Adat chào cờ hu rah tabiak dalam praong prang

Mesup akaok adit di thun bahrau sak ramaong, yau dom đơn vị karei, urang jakar, urang lin Bilai Rada 595 angaok pulao Hòn Khoai, gam haong bhap bini nao ravang, tadhau ayuh Tết, peih bruk chào cờ. Adat chào cờ oh hu nhạc, panuac daoh quốc ca hu urang jakar, urang lin Bilai Rada 595 haong bhap bini daoh tagok, yava dane ala hala dok taneh ia par dalam pandiak akaok thun, dalam sap riya, sap ngin di tasik praong “Kol dahlak dom urang dalam bol bala bhap bini Việt Nam, mek danh dự di urang lin cách mạng, likau thề ala hala dok hadah hadai di taneh ia. K1: Var klaak rup drei brei ka taneh ia Việt Nam; ala bruk pan akaok ba jalan di Đảng Cộng sản Việt Nam, kham merat brei ka sa taneh ia Việt Nam sron mbon, độc lập saong xã hội chủ nghĩa, rik daong tame bruk mesruh di menuac sia dunya brei ka sron mbon, độc lập bangsa, dân chủ saong chủ nghĩa xã hội. “Likau Thề”. K2: Abih drei tui tacei pato di pakat angaok; tuk taduan ngak bruk hagait jeng abih hatai jai, ba abih prein tabiak ngak ka nyu samar drah saong njauk bruk. “Likau thề””.

Hadei di tuk daoh quốc ca, 10 panuac thề danh dự di urang lin Bol bala bhap bini Việt Nam hu urang lin puac khang sap, cambaih laih. Hadei di yaok panuac thề, dom urang jakar, urang lin ba gauk preo tagok "Likau thề" biak khang kadang. Trung uý Lê Văn Thao, ngak gah Thông tin Trạm Ra đa 595 – urang hu puac 10 panuac thề danh dự quân nhân uan tabuan lac: “Ngan haong dahlak saong taong abih urang lin Bol bala bhap bini Việt Nam hu puac 10 panuac thề  lac bruk biak hadah mbaok meta, biak uan tabuan. Nan oh njauk lac ta-eng dahlak, bo tapa nan brei mboh mbaok meta di urang lin dalam Bol bala bhap bini Việt Nam, brei mboh phẩm chất cách mạng, jeng yau rik daong oh sit tame bruk khik caga quyền ngak po tasik pulao di taneh ia.”

Adat chào cờ hu rah tabiak dalam praong prang. Di tuk ginreih ini, nyu ngak ka yaok urang hu mbaok labik nan mboh dom drut drui karei di gauk. Hu rilo mbang hu mbaok chào cờ meng di tuk daok bac mbiah tal urak ini, min mbang camereip hu mbaok chào cờ angaok pulao, sa-ai Trần Thị Thu Giang, sang daoh Tây Đô, ban Cần Thơ mboh biak hadah mbaok meta saong biak drut drui tuk hu pok sap daoh Quốc ca haong dom urang lin angaok pulao: “Mboh biak hadah mbaok meta saong biak drut drui kayua ini lac mbang camereip abih hu tabiak tasik pulao bo daok hu chào cờ, drei sahneng lac, taong abih rahra angaok baoh taneh pamaong mai tasik pulao anit ranam di taneh ia saong dom urang lin pamaong mai baoh taneh anit ranam jeng hu sa makna yau gauk. Biak drut drui tuk dang chào cờ di pulao atah haong dom urang jakar, urang lin.”

Jeng mboh drut drui saong mboh hadah mbaok meta yau nan, ong Nguyễn Văn Lộc, Akaok mban Tuyên giáo, UBMT negar tỉnh Bình Dương khan lac: Hu mbaok dalam rilo mbang chào cờ min tuk hu mbaok chào cờ akaok thun bahrau angaok pulao, mboh biak drut drui. Dalam riyak, dalam ngin, sap Quốc ca dane tagok ngak ka yaok urang hu mbaok tuk nan jeng mboh biak drut drui. Abih di nyu lac 10 panuac thề di urang lin hu puac biak khang kadang ala hala dok taneh ia ngak ka thei jeng mboh hadah mbaok meta. Bruk chào cờ biak ginreih.

Tui Đại úy Đào Thanh Ni, ngak bruk di trạm Ra-đa 595: Chào cờ lac bruk ngak gam gam di đơn vị, langiu di bruk chào cờ dalam adit, bruk chào cờ angaok pulao ini daok hu peih tabiak dalam dom harei lễ, Tết, hu daong ngak ka dom urang jakar, urang lin angaok pulao mboh hadah mbaok meta jang tuk hu brei nao ngak bruk di labik akaok riyak, jhung ngin: “Tapa bruk chào cờ, đơn vị jeng taong yaom veik bruk ngak dalam adit, saong ba tabiak jalan ngak, bruk ngak di anak tal. Tapa adat chào cờ akaok adit atau dom harei lễ, Tết…, kol dahlak hu tacei pato urang jakar, urang lin paglaong jang hatai sangka, pakhang bản lĩnh chính trị, halan hatian caga mesruh, var klaak rup drei brei ka bruk khik caga quyền ngak po tasik, pulao di taneh ia labik akaok riyak, jhung ngin.”

Oh njauk lac tok hu rahra, tuai tabiak ravang pulao, sap daoh quốc ca khang kadang yava tagok gam haong thaot binguk hala dok bhong meriah, patuk kanjik katam par di labik glaong abih angaok pulao Hòn Khoai tuk halei jeng ba mai bruk ginreih ka yaok urang jakar, urang lin daok ngak bruk angaok labik glaong abih di pulao glaong 318m duk saong mbaok ia tasik. Meng nan, urang jakar, urang lin kham merat yam tapa yaok kan kandah, glaih glar, kajap tangin phao piah khik kajap quyền ngak po tasik pulao di taneh ia. 

  Pathau mikva saong taong abih gauk! Pulao Hòn Khoai, tỉnh Cà Mau lac labik pulao camereip abih tuk meng tasik biển Đông nao tame bhum tasik Tây Nam bộ. Daok di labik ceik glaong, pulao atah, gaok biak rilo kan kandah, min yaok urang jakar, urang lin Trạm Rada 595 Hòn Khoai tuk halei jeng mboh hadah mbaok meta tuk hu pagap yau dom "meta Yang" khik tasik. Yaok urang jakar, urang lin tuk halei jeng kham merat abih drei dalam bruk pasang iek, duah mboh, tuk halei jeng khang hatai caga piah pacang, piah khik kajap quyền ngak po tasik, pulao Tây Nam di taneh ia./.

Urang lang: Mousa Phuong – 13/02