Gam tui bruk ngak sang samar drah di kapul urang padang sang, baoh sang bahrau di sa-ai Ksor Si, thun ini umo 39 thun, di palei Mái, xa Ia Hrung, huyen Ia Grai, tinh Gia Lai dak hu mboh cambaih laih. Baoh sang praong jaik 50m2 gam saong dua bilik ndih, sa bilik tuai damuai. Sa-ai Ksor Si brei thau, baoh sang biak cang maong harei sang daok ini hu ngak salah blaoh, piah baoh sang hu labik daok tani tanat, praong laneing, anek bik hu labik bac megru.

"Sang klak ye megei, draoh taik tahak, tong bhuat abih paje. Urak ini hu sang bahrau khang kajap, anek bik hu labik bac megru. Dahlak hulin thau dhar phol Ndang, karja hu daong baoh sang hu labik daok tani tanat. Hadei ini hu kein lagaih, akau dahlak hulin mada padang ging haong bilik iar menei.”

Di huyen Ia Grai hu 542 baoh sang kathaot, baoh sang mbang tui sarak karja, urang hu klak rup daong ka katmang meng kal daok hu daong brei oh daok baoh sang taik tahak. Kuhria tal bilan 2/2025, dalam tinh Gia Lai hu peih bruk padang bahrau saong pasiam 1.423 baoh sang, dalam nan 132 baoh sang hu salah blaoh. Dom sang daok ini brei ka baoh sang mbang tui sarak, urang daong katmang meng kal, baoh sang kathaot saong jaik kathaot, daong pasiam kein lagaih diuk rai ka rilo rahra kan kandah. Piah khik kajap bruk samar drah, langiu di jien padai hu parabha, dom bhum palei patui veik jak ba prein ngak di bol bhap rahra, kapul bol lin, jak ba dom gah rik daong piah padang bahrau saong pasiam sang daok, abih di nyu hu lac dom baoh sang daok dalam dua danak dak pakat negar.

Dom urang kong an daok rik daong jien bilan di drei daong ka baoh sang kathaot padang baoh sang bahrau. Dalam nan, thieu ta Lê Đình Hải, Akaok Kong an xa Ia Mrơn, huyen Ia Pa, tinh Gia Lai hu rik jien 60 trieu dong. Ngak tui sa-ai, dom urang jakar, Kong an xa jeng ba gauk rik jien daong tame 60 trieu dong veik tra blaoh pambak tame dom tukvak lahei piah daong mikva padang sang. Thieu ta Lê Đình hải brei thau:

 “Tui pasang iek, amuk daok haong 1 urang taco, saong 2 tacaik, dahlak hulin mboh kein lagaih di amuk kan kandah, dahlak hu biai haong Ndang uy, UB Bhap bini xa piah daong phun jien padang sang. Min pasang di muk matai blaoh yau nan ye tui dalam sarak oh hu caik brei daong, yau nan ye kan si hu mbang tui sarak. Kayua yau nan, dahlak hulin hu ndom biai saong diuk anek dalam sang padang ka amuk baoh sang bahrau praong laneing lanoi, kajap jang piah sahnang karo di dalam raidiuk”.

Tui kuhria, tinh Gia Lai kuhria brei paabih 8.485 baoh sang taik tahak dalam thun 2025 dalam danak dak “Ba gauk brei paabih baoh sang taik tahak”. Meng bruk ngak tui di sa majam he thong chinh tri, dalam hu dua bilan jaik ini, rilo baoh sang “5 di abih” lac samar drah di abih, ghieh ghang di abih, kajap di abih, karo di abih saong lap di abih – hu ngak salah blaoh, ba mai kein hatai bui sambai ka yaok rituh baoh sang rahra. Ong Rah Lan Chung, Phaok Bi thu Tinh uy, Akaok UB Bhap bini tinh Gia Lai pandar lac:

"Dom bruk brei paabih dom baoh sang taik tahak brei peih ngak khik kajap bruk brei thau brei mboh cambaih laih, samu gauk, khang kajap saong siam lagaih; pataom tame jak ba grauk gah rik daong jien meng dom jabat, labik, gah ngak mbang pablei salih, kapul, urang menuac, bol bhap rahra dalam saong langiu tinh. Gam saong nan jak ba rahra rik daong piah paglaong sang daok ka baoh sang rahra. Langiu di nan, brei bhian pajak, pasang iek, taong yaom, mek hu ilamu, meyaom, alin jien meyaom saong pok meyaom dom kapul, urang ngak bruk naih gheih dalam bruk paih ngak danak dak.”

Gam saong bruk pan tangin gauk ngak di sa majam he thong chinh tri saong kapul lin pan phao karaong, danak dak brei oh daok baoh sang taik tahak di tinh Gia Lai daok hu jhul samar bruk ngak. Dom baoh sang khang kajap oh lac tani tanat raidiuk bo ngak jeng sa labik pambak khang kajap piah ka dom urang baoh sang kathaot uak drei patagok bruk ngak mbang, daong padang bhum palei dak harei dak kaya meda siam makre./.