Phường 1 hu 125 sang urang Cam Islam, hu abih tih 365 menuac daok meng lavik rai pak labik ini. Mikva tuk halei jeng ngak siam tui jalan ngak di Đảng, hukum di karja saong dom adat di palei, pambuak gauk khang kajap haong karja, MTTQ saong dom kapul nyaom, kham merat hu mbaok tame dom bruk pakacah gauk, dom bruk ngak mbang, pala drak saong dak padang ilamu bharau hu puk palei peih tabiak. Amuk ÊNHASINA,  urang dang akaok Khu phố 2, Phường 1, ban Tây Ninh brei thau:

 “Jaik abih dom sang pak ini jeng ngak padai, raong kubao lamo. Urang Cam daok meng lavik saman di Phường 1.”

Tukvak tapa, hu bruk sangka di tỉnh Tây Ninh, ban hu buh jien padang ngak hạ tầng, dom jalan dalam bhum urang bangsa takik daok, jeng hu tuh nhựa, tuh bê tông, taong abih dom sang urang bangsa takik hu pandar điện negar, hu sang danaok khang kajap, oh daok sang sit sot, taik tahak. Mikva jeng hu thẻ BHYT hu daong meng kadung jien karja. Sang bac, bilai iek ruak hu padang ngak praong, siam, khik kajap bruk iek ruak, taong ruak saong bac ta-a, dom adei dalam umo bac ta-a jeng hu nao bac. mBan lambaok urang ISLAM hu peih pato haroh Cam brei ka dom adei. Adei Y Lợi, anek saih tal bac 12A2, Sang bac Phổ thông bangsa gam bac gam daok tỉnh Tây Ninh biak uan tabuan thau dhar phor sang bac hu daong palagaih ka adei bac ta-a: 

 “Adei tame sang bac hu miễn abih jien bac saong hu daok  nội trú, hu sang bac kuhria brei abih meng bruk mbang huak tal bruk nao bac, brei adei dom pandap bac ta-a ginup abih. Sang adei biak kan kandah min labik ini hu daong ginup abih ka adei ba ta-a hu siam di abih. Piah harei hadei adei hu ilamu saong jeng sa menuac siam ka puk paga, palei negar”.

Thun 2023, Phường 1 hu tabiak mbaok bruk “Jak ba mikva urang bangsa takik dak padang labik daok hijao - hacih - mekre”, jak ba mikva jah klaak hareik hareim, puh ramik hacih sa-at, pala phun hijao, pala bingu kiểng anak sang. Padang jalan dok, tauk kiak mblang bein anak sang, caik pandap pasram pahat rup gah langiu sang megik haong yaom jien yaok ratuh triệu đồng.

Dom bruk khik ramik saong patagok ilamu bangsa di mikva tuk halei jeng hu sangka. Bruk an sinh xã hội kuhri kuhria ka mikva bangsa dalam phường hu peih ngak siam. Dom gah di karja palei bhian peih bruk iek ruak, taong ruak saong pambuak gauk peih bruk pametai jamaok, loăng quăng. Dom sang jeng hu pandar ia hacih. Raidiuk meng mbiah, ginup, oh daok sang kan kathaot, sang jaik si kan kathaot. Ong Nguyễn Hoàng Phương, Phaok akaok UBND phường 1, TP. Tây Ninh brei thau:

 “Thau lac bruk bangsa lac bruk di abih hệ thống chính trị saong di taong abih rahra. Tukvak tapa, dom danak dak, bruk ngak saong dom sarak ka urang bangsa takik tuk halei jeng hu pakat ủy, karja Phường 1 caik hatai sangka saong peih ngak hu kein, lagaih. Bruk ngak mbang, ngak huak saong hatai sahneng di rahra pak ini dak harei dak hu glaong tagok, mikva cakrok tani tanat. Phường kham merat jak ba mikva bangsa paglaong hatai kham merat yam tagok dalam ngak mbang, pablei salih, ngak kaya meda meng prein di drei”

Karja palei saong mặt trận, kapul nyaom, tuk halei jeng sangka kuhria raidiuk saong sarak, peih ngak dom danak dak brei mesraiy yaom laba lap, daong phun jien, ba bruk hit ngak mbang ka mikva. Tuk Tết ini, Phường 1 hu jak ba saong alin hadiah yaok ratuh pok pandap Tết. Harei puac thun ini, mikva daok jar var caga taduan sa Tết trei sir, bui sambai./.