Piah ngak hu bruk ini brei hu bruk peih ngak samu gauk, peih ngak catang di dom pakat, dom gah hu pambuak pagam tal, gam haong nan, bhap bani jeng brei duah thau dom bruk siam lagaih ka rai diuk jeng yau dalam bruk ngak mbang pala drak.

Di sa mbang họp palei tui tukvak ba tabiak di palei Khung Nhung, xã Quản Bạ, akaok palei palih ruah tukvak pataom gauk ginum biai di mon 9 meteh melam saong panuac pandar dalam mbang nyaom lac panuac di palei. Nan lac jalan ngak siam di abih piah ka karja palei pataom hu ginup abih bhap bani dalam palei piah khan brei thau, gam haong nan, ini jeng lac jalan ngak piah tui pang dom panuac brei thau gilac meng bhap bani tagok dom pakat karja. Sa-ai Hầu Mí Tủa, sa urang daok di palei Khung Nhung khan lac: “Dahlak nao họp palei hu pang Sarak, hu ginum biai jalan patruh eik patrun kathaot saong ngak kaya meda ngan haong karja, chi bộ palei, thau hu bruk siam njauk ngak, nan ye baoh sang dahlak saong mikva dalam palei urak ini thei jeng ginup mbang saong daok caong khin ngak kaya meda jang”.

Yaom lac sap ndom saong ilamo daok biar, min meng hatai caong khin ngak kaya meda, hadei di rilo mbang hu mbaok họp palei saong hu pang akaok palei ndom ka jalan ngak mbang kaya meda, rilo dam dara dalam  palei Trúc Sơn, xã Quản Bạ khang hatai nao tal UBND xã piah hu tacei pato jalan ngak mbang pala drak angaok Internet, piah patruh eik patrun kathaot.  

Tui sa-ai Lệnh Thế Tú, urang jakar iek gah padang ngak palei pala bahrau xã Quản Bạ, huyện Quản Bạ, tỉnh Hà Giang, meng tuk sa-ai mai ngak bruk di xã, sa-ai bhian taduan hu panuac meng bhap bani ieu brei ka urang mong iek tapa dom bruk raong glang hu kein laba di mangaok máy tính. Sa-ai Tú mboh lac mikva bangsa dalam xã yaom lac takik ndom biai hu sap Yuan min dalam hatai di mikva tuk halei jeng caong khin yam tagok tabiak truh eik lipa, tabiak truh kan kathaot. Kayua yau nan ye, tuk hu thei caong khin sa-ai peih mac tính brei iek, sa-ai jeng abih drei tacei pato ka mikva jalan pandar, jalan tame Internet: "Gilang tapuk ini hu padang tagok meng puac thun 2014, xã dahlak rilo meng lac bhap bani bangsa takik, mikva oh thau máy tính ye mikva mai ini khaol dahlak bhian tacei pato ilamu pandar mac saong tame Internet piah ka mikva nao sang ngak tui dom bruk raong glang, pala drak. Hu dom mikva hadei di tuk mong iek pak ini blaoh nao ngak  tui”.

Hà Giang lac sa dalam dom tỉnh kathaot abih dalam negar,  hu tal 22 bangsa takik gam haong jaik 800.000 urang. Lac labik nao mai kan kandah, daok tapen takai ceik glaong, nan ye bruk ba thong tin mai tal bhap bani tuk halei jeng lac bruk ngak brei suh sah dom urang jarka puk palei. 

Gam haong dom jalan ngak di pakat xã ye di pakat huyện, ngan haong pandap pathau khan siam jang, karja huyện jeng daok hu dom jalan khik ramik  thong tin saong peih dom jalan pathau khan ka nyu laghaih haong labik di drei, piah brei thau rilo jang thong tin nao tal bhap bani ka nyu njauk, samar drah di abih. Ong Nguyễn Văn Hồng, akaok Jabat Ilamo saong Thong tin huyện Quản Bạ brei thau: “Bruk pathau khan brei thau jeng yau bruk khik ramik thong tin saong pathau khan brei thau ye hu pakat ủy karja puk palei biak iek prong. Tapa pathau khan piah daong ka bhap bani thau hu dom jalan ngak di Đảng, sarak hukum di Karja piah cak rok patagok bruk ngak mbang, quốc phòng, an ninh dalam huyện.

Jalan pathau khan tui bhum palei, pandar sap ndom panuac puac di bangsa daok pak nan, iek tui adat cambat tanarakun di puk palei piah palih ruah jalan ngak, jalan taom gaok, ngak brei salih bahrau hatai saneng di bhap bani bangsa takik kan kathaot daok di tapen ceik glaong nan lac bruk ngak biak kan. Min, piah ka dom urang ngak bruk pathau khan hu ginup thong tin, hu thong tin tantu, cambaih laih, samar drah, nan lac bruk di dom jabat khik iek di yaok pakat di Hà Giang./.