
Dalam baoh sang laneing lanoi bahrau hu padang brei alin hadiah, baoh sang ong Rơ Lan Đếu daok di palei Bó, xa Ia Kly, huyen Chư Prông chreih chrai raok mikva but pajaih atah jaih mai rivang, tadhau ayuh. Sap ndom klao ndaih ndaih dalam baoh sang bahrau, pambak bui sambai meng bruk pataom mbaok gauk saong bak hatai. Meng ini, baoh sang ong hu labik daok tani tanat tuk hu sang daok saong hu ging tani tanat, sang pahacih, mblang sang laneing lanoi saong bambang jang karo kajap.
Ong Rơ Lan Đếu drut druai brei thau, baoh sang bahrau lac meng bruk rik jien di rilo urang, meng but pajaih, hauk tian tal Mat tran Negar, dom kapul chinh tri – xa hoi saong kapul lin pan phao karaong bhum palei: “Dahlak hulin bui sambai biak rilo. Likau thau dhar phol dom pakat daong jien, daong prein ngak ka baoh sang dahlak hulin hu sang daok praong laneing lanoi. Urak ini hu sang paje, baoh sang ong kham merat ngak mbang piah uak drei tagok.”

Di huyen Chư Prông- bhum palei hu dom baoh sang taik tahak njauk brei oh daok hu rilo abih di tinh Gia Lai, bruk jak ba prein ngk meng po sang saong pambuak bruk doang meng di dom kapul chinh tri – xa hoi hu daong lanyah kadha saong jhul samar bruk padang. Daok di huyen Phú Thiên hu peih ngak gam gam. Bhum palei brei ndap nda rilo piah hu trun yaom kaom, blaoh rabha ba mai tal dom xa. Meng nan, tal ini, huyen hu salah blaoh jalan mbak, khik kajap Rahra hu sang daok karo kajap min jeng khik hu tui thaik thaot ilamo meng kal.
Thun 2025, ngak tui jalan pato tacei di Thu tuong Rajaei, Gia Lai ba tabiak jalan ngak brei oh daok 8.485 baoh sang taik tahak. Meng di tuk danak dak bahrau peih ngak, Gah Pato tacei saong Kapul daong bruk danak dak hu padang, pato tacei gam gam tal yaok so, gah, bhum palei. Meng nan, danak dak dui pachreih hu bruk ba drei tame di pakat uy, karja, khul. Naih gheih abih lac Kong an tinh hu chreih chrai rik daong jien padai, prein ngak, pambuak haong karja, Mat tran Negar, kapul saong Rahra jhul samar bruk ngak. Thieu tuong Lan Lâm- Yam ndok Kong an tinh, Akaok Gah Pato tacei danak dak brei oh daok sang taik tahak, Kong an tinh Gia Lai brei thau: “Ndang uy Kong an hu peih ngak siam lagaih. Urang jakar, bol lin hu daong sa harei jien bilan, rik daong labaih 3 ty dong. Gam haong nan rik daong prein ngak, pambuak khang haong dom gah, bhum palei, peih ngak siam danak dak, caik gilac rilo bruk mbuan hadar dalam tung tian rahra.”

Ngan saong prein khang taong abih gam haong rilo hadah krah, tal ini tinh mek hu 82% jalan peih ngak saong 42% jalan ngak hu jao. Ong Đinh Văn Dũng, Bi thu Huyen uy huyen Chư Prông ndom lac kham merat di bhum palei jeng lac kham merat di tinh, salah blaoh danak dak dahlau bilan hajan thun ini: “Taong abih dom baoh sang jeng hu padang njauk, taneh meng 36 m² ba tagok. Rilo baoh sang ngak sang 60 – 70 m², hu ginup talei paga, bambang jang, danak dak karei. Tal 30/6, khol dahlak hulin brei ngak salah blaoh taong abih 997 baoh sang padang bahrau, khik kajap abih tih urang hu sang daok khang kajap, abih di nyu nan lac baoh sang kathaot, jaik kathaot, paglaong raidiuk Rahra.”
Bruk ngak tani tanat, hadah krah dalam bruk peih ngak danak dak brei oh daok baoh sang taik tahak di dalam Gia Lai hu ba mai siam lagaih. Sa bruk salih bahrau sang daok ka baoh sang kathaot hu jaik salah blaoh, daong mbaok meta palei pala, abih di nyu nan lac bhum urang bangsa takik tinh Gia Lai dak harei dak praong laneing lanoi, salih bahrau./.
Viết bình luận