Karja dok ieu pandar mik va tagok thu ngak mbang duah bruk ngak 

Labaih 20 thun tapa, sang ong Nguyễn Văn Hợi, umo 76 thun, mong boh bè lac boh sang, piah ka anek taco hu labik daok. Bahrau ni, sang ong patak pataom hu hasit jien padang baoh sang tạm, sit sot di mangaok taneh meteh ia meteh thu di danao Dầu Tiếng, min jeng dok khik bruk rong ikan bè. Bruk rong ikan bè jeng lac jalan duah jien tame ka sang ong. Min, urak ni, anak bruk mbuan si nerak halau ia di danao Dầu Tiếng, UBND xã Minh Hòa gam gam jak ba, ieu sang ong padeih bruk rong ikan bè song tagok daok di mangaok thu.

Ong Hợi duh hatai lac, dom pluh thun ni mai, sang ong pambuak pagam song bruk ni, urak ni, oh hu rong gac, nan ye, oh thau ngak mbang hagait, tuk oh hu taneh, oh hu ilamu, oh thau bruk ngak hagait:

“Urak ni, dahlak oh thau kuhria habar, tagok thu jeng oh hu taneh piah pala drak. Cong khin urak ni lac, karja brei rong sa atau 2 thun tra, piah bayar sre, bloh tagok  thu duah bruk ngak mbang”)

Pabak tame bruk ngak mbang duah jien di mangaok danao Dầu Tiếng dok hu muk Võ Thị Tha, umo 54 thun. Muk Tha hadar veik, meng sit, muk tui amaik ame nao daok di Campuchia. Thun 2003, hadei di tuk duik pasang luai gauk, muk ba 2 urang anek mai veik Việt Nam dok di  danao Dầu Tiếng dalam tỉnh Tây Ninh. Thun 2016, muk ba “sang di động” di drei  tapa  tỉnh Bình Dương piah rong ikan bè. Urak ni, 2 anek prong nao ngak, nan ye tok hu taeng muk dok di mangaok bè:

“Likau karja brei ka rahra hu harak gar piah tagok thu. Urak ni, oh hu harak gar, nao halei hu thei xác nhận lac urang quốc tịch Việt Nam, dalam tuk dok di pak ni lavik je, bo karja oh ngak brei hu sa blah harak gar hagait”

Tui duah thau di urang vak, jiak abih rahra daok di mangaok danao Dầu Tiếng lac urang di bhum taneran krong  Cửu Long. Saman  mesruh  metak, urang nduac tapa Campuchia, duik rai meng bruk tarah ikan di mangaok krong  Tonle Sap (Biển Hồ). Hadei di nan, urang ba gauk mai veik palei cong khin hu rai duik tani tanat siam mekre. Min, kayua oh hu taneh, oh hu harak gar hagait, song oh hu ilamu piah duah bruk ngak tani tanat, nan ye urang diukrai meng bruk tong chap kaya ikan, rong ikan bè di danao Dầu Tiếng.

5 thun tapa, huyện Dầu Tiếng gam gam brei dom kapul nyaom nao jak ba rahra palei bè tagok thu. Hadei di tuk hu jak ba, rilo sang tagok daok di labik meteh thu meteh dauk di danao, eng drei padang sang. Min taneh hu takik, tui nan, karja pak ni oh meda langyah hu labik dok ka tong abih dom boh sang, nan ye hu labaih 30 boh sang jeng daok dok di mala bè.

  Ong Nguyễn Thanh Tùng, Phaok akaok UBND huyện Dầu Tiếng brei thau, bruk ba mik va tagok thu biak kan ngak hu chip, kayua daok kuhria ka rai duik di mikva. Urak ni, karja pak ni dok yaok pataom, pasang iek angan dom boh sang dok di mangaok danao. Ngan song dom boh sang oh hu harak gar, karja dok  yaok pataom likau pakat angaok ngak harak gar, piah meda tabiak truh palei  bè, duah bruk ngak song labik dok tani tanat. Bruk langyah dom bruk  an sinh xã hội yau sang dok, bruk ngak brei cang tacei pato di UBND tỉnh Bình Dương. Ong Tùng ndom lac,  yaom lac kan, min karja pak ni khang hatai ngak piah khik caga alam môi trường:

“Anak tal brei pambuak bruk song mBan khik ramik danao, likau panuac di pakat angaok langyah ka nyu salah piah bayar veik halau ia hajao ka danao .Dok duah jalan langyah ka nyu njauk ka nyu lagaih, ginum song gah tư pháp piah batabiak abih, hu hadom menuac urang oh hu harak gar, oh hu bac daa, piah kuhria ka rahra bhap bini”.

Hadei di rilo thun duik rai biak gleih glar di mangaok danao Dầu Tiếng, bpl bhap rahra cong khin karja samar hu sarak dong panduan ba tagok thu, piah ka urang hu rai duik  tani tanat jang, siam mekre jang. Abih di nyu nan lac, bruk urang tong ikan cong khin di abih lac hu harak gar  ka anek taco hu nao bac daa, thau akhar haroh, piah hu harei hadei hadah hadai jang  rai ong muk, amaik ame di nyu./.

Urang lang: Hanipha- 20/6