Palei Bỉh, xã tapen nagar Ia Púch, huyện Chư Prông, tỉnh Gia Lai mada hu angan ieu lac sa palei hu ralo urang ruak phong, baoh sang urang kan kathaot ralo. Pakat Đảng xã Ia Puch brei parabha yaok urang đảng daong ba 5 baoh sang piah nyim marai jien phun daong pajaik phun pala anek raong; bhian ndam gam haong bhum palei, piah daong pato cakak phun điều paaok taha, tukik brei baoh brei tapa pala phun điều pagam. Mbiah tal ini, dalam palei hu jaik 120 ha phun điều, dom bluh ha cao su, phun mbang baoh haong padai, haong phun bei. Gam tui di nan mboh hu raong manuk ada anek thur raong piah mbang huak dalam sang. Ekonomi mboh hadah, dalam palei mboh hu ralo baoh sang tanat tani haci hacih. Mikva rik jien brei dui talei gom ba pahadah dalam palei. Ong Rơ Mah Jêch, Akaok chi bộ, gam haong Po palei Bỉh brei thau lac:“Chi bộ hadei di nyom parabha urang đảng daong ba dom baoh sang. Yaok urang đảng pan bruk daong ba 5 baoh sang, daong brei nyu patagok kinh tế - xã hội dan haong mek bruk padang palei pala bahrau patagok kinh tế, karo an ninh rah ra xã hội, jak ba bhap bani tame bruk ngak mbang”.

Gam haong bruk daong rahra bhap bini patagok ekonomi kinh tế, xã hội, dom urang đảng xã Ia Puch tuk halei jeng nao dalau dalam bruk jak ba yah klak oh siam dalam tanrakun adat cambac oh lagaih brei ka patagok ekonomi. Yau ye Sarak 05 di Pakat Đảng huyện Chư Prông brei ka bruk pajhul khang ilamu bahrau dalam bruk ngak nông, caih hatai tal ngak nong tui ilamu pakat glaong. Tal ini, taong abih phun pala dalam xã labaih 1.900ha, mak hu 102% dut tui sarak patabiak di pakat ndang dalam sa masa ngak bruk. Ông Siu Bin, Akaok pakat Ndang gam haong Po palei Chư Kó, xã Ia Puch brei thau lac:“Urak ini xã mboh patagok drah, mai meng hu dom urang ngak mbang mai palei. Pagap ye pala phun kayau phun mbang baoh, ye phun paaok điều jeng yuau nan, dalau diah mboh sa pala, oh thau buh khak buh jru yau habar. Urak ini thau pala yau habar, ieik glang yau habar, khak hagait phun halei”.

Kayua ngak njauk tui sarak brei ka patagok ekonomi – rahra di pakat huyện uỷ, pakat đảng xã jeng ye di karja, kapul nyom haong bhap bini dalam xã yakyum jum pataom, padang khang kadang jalam gom điện, jalan thoan, sang bac, balai yte, sang palei, daong patagok rai diuk miukva rahra; daong patagok ekonomi rahra dan haong pacaga karo kajap tanah ia bhum palei. Muk Lê Thị Phú, Akaok pakat Đảng uỷ xã Ia Puch, huyện Chư Prông, tỉnh Gia Lai brei thau bruk ngak di drei:“Khol hulin dahlak pataom prein ba tabiak danak dak ngak ye meng akaok tal naep jeng ye taong abih gauk dalam politik pakhang bruk jak ba mikva bhap bini ngak tui jalan di pakat Đảng ủy batabiak. Dom dom pakat chi bộ tui di nan taong yaom, patacei di pakat Đảng ủy piah batabiak sarak patacei yaok bilan brei ka taong abih kapul nyaom dalam politik tame bruk ngak”.

Masa tukwak ini, baoh sang urang kathaot di xã Ia Puch, huyện Chư Prông daok jaik 16%, mboh yaok thun trun meng 1 tal 1,5%; jien mek tame yaok akaok manuac tagok 18% dut tui thun 2020; rai diuk di mikwa bangsa urang takik dalam xã bhum tapen nagar dak harei dak tagok, hatai jie di bhap bini mikwa tame urang pan akaok Đảng dak harei dak khang kajap./.