Di bhum pala njam Tuấn Tú, sang halei jeng hu pala phun măng tây hijao meng 4 – 5 sào

Hàm Trí lac xã điểm padang ngak palei pala bahrau di huyện Hàm Thuận Bắc, tỉnh Bình Thuận. Labik palei pak ini sron mbon, joa gidang ngan haong dom jalan hu tuh bê tông samu - tapak pambuak pagam dom puk palei, 2 gah jalan lac dom phun bingu sambo mau hadah mekre. Raidiuk di bhap bini dak harei dak hu paglaong.

Thun 2009, xã Hàm Trí bahrau ngak hu 4/19 tiêu chí ka padang ngak palei pala bahrau, cơ sở hạ tầng oh ka siam yau gauk. Piah peih ngak hu jak jeng danak dak padang ngak palei pala bahrau, xã hu jak ba bhap bini salih janih phun pala tui jalan pala drak piah pablei. Meng nan, yaom kaya nong, raidiuk, bruk mbang ngui daok dang di bhap bini dak harei dak hu glaong tgaok ngan haong jien mek tame kuhria rah tapa lac 30 triệu đồng sa urang yaok thun, yaom kaya nong mek hu 40 triệu đồng yaok hecta.

Tui jalan ngak lac Kanja buh phun jien, bhap bini alin taneh peih praong jalan, mikva di Hàm Trí halain hatain alin yaok ribau mét vuông taneh saong harei ngak piah padang, ngak bahrau 12 jalan bê tông atah 11,49 km; ngak pakhang pasiam viek dom ribaong dalam mblang hamu ngan haong yaom jien tal yaok piluh tỷ đồng... pabak ia ka bruk pala drak, raong glang di bhap bini. Ong Thông Sơn daok di palei Lâm Giang, xã Hàm Trí, huyện Hàm Thuận Bắc, tỉnh Bình Thuận biak bui siam bai, chrieh chrai anak bruk salih bahrau mbaok mata di puk palei: “Tết thun ini bui sambai lo, hu Kanja buh jien tame ngak sang bac,…”

Tabiak truh tỉnh Bình Thuận, khol dahlak mai tal xã An Hải, huyện Ninh Phước, tỉnh Ninh Thuận. Thun 2017, An Hải hu pok angan lac xã mek hu chuan palei pala bahrau. Đảng ủy, karja tuk halei jeng thau lac bruk padang ngak palei pala bahrau oh lac piah padang ngak cơ sở vật chất khang kakajap, siam mekre bo bruk hu makna praong jang lac bruk raidiuk di bhap bini hu glaong tagok. Xã hu pataom tame jhul khang bruk ngak nong tui jalan pabeli salih pandap panda, pandar dom ilamo kỹ thuật bahrau, paglaong chất lượng, paglaong yaom kaya nong. Xã jak ba bhap bini Cam peih ngak hu kein lagaih dom bruk yau ye: pala phun măng tây hijao ngan haong mblang taneh praong labaih 230 ha, bruk pruh ia patak pataom… Gam haong nan, xa daok jhul khang bruk liên doanh, pambuak gauk, blei veik abih kaya pandap, ngak jeng labik pablei tani tanat ka pandap panda kaya nong, ngak brei salih bahrau jalan sahaneng di bhap bini dalam bruk ngak nong. Xã hu padang HTX Dịch vụ ngak nong Tuấn Tú pabak saong pataom blei măng tây hijao di urang nong. Ong Hùng Ky – Yam ndok Hợp tác xã Dịch vụ ngak nong Tuấn Tú, xã An Hải, huyện Ninh Phước, tỉnh Ninh Thuận brei thau: Urak ini, di bhum pala njam Tuấn Tú, sang halei jeng hu pala phun măng tây hijao meng 4 – 5 sào, daok sang ong hu 3ha măng tây hijao: “Pak sang pala phun măng tây, tapa mbang pala jeng kurang ia pruh kayua langik pandiak bhang dui atah…”

Bhap bini Cam daok di 2 tỉnh Ninh Thuận saong Bình Thuận hu labaih 25.530 sang gam saong 124.500 urang. Thun 2021, dalam 2 tỉnh Ninh Thuận saong Bình Thuận hu 14 dalam abih tih 16 xã hu rilo bhap bini Cam daok, mek hu chuan palei pala bahrau. Danak dak palei pala bahrau hu bam ai mbaok meta bahrau ka dom xa hu rilo urang bangsa Cam. Meng peih ngak danak dak padang ngak palei pala bahrau bo raidiuk bhap Bini Cam di 2 tinh nan oh padeih hu salih bahrau saong tagok jang biak rilo. Dom sang kan kathaot bhum urang bangsa Cam trun tui yaok thun. Tukvak anak tal, piah khik kajap saong paglaong chất lượng asal kadha palei pala bahrau di bhum bhap bini bangsa, dom puk palei hu ba tabiak rilo jalan ngak, dalam nan pataom tame bruk ngak mbang, pala drak. Ong Trần Quốc Nam – Akaok UBND tỉnh Ninh Thuận brei thau: “Dom xã hu bhap bini Cam daok, urak ini rilo meng lac xã palei pala bahrau. Dalam tukvak rami ramik brei thau cambaih laih bruk ngak piah cak rok patagok kinh tế xã hội bhum ciek, bhum bhap bini Cam, bhum bhap bini bangsa takik, lac sadalam dom bruk bo tỉnh Ninh Thuận biak caik hatai sangka. Tỉnh jeng jao ka dom gah ba tabiak dom danak dak, dom jalan ngak cambaih laih paih peih ngak, ngak habar piah ba mai kein laba, pabak tame dom prein khang buh tame ka bhum bhap bini bangsa takik, dalam nan hu bhum bhap bini bangsa Cam.”

Yaom lac daok rilo kan kandah, min dom puk palei hu rilo bhap bini CAM daok dalam tỉnh Bình Thuận saong Ninh Thuận jeng daok kham marat paglaong chất lượng dom asal kadha palei pala bahrau, pamaong tal bruk padang ngak palei pala bahrau paglaong, pablei pala bahrau kiểu mẫu./.  

Urang lang: Thu Thao – 31/01