Rahra saong dom nghệ nhân ngak lar am di dua tỉnh Ninh Thuận, Bình Thuận biak chraih chrai haong khau tin ini, maong iek bruk ini lac jalan piah dui tagok veik prein diukrai di inem krung ini. Ong Đàng Chí Quyết, Akaok Mban khik ramik khu phố Bàu Trúc, ban sit Phước Dân, huyện Ninh Phước, Ninh Thuận brei thau:“Tuk Unesco pok brei angan ilamo di bruk ngak lan meng kan di urang Cam lac inem krung ilamo phi vật thể…”.

Tui amuk Đàng Sinh Ái Chi, Phó akaok UBND ban sit Phước Dân, huyện Ninh Phước, Ninh Thuận, ini lac bruk bui sambai, hadah mbaok mata di bhap bini Cam, abih di nyu nan lac di mikva daok di palei ngak lan am ban sit Phước Dân. “Piah hu Unesco pok brei angan lac inem krung ilamo phi vật thể di dunya lac kein lagaih hu makna praong piah yaih khan pandap, piah manuac sia thau tal lan am di mikva Cam…”

Palei ngak lan am Bàu Trúc daok di ban sit Phước Dân, huyện Ninh Phước hu maong lac palei ngak lan am lavik zaman abih di Đông Nam Á. Tapa yaok rituh thun, bhap bini daok di palei Bàu Trúc jeng daok khik tamo jalan ngak lan am gheih makre oh pandar jamraik, oh pandar bàn payeng. Meng ngak abih meng tangin, palei ngak lan am Bàu Trúc hu pok mayaom yau sa pandap “pandiak tangin di anek manuac”, abih di nyu nan lac plak tangin bruk gheih ngak di urang kumei Cam oh maluk haong lan am di labik karei. amuk Đàng Thị Hằng – Daok di Palei Hamu Traok, ban sit Phước Dân, huyện Ninh Phước, Ninh Thuận lac: “Dahlak urak ini 74 thun paje, sang dahlak saong dalam palei hu pambuak haong bruk ngak ini…”.

Sang hu 3 rai ngak lan am, amuk Đàng Thị Trình brei thau lac: meng bruk bhap bini khik ramik jalan ngak lan am meng tangin ngan haong dom pandap ngak meng langik tasik saong pandar njuk piah am gaok hu ngak jeng ilamo ngak lan am gheih mekre, sa ilamo ndung mbak dom siam makre tapa ilamo di rilo rai hu pataom caik veik:“Palei ngak lan am Bàu Trúc ini ye sang dahlak hu 3 rai pambuak haong bruk ini…”

Dalam danak dak khik ramik saong patagok palei ngak lan am Chăm Bàu Trúc, tukvak 2025- 2030, huyện Ninh Phước daok buh jien tame piah ngak pasiam dom cơ sở hạ tầng, pato bruk ngak ka rai ranaih saong iek praong bruk cak rok patagok palei ngak pambuak pagam haong du lịch piah paglaong raidiuk ka bhap bini. Ong Bạch Văn Nguyên – Akaok UBND huyện Ninh Phước brei thau: “Palei hu padang danak dak cak rok patagok palei ngak tukvak 2025- 2030, tui nan, taphia di bruk buh jien tame ngak jalan mbak, điện, daok hu danak dak pato bruk ngak ka rai ranaih. Abih di nyu nan lac pambuak darak pasa dalam saong langiu taneh ia. Saong pambuak dom tour du lịch dalam saong langiu tỉnh piah dui pachreih hu tuai du lịch dalam taneh ia saong tuai negar langiu.”

Piah cak rok patagok du lịch,  langiu di dom pandap lan am piah pandar dalam sang, rilo nghệ nhân palei Cam hu ngak biak rilo lan am trang trí, lan am phù điêu saong dom rup patau lan am pabak hatai caong di urang blei. Gam haong tani tanat kinh tế, bruk yaih khan ilamo di bruk ngak lan am meng kan di urang Cam hu jhul khang tapa bruk pablei salih ini. Kayua yau nan ye, rahra daok di palei Hamu Traok tuk halei jeng hu hatai sahaneng khik ramik, sangka dom ilamo hu patoa veik meng dom zaman ini mai di bruk ngak lan am./.