Palei Tuấn Tú- xã An Hải, huyện Ninh Phước, tỉnh Ninh Thuận dom harei akaok bilan 8, mboh lac jar var jang, tik rilo sang urang nong pataom gauk paik măng tây hijao pajeng nao pablei ka Hợp tác xã Dịch vụ tổng hợp Tuấn Tú haong yaom tani tanat lac 50.000 đồng/kg. Lac urang ba akaok nao dahlau pachreih tui bruk pala phun măng tây di palei, ong Kiều Minh Tiến khan lac: “Bahrau ini hợp tác xã daok blei pajaih mai, mblang taneh drei pala meng di thun 2018 jeng taha paje, HTX daok pabam pajaih ka mikva pala veik, drei pala hu 1.800 phun, mek hu 9-10 ký. Dom mikva mek dom ribau phun, măng tây ye drei ngak harak  pambuak bruk haong HTX, lac 46 ribau, tui kuhria lac yau nan, dah page drei jao ka hợp tác xã, tal 10 harei hadei hợp tác xã payua jien ka drei. Phun ini piah patruh eik patrun kan kathaot ka mikva, meng kan mikva bhian pala cải mbong, ratak lo saong dom janih phun karei, jien mek tame oh tani tanat.”

Palei Tuấn Tú rilo meng lac urang bangsa Cam, langik tasik kan kandah, tok hu hangin saong pandiak, nan ka oh ndom tal taneh pala biak kurang, raidiuk kan kandah. Hu Sở Ngak nong saong patagok palei pala tỉnh Ninh Thuận ngak iek ba phun măng tây hijao tame pala di palei, rilo baoh sang hu mbaok tame saong maong mboh phun măng tây njauk lac phun “po brei” kayua lagaih haong taneh riya, langik tasik di pak ini. Mikva ba abih taneh tame pala. Pala meng dalam bein, jaik tame pabah sang tal pala jeng mblang hamu praong, piah hu rilo jang, tagok jien mek tame.

Palei Cam Tuấn Tú hu 547 baoh sang ngan haong 2.350 urang, abih tih dom baoh sang pak ini hu pandar dien, pandar ia hacih. Raidiuk di rahra meng hu jien mek tame meng phun măng tây hijao, pala padai pambuak haong raong athur. Meng bruk kham marat di kanja palei saong rahra, palei mek hu rilo jak jeng siam mekre dalam cak rok patagok kinh tế - xã hội. Phun jien buh tame padang ngak jalan thủy lợi, jalan mbak, jalan puk palei mek hu tanut lac hadah - hijao – hacih - mekre. Dalam palei hu 3 km jalan praong saong jaik 9 km jalan sit hu tih bê tông xi măng, pabak siam bruk nao mai pajeng ba kaya nong. Jaik abih dom sang hu padang ngak praong, siam. Dalam palei hu labaih 10 baoh sang blei hu radaih ô tô pabak ka bruk nao mai. Amuk Kiều Thị Khuê, Bí thư chi bộ palei Tuấn Tú chreih chrai khan lac:“Dahlau daih 50 baoh sang ka oh hu kadik mac, ka oh hu tu laar, daok urak ini sang halei jeng hu tu laar, kandik mac, hu gaok lisei điện. Adat cambat hu dam lahik, ndam lakhah oh daok ngak palai pajoa yau dahlau deih, daong ba gauk ngak mbang, pacang caga taong paoh gauk dalam sang, patagok dom yaom glaong ilamo di bangsa Cam, hu bruk hagait di puk palei lac kapul urang kumei mai daong sa kadha daoh tamia”.

Raidiuk ginup meda, rahra kham merat rik daong padang ngak dom danak dak an sinh xã hội; hu mbaok tame xã padang ngak puk palei bahrau. Dalam 3 thun jaik di ini, palei Tuấn Tú jak ba hu labaih 18 tỷ đồng peih ngak dom danak dak cak rok patagok kinh tế - xã hội, ngak jeng mbaok mata bahrau ka puk palei. Langiu di kadung jien kanja, pablak tame dom danak dak, phun jien masaiy saong dom doanh nghiệp, abih di nyu nan lac mikva urang Cam hu rik tame labaih 2 tỷ 200 triệu đồng. Ong gru Châu Minh Hương, lac urang hu angan je di palei hu pok tagok ngak Chủ tịch Hội đồng Sư cả Hồi giáo Bàni tỉnh Ninh Thuận, brei thau: “Ndem ka nyu njauk lac salih biak rilo, hadei di ini tui danak dak, meng di thun 2000 tal urak ini, hu padai hu brah hu jien dalam sang, urak ini anek kamuan hu nao bac jeng biak rilo, bilai y tế xã ruak kik hagait nao tal, adei saai jeng biak abih hatai daong. Urang Cam jumpataom gauk haong urang Yuan yau adei saai sa tain.”

Mai tal palei Tuấn Tú urak ini, mboh lac sa palei hadah hadai mblo tagok di bhum taneh bak pandiak hangin. Sambo mau hijao di phun măng tây hu jeng  sambo mau praong oh lac di palei Tuấn Tú bo daok pambak tabiak xã An Hải, salih ka mbaok mata bhum taneh kan kathaot “cuah par cuah chat” ngan haong dom mbu phun daruai, 65% mblang taneh lac taneh sarau haong cuah thu lagu. “Măng tây oh lac phun patruh eik patrun kan kathaot bo daok lac phun ngak kaya mada ka urang nong”./.