Gilang tapuk hu padang ngak piah ka uranaih mai puac tapuk 

Piah ngak jeng bruk bhian randap puac tapuk ka anek meng di tuk dok sit, yaom lac jar var haong bruk ngak di jabat song bruk sang, min yaok harei saai Trần Thị Thu Đông daok di ban  Khánh Hải, huyện Ninh Hải, tỉnh Ninh Thuận jeng caik hasit tuk vak, piah nao puac tapuk haong anek. Tui saai Đông, bruk duah thau anek takre janih tapuk halei piah nao duah blei jeng hu makna biak prong, kayua nyu dong ka anek  hu pachreih hatai jang dalam bruk puac tapuk:

“Ngan song hatai sahneng di sang dahlak, mboh lac bruk pasram ka anek sa bhian randap puac tapuk biak lac kein lagaih, song ba mai yaom glong biak prong bo kol drei oh mboh hu cambaih laih. Pagap yau:  bruk puac tapuk dong ka anek thau rilo baoh panuac, jalan ndom puac nao mai hu siam jang, pasram ka anek jalan duik rai, jalan ngak menuac, song pabak ka anek hu rilo ilamu siam lagaih jang.”

Piah ka anek bhik hu bhian randap puac tapuk, rilo sang hu ba anek nao tal Gilang tupuk  tỉnh, piah ka dom anek eng drei duah dom boh tapuk bo nyu takre. Padang saong khik bruk bhian randap puac tapuk, lac padang jalan diukrai siam mekre ka uranaih, bo daok lac jalan ngak ka uranaih hu mbaok tame rilo bruk karei kayua gilang tapuk peih tabiak. Saai  Nguyễn Thị Cẩm Tú daok di Xã An Hải, huyện Ninh Phước, ndom lac

“Adei uan tabuan kayua anek biak takre puac tapuk, dalam tuk padeih hè, dom anek naih takre nao ma-in  điện tử , min, anek di adei tuk thau tal gilang tapuk, ye nyu biak takre puac tapuk . Hè ni, Gilang tapuk  tỉnh peih rilo kadha ma- in, dom anek hu tuk vak padeih  hè rilo jang, anek takre puac tapuk  jang. Kayua yau nan ye, adei bhian ba anek tal ni puac tapuk .”

Hu amaik ame pachreih ba hatai takre tapuk meng sit, adei Lương Huỳnh Xuân Lộc anek saih  sang bac  Trung học Cơ sở Hoàng Hoa Thám, huyện Ninh Sơn, mek hu rilo giải thưởng glong dalam dom mbang pakacah uranaih Ninh Thuận dak dalikan tui tapuk . Adei  Xuân Lộc bhian caik tuk vak, hadei di tuk bac  bài bloh, atau dom harei padeih puac adit, nao puac rilo tapuk, mbáo.

“Anek mboh lac bruk puac tapuk di drei bo thau pandar ngak tui  ye nyu ba mai ka anek biak rilo kein lagaih. Yau peih hu meta mong di drei hu prong jang, patagok bruk logic, dong ka drei tuk tabiak gah langiu meda langyah dom bruk di anak meta, tagok hatai sahneng ilamu pasang iek bruk di anak meta. Langiu di nan, anek mboh drei  prong jang rilo song ngan song bruk puac tapuk, oh meda kurang hu dalam rai duik di drei, abih di nyu nan lac bruk patagok rup drei.”

Ngan song angan “Boh sang puac tapuk pambuak talei anit ranam ”, bruk pakacah “Boh sang puac tapuk thun  2022” , thun ni kayua gilang tapuk tỉnh Ninh Thuận peih tabiak  hu 10 boh sang hu mbaok tame pakacah  2 asal kadha. Bruk pakacah piah pamedeih tagok hatai ranam, hatai takre tapuk, jhul patagok bruk puac tapuk dalam yaok boh sang. Ong Phạm Văn Hương, Yam ndok gilang tapuk  tỉnh Ninh Thuận brei thau :

“Bruk pakacah boh sang puac tapuk di thun ni, kol dahlak peih ngak tuk padeih hè. Ni lac sa dalam dom bruk ngak di gilang tapuk  hu peih ngak  yaok thun tuk padeih hè hadei di sa thun dom adei bac daa. Bruk nao tal gilang tapuk, piah puac tapuk, nan lac, tuk piah ka kol drei, ngak jeng bhian randap puac tapuk. Tapa nan, ngak jeng sa labik piah kol drei ma- in sambai di sa bruk ngak  công cộng, bo dalam gilang tapuk  tỉnh peih ngak.”

Bruk bhian randap duah tal gilang tapuk puac tapuk, dok hu dong ka dom adei hu tuk klah rabha, ndom biai nao mai ka dom boh tapuk gheih, pataom hu rilo jang ilamu diukrai… piah pambak tabiak dom kadha siam ghieh song makna meng boh sang, sang bac tal langiu xã hội./.

Urang lang: Hanipha- 23/7