Dân quân Lo Thị Thắm haong dom dân quân karei di xã La Dạ, huyện Hàm Thuận Bắc bhian nao tal dom sang bhap bini piah pathau khan, jak ba, daong ka bhap bini ngak dom bruk hamu, puh, pala drak… Tapa nan, dom dân quân duah thau ka raidiuk di bhap bini, duah thau hatai sahneng, hatai caong, bruk an ninh trật tự, dom panuac di bhap bini pok tagok pakat ủy, karja palei. Dom kadha nan hu pathau khan haong karja palei, xã saong Mban Chỉ huy Quân sự.

Meng tuk huyện Hàm Thuận Bắc peih ngak bruk “Dân quân thau cambaih sang bhap bini”, dom bruk pambuak tal an ninh trật tự, menuac meng labik karei mai tame palei, dom bruk mê tín, pathau khan suan ilamu, adat cambat saong dom caong khin di bhap bini hu langyah samar drah, dân quân kham merat tame dom bruk ngak di palei saong tuk halei jeng ngak siam bruk di drei. Sa-ai Lo Thị Thắm, dân quân xã La Dạ lac:

“Kol dahlak bhian mai daong ka mikva, pathau khan brei abih gauk thau jalan raong glang habar ka nyu lagaih, pagap yau ngak var atah sang piah khik hacih sa-at, siam mekre jang”

Lac labik hu 100% glai ceik glaong, bhap bini daok jeng dom kapul sit, atah di pasak xã, jalan nao mai kan kandah, bruk ini caik tabiak dom cuang kandah ka karja, dom gah chức năng dalam bruk khik ramik, tacei ba, khik iek siam mekre, salamat. Bruk “dân quân thau cambaih sang bhap bini” hu daong paglaong di abih bruk ngak di dân quân dalam bol bhap rahra. Yaok harei, gah dân quân pambuak bruk haong công an, kiểm lâm, nao pasang iek, khik ramik sron mbon puk palei, pathau khan, ieu kakei dom sang ngak du lịch, taong cap kaya ikan, raong pala angaok danao, khik ramik alam langik tasik, khik iek glai, khik kajap salamat jalan nao mai angaok kraong ribaong, pacang caga mblung ia…

Bruk ngak di dom gah hu ba mai dom siam lagaih, daong khik ramik siam mekre dom bruk rah tabiak dalam palei, ba mbuan lagaih ka du lịch, dịch vụ di palei cakrok, raidiuk bhap bini dak harei dak ginup meda tagok. Ong Mai Văn Minh, sang pablei salih, ngak du lịch lòng hồ Đa My brei thau:

“Mboh kol co klaik atau lahik drap ar jeng duah mboh, atau daong ka bhap bini samar di abih, yaom lac melam sup adei sa-ai jeng abih drei daong ka bhap bini”

Mban CHQS huyện Hàm Thuận Bắc thau cambaih labik dang, bruk ngak di dân quân tự vệ dalam khik kajap siam mekre, sron mbon, salamat puk palei saong peih ngak bruk quân sự, quốc phòng. Bruk padang dân quân tự vệ dalam huyện Hàm Thuận Bắc saong dom xã bhum glaong tuk halei jeng hu huyện pambuak haong bruk padang chính trị khang kajap.

Taphia bruk hu mbaok di grauk labik, peih ngak khang kajap, chất lượng dân quân tự vệ tuk halei jeng hu sangka, tal urak ini hu jaik 30% urang đảng dalam abih tih dom dân quân tự vệ, 100% xã hu chi bộ quân sự saong hu pakat ủy; taong abih yaok puk palei jeng hu padang tiểu đội dân quân saong hu urang đảng ba akaok nao dahlau. Ong Thông Đình Anh, Phaok akaok UBND xã La Dạ, huyện Hàm Thuận Bắc, tỉnh Bình Thuận brei thau:

“Ini lac kapul ba akaok nao dahlau, samar thau hatai caong di bhap bini, abih di nyu lac samar daong ka pakat ủy, karja dalam bruk langyah dom suh sah di mikva dalam tukvak tapa.”

Trung tá Lương Hải Vương, Chính trị viên phó mBan CHQS huyện Hàm Thuận Bắc, tỉnh Bình Thuận ndom lac:

"Meng nan ngak brei jum pataom khang kajap di dân quân saong bhap bini piah daong ka pakat ủy, karja palei langyah siam dom bruk rah tabiak, caik veik dom siam mekre di urang dân quân dalam hatai bhap bini".

Meng bruk anak meta di dom xã bhum glaong huyện Hàm Thuận Bắc, tuk peih ngak bruk “dân quân thau cambaih sang bhap bini”, dom dân quân pataom tame dom sang kan kandah, sang kathaot, sang hu anek bhik ngak suan adat hukum. Bruk daong, pathau khan, pato pakai hu daong peih ngak siam sarak di Đảng ka dak padang kapul dân quân tự vệ khang kajap, praong dalam, dak padang bruk quốc phòng abih bhap bini khang kajap, khik ramik sron mbon, salamat puk palei dalam huyện./.