho, daok dalam bhum Taneran Kraong Cuu Long labaih 50%. Makna lac kayua 2 bilan ini biak katut, lac hu trun pajaih gilac nan urang ngak nong oh hu ginup jamraik piah pataom mek bo jeng oh pablei hu nan urang ngak nong tok cuh klak pong ka meng ngak taneh hamu hu. Yaom pablei pong hu di mblang hamu biak biar nan mikva cuh klak ka drah”.

Cuh pong gam palai gam ngak brei tachauk nerak alam langik. Kayua yau nan, bruk patrun bruk cuh pong klak di mblang hamu lac sa dalam dom asal kadha di Danak dak Patagok karo kajap 1 trieu ha pala padai asar siam, takik tathuak nerak. Meng di nan jeng pamaong tal bruk pasang iek saong patrun tathuak nerak thak sang camin kreih dalam bruk ngak padai brah, pamaong tal jalan ngak Viet Nam jeng negar “Net Zero” ka bruk tathuak nerak di thun 2050.

Thu truong Mentri Ngak nong saong Alam langik ong Trần Thanh Nam brei thau, brei pasang dom danak dak salih bahrau hadah krah piah parilo jien mek tame meng pong, piah patagok bruk pablei salih pong saong dui pachreih urang ngak nong ba rup tame: “Dom gah ngak mbang pablei salih jamraik hu ngak jeng mac pataom pong piah ngak khak drak, bamao saong dom janih karei. Min bruk kol drei daok ngak oh lac sa janih ngan haong taneh padai 1 trieu hecta ye sa thun blaoh daok hu 14 trieu tan padai dalam 1 trieu hecta ye 14 trieu tan pong ye ngak habar ka abih hu, bruk nan tuk halei jeng lac sa bruk piah khol drei kuhria duah hu gah caong blei pandar pong piah parilo yaom jien mek tame”.

Danak dak 1 trieu hecta padai asar siam, tathuak nerak biar, cakrok hijao di bhum Taneran Kraong Cuu Long khik kajap bruk hu makna di bruk ngak padai brah. Bruk salih jalan ngak mbang tui jalan paying bruk ngak mbang blei salih, pandar pong piah parilo jien mek tame sang, ba mai kein lagaih ka urang ngak nong, gah ngak mbang pablei salih; gam haong nan bruk takik tathuak nerak lac jalan ngak njauk. Meng nan, maong tal gah ngak nong siam mekre haong alam langik; ngak njauk dom bruk mbaoh tangin pagun sanya di Viet Nam dan saong dunya./.