Nao angaok jalan bê tông atah jaik 1km, praong 4m, pambuak meng palei Myah tapa labik pala drak, ong Ksor Jinh (xã Ia Krai, huyện Ia Grai) brei thau, sa thun dahlau, ini lac jalan haluk, praong 2 mét, thur mur di bilan pandiak, gluh baok di bilan hajan, ngak ka rilo menuac labuh radaih tuk pajeng kaya nong di bilan hajan. Tuk hu xã brei thau bruk karja daong rahra palei ngak jalan bê tông, ong Ksor Jinh ba akaok nao dahlau, alin hadiah 100m2, rilo rahra dalam palei mboh yau nan, halan hatian brei yaok ratuh m2 taneh piah peih praong saong ngak pasiam jalan:  “Dahlau daih jalan ini nao mai kan kandah, anek bhik nao bac glaih lo, urang praong nao darak blei brah mai biak kan nao kayua jalan gluh baok. Meng hadei di mbang taom gaok cử tri, xã jak ba mikva alin hadiah taneh, kaoh klaak meneing phun cà phê, phun pa-ok blait piah peih praong jalan, kol dahlak bui sambai ngak tui. Tal urak ini jalan hu peih praong, mboh anek bhik nao bac jeng biak sahanang hatai saong mbuan lagaih ka mikva urang nong pajeng ba kaya nong, nan ye abih gauk jeng buai sambai lo”.

Daok di palei Nú, xã Ia Khai, huyện Ia Grai, jeng meng bruk brei taneh ngak jalan bo akaok thun 2023, jalan bê tông atah 800 mét, praong 4 mét hu ngak salah dahlau di bilan paik baoh pa-ok blait. Ong Rơ Châm H'Monh, urang hu angan je di palei Nú ba akaok nao dahlau, klaoh klaak 19 phun kayau di sang drei, blaoh jak ba adei sa-ai, anek kamuan dalam but pajaih ngak tui. Meng nan, gam haong bruk kham merat jak ba di urang jakar palei, 20 baoh sang halan hatian kaoh klaak 300 phun pa-ok blait di dua gah piah ka jalan hu praong, siam. Ong H'Monh brei thau: “Meng harei padang ngak palei pala bahrau, dalam palei hu rilo salih bahrau, hu karja sangka, daong padang ngak, peih praong jalan mbak. Urak ini, rilo jalan dalam puk, dalam palei hu ngak bê tông. Karja ieu brei taneh, kaoh klaak phun kayau ye mikva halan hatian ngak tui, kayua mikva thau lac karja jeng caong khin palagaih ka bhap bini hu jalan mbak nao mai mbuan lagaih, siam mekre. Dahlak biak uan tabuan saong thau dhar phor bruk sangka di karja”.

Piah peih ngak dom danak dak bruk ngak negar padang ngak palei pala bahrau saong cakrok KTXH bhum bangsa takik, rilo thun ini mai, pakat ủy, karja huyện Ia Grai, tỉnh Gia Lai hu panuac ieu bruk ba tangin tame di abih hệ thống chính trị, di bol bhap rahra saong di doanh nghiệp. Dalam nan, bruk praong di huyện lac brei ngak dahlau ka bhum bangsa takik, bhum kan kandah; brei padang dahlau jalan mbak piah peih jalan ka patagok KTXH. Tapa nan, bruk brei taneh ngak jalan, piah peih ngak dom danak dak, hu rahra njauk hatai, pachreih tui. Urang jakar, urang đảng, urang hu angan je, taha palei, tuk halei jeng lac dom menuac ba akaok nao dahlau dalam bruk jak ba, meng nan, ngak jeng bruk njauk hatai, jia tame saong ngak tui di bol bhap rahra. Amuk Nguyễn Mai Lương- Chủ tịch UBND xã Ia Khai, huyện Ia Khai brei thau:  “Xã tuk ginum biai hu da-a taha palei, bí thư chi bộ saong abih di nyu lac urang hu angan je dalam xã. Tuk jak ba, kham merat langyah, harei ini mikva oh ka pachreih tui ye harei paguh kol dahlak trun jak ba tra, harei ini brei urang jakar ini trun pachreih ba ye harei paguh brei urang jakar karei trun. Meyah sang nan hu urang dalam kapul urang ngak nong ye kol dahlak da-a Kapul urang ngak nong, hu urang dalam Kapul urang kumei ye kol dahlak brei akaok dhar kapul urang kumei trun langyah brei mikva thau”

Jalan mbak dak harei dak praong, siam hu daong ka bruk pablei salih nao mai di dom puk, palei bhum atah bayah, bhum bangsa takik mbuan lagaih jang, lac jalan peih tabiak ka đảng bộ, karja saong bhap bini bhum tapen negar kan kathaot Ia Grai kham merat dak padang raidiuk dak harei dak trei sir, siam mekre../.