Sa-ai Nguyễn Thị Hồng Sáng mai meng huyện Hàm Thuận Nam lac sa dalam dom diễn viên di kapol pakacah daoh tamia bhap bini, pakacah ngui cuk khan ao saong yaih khan rija roya meng kan di bangsa J’rai.

Sa-ai Sáng brei thau, kapol hu ba tal harei pataom dom kadha yau: Tamia “Uan padai birau”, ma-in alat ragam “Tiếng khèn bầu”, daoh tamia kadha “Đàn đá đêm nay”: “Tapa harei pataom ini dahlak caong khin, tỉnh sangka jang brei mbuan lagaih ka bhap bini bangsa di dom huyện, ban sit, taom mbaok, ndem biai nao mai klak rabha ka gauk , yaih khan ilamu di bangsa drei.”

  Sa-ai Cửu Đặng Long An, lambaok kapol Bắc Bình brei thau: Lac bhum palei hu rilo urang Cam dalam tỉnh Bình Thuận, kapol urang huyện Bắc Bình hu ba tal harei pataom dom kadha hu makna ndung bak ilamu Cam nan lac: Ma-in alat ragam Cam, tamia adat ngak kareih di urang Cam Bani, daoh tamia ragu bhap bini Cam…Abih di nyu nan lac padang ngak veik Rija Negar di urang Cam.

  Harei pataom pachreih hu jaik 300 nghệ nhân, diễn viên, urang pakacah lac bangsa Cam, Hoa, K’ho, Raglai…mai meng 10 huyen, ban sit hu mbaok tame. Meng labaih 40 kadha rah tabiak dalam 2 melam saong 1 harei, dom nghệ nhân, diễn viên hu ba mai ka urang maong iek dom ilamu siam gheih di yaok bangsa.

Nhạc sĩ Đỗ Quang Vinh, lambaok Mban Giam khao bruk pakacah daoh tamia bhap bini, pakacah ngui cuk khan ao saong yaih khan ilamu meng kan brei thau, “Harei pataom ilamu -thể thao dom bangsa tỉnh Bình Thuận thun 2022” hu peih ngak hadei di labaih 2 thun jit ruak praong COVID-19. Bruk nan jeng pambak tal bruk peih ngak saong bruk pakacah di dom kapul. Min tapa dom bruk di harei pataom ngak brei ka Mban giam khao mboh tatuak drei.

Nhạc sĩ Đỗ Quang Vinh daok brei thau lac:“Ilamu di yaok bhum palei jeng hu pataom tame harei pataom ilamu the thao dom bangsa mbang ini. Abih di nyu nan lac, binah parang iek ilamu daoh tamia bhap bini saong ngui cuk khan ao meng samar muk kei di dom bangsa daok khik hu ilamu siam gheih. Bruk njauk uan tabuan di urang bangsa Cam lac taphia kapol nghe nhan umo taha ye hu dom urang ranaih daok patui jalan, pataom veik saong thau iek praong dom yaom glaong bo rai rah dahlau hu patoa brei veik.

Ong Võ Thành Huy - Phaok Yam ndoc Sở Ilamu - The thao saong Dilich tinh Bình Thuận brei thau, tapa taong yaom tapa di Mban peih bruk, dom kapol hu mbaok tame harei pataom biak sangka caik hatai ngak brei siam kadha ba tame pakacah di drei: “Dalam nan hu dom kapol yau: Bắc Bình, La Gi, Hàm Thuận Bắc jeng patagok hu prein khang di drei dalam bruk daoh tamia bhap bini jeng yau dom môn pakacah the thao meng kan di bhap bini bangsa dalam tỉnh. Tapa nan, rik daong ngak brei jak jeng di harei pataom ilamu.

Tapa dom bruk hu bhap bini padang ngak veik, yaih khan, patagok yaom galong ilamu meng kan, pamong tal bruk padang ilamu siam gheih meng bhum palei. Tapa nan rik daong pato [pakai ilamu anit ranam taneh ia, hatai hadah mbaok meta ka bangsa, thau tal bruk khik ramik saong patagok ilamu meng kan, pakhang, patagok prein khang jum pataom taong abih bangsa./.

Urang lang: A.Nghiem – 22/8/2022