Dua gah tangin samar drah cakak saong kak paok hareik di bein sang, ong Rơ Chăm Chon, ndik tapui thun 1977, daok di palei Mrong Ngó 3, xã Ia Ka, huyện Chư Păh, brei thau: drei limo binai bo huyen hu daong ka sang ong di thun 2021, jaik manek drei ka 2 nan ye njauk glang iek tani tanat.  Ngan haong ong Chon, limo urak ini lac drap ar, kayua sang ong hu jien mek tame jaik 10 triệu yaok bilan meng hu 2 urang bahrau hu pilih ruah tame ngak công nhân cao su. Ong Chon khang hatai jia lac hu ginup jien piah kuhria ka sang:“Kanja hu daong ka kol dahlak limo pajaih, ngak sang saong daong ka diuk dahlak nao ngak cong nhan cao su haong jien bilan meng 3 tal 4 trieu dong sa bilan, ginup mbang cai, blei brah mbang yaok harei saong glang iek phun cà phê. Hu hasit jien patak pataom blei pajaih cà phê, blei mac piah pruh ia”.

Meng thun 2016, tuk Danak dak bruk ngak negar patrun kathaot khang kajap hu peih tabiak ngak, yaok thun, dom baoh sang kan kathaot di xã Ia Ka, huyện Chư Păh hu daong yaok rituh trieu dong yaok thun piah peih ngak dom bruk patrun kathaot. Piah phun jien pandar hu kein laba, UBND xã hu pambuak haong mban khik iek palei, yaok pataom dom baoh sang kan kathaot, duah thau cambaih makna ba tal kan kathaot di yaok baoh sang piah peih ngak danak dak ka nyu lagaih. Tui jalan daong ka mikva bruk ngak mbang duah jien, salih jalan saneng, jalan ngak, piah pachreih dom baoh sang tabiak truh kan kathaot khang kajap. Ong Rơ Châm Nglai- akaok paleiMrong Ngó 3, xã Ia Ka, huyện Chư Păh khan lac:“Hu 5 baoh sang hu daong limo pajaih, tal urak ini limo manek hu 2 mbang paje, gam haong limo amaik lac hu 3 drei.hadei di nan, limo amaik hu ba brei ka dom baoh sang kathaot karei raong, kayua sang raong dahlau duah hu jien bloh, nan ye ba brei ka sang kan kathaot karei daok kan kandah jang”.

Urak ini, urang bangsa takik di Gia Lai tok hu jaik mateh dom menuac sia dalam tinh, min dom baoh sang kan kathaot hu tal 88%. Kayua yau nan ye, peih ngak danak dak bruk ngak negar ka patrun kathaot khang kajap, meng thun 2016 tal 2022, tỉnh hu peih jien labaih 1.400 tỷ đồng piah peih ngak dom bruk daong buh jien tame, cak rok patagok hạ tầng di dom huyện kathaot saong dom puk palei. Phun jien ini hu ngak dom danak dak sit, yau ye daong cak rok patagok bruk ngak mbang, pala drak, pasiam bruk dinh dưỡng, patagok bruk pato bruk ngak, ba bruk ngak khang kajap, daong sang daok ka dom sang kathaot saong sang jaik kathaot...

Tapa bruk ngak, tukvak 2016 - 2021, dalam tỉnh Gia Lai trun 15,75% dom sang kathaot, kuhria rah tapa trun labaih 3,15% sa thun. Meng puac thun 2018 tal urak ini, tinh oh daok sang kan kathaot lac urang hu buh prein ka cách mạng; dom baoh sang kan kathaot di dom huyện kathaot, xa biak kan kandah jeng trun tui yaok thun. Ong Phạm Trần Anh, Phó yam ndok Sở Lao động, Thương binh saong Xã hội tỉnh Gia Lai brei thau:“Gah lao động, thương binh meda daong panuac ka karja, pakat uy cơ sở padang dom jalan ngak cambaih laih, daong ka dom baoh sang kan kathaot tabiak truh kan kathaot. Gam haong nan, pandar hu siam lagaih dom phun jien meng trung ương; pambuak haong gah mặt trận, kapul nyaom, chính trị, xã hội dom pakat piah jak ba dom phun jien meng doanh nghiệp, rahra, piah buh tame ka urang kan kathaot cak rok bruk ngak mbang, pala drak”.

Meng bruk kham marat di dom pakat uỷ saong karja dom puk palei, gam haong bruk jumpataom gauk, sa hatung hatai saong kham marat di rahra, bruk kan kathaot di Gia Lai daok samar hu jhul kadaun likuk. Thun 2022 gaok rilo kan kandah, min bruk patagok kinh te di tỉnh jeng mek hu jaik 9,3%, glaong jang bruk ba tabiak. Bruk nan brei mboh, rahra dom bangsa di tỉnh Gia Lai daok kham marat yam tapa kan kandah hu siam lagaih, kinh te dak harei dak cak rok patagok, raidiuk dak harei dak hu glaong jang./.