Hu yaok pluh thun daok di bhum taneh tapen negar, ong taha palei angan Rơ Lan Hlết daok di palei Klăh hu mboh bruk tagok trun di xa Ia Mơ. Ong taha hadar dom harei dahlau diah, jalan mbak kandah kandaiy, kurang gom ndien, kurang ia, mikva tok daok haong raidiuk saong bruk ngak oh ka tani tanat, jah glai koh kayau ngak apuh, oh daok karo di sa labik. Min urak ini, Ia Mơ hu majam jalan mbak, sang bac, balai hu praong laneing lanoi; gom truac hadah mai tal yaok baoh sang, yaok jalan mbak dalam palei. Ong taha palei Rơ Lan Hlết brei thau:  “Urak ini rahra ngak mbang ginup meda paje. Mikva hu jamraik nan ngak bruk jeng lagaih jang. Biak siam, raidiuk tani tanat”.

Naih gheih abih di xa Ia Mơ harei ini hu lac danak dak kraong ribaong Ia Mơ, hu danao padang ia gam haong majam ribaong ine, ribaong sit tuh ia tame hamu hu salah gah, dak harei dak ngak salih hadah taong abih raidiuk ngak mbang. Hu Karja buh tame yaok ribau ty dong, danak dak kraong ribaong ini meda hu tuh ia ka yaok ribau héc-ta taneh ngak nong. Dom jalan ribaong ia daok dak harei dak hu ba ia tame mblang hamu, ngak bhum taneh thu lagu meng halei jeng dom mblang hamu padai, apuh habei saong njam patam siam hijao. Rahra oh daok laik tame bruk caong maong tame “ia hajan” piah tok ngak hu sa mbang yaok thun. Sa-ai Rơ Mah Lin, daok di palei Krông, chreih chrai brei thau: “Raidiuk di rahra hu lagaih jang dut haong harei dahlau, biak hu tani tanat. Drei ngak habei hu siam lagaih, ngak padai hu siam lagaih. Khol dahlak hulin biak thau dhar phol Karja”.

Dom thun tapa, meng bruk sangka di karja blaoh majam jalan mbak di palei pala dalam xa dak harei dak hu buh jien tame ngak, salah blaoh, brei kein lagaih ka rahra pablei salih. Dalam nan lac, danak dak kraong ribaong Ia Mơ hu jeng labik pambak karo kajap, daong mikva patagok bruk ngak mbang, parilo yaom phun pala.

Ong Nguyễn Tuấn Anh, Phaok Akaok UB Bhap bini xa Ia Mơ, brei thau, xa jeng hu rilo jalan langyah, ngak siam dom danak dak piah patagok dom siam lagaih di majam ha tang hu blaoh dahlau nan, brei kein lagaih ka rahra paglaong siam lagaih bruk ngak mbang.

“Dalam dom thun tapa, pakat uy, karja hu kham merat pataom tame patagok pajaih phun pala, athur raong lagaih haong taneh riya alam langik saong dom kein lagaih di dalam xa, pandar hu dom gah rik daong saong dom danak dak jalan mngak pakat negar ka bruk palei pala bahrau, patrun kathaot karo kajap. Mikva rahra hu dak harei dak tani tanat bruk ngak mbang, saong salih jalan sahaneng bruk ngak, pasiam bruk ngak mbang, an ninh quoc phong di bhum palei”.

Bahrau ini, di Nyaom roya Ndang bo xa Ia Mơ mbang ka I, tukvak thun 2025 – 2030, ong Hồ Quốc Dũng, Uy vien Mban Chap hanh Trung uong Ndang, Bi thu Tinh uy Gia Lai hu ndom meyai tacei cambaih laih jalan nao brei ka xa Ia Mơ.

 “Xa brei cih jalan patagok brei ka 4 bruk hu makna: gah ngak nong ilamo kong nghe glaong; kinh te glai saong di ala phun glai; pablei salih – jitvu pagam haong tapen negar; ka pak lac jirah rivang sinh thai, ilamo. Gam haong nan jhul khang veik bruk buh jien tame ha tang, kinh te – xa hoi, patui veik ngak siam bruk patrun kathaot, rilo meng lac patrun kathaot bhum urang bangsa takik”.

Meng bruk gul pataom di urang jakar, rahra gam haong bruk sangka, buh jien tame di Ndang saong Karja, Ia Mơ harei ini dak harei dak salih bahrau, raidiuk mikva oh padeih bruk pasiam makre, jeng sa labik tapen negar karo kajap brei ka bruk ngak mbang patagok kinh te saong xa hoi di tinh Gia Lai./.