Tacei tame jalan bê tông jangaih, mekre, nduac tapa dom puk palei, taha palei K’Keo, daok di puk Hàng Làng, xã Gung Ré, huyện Di Linh (Lâm Đồng) uan tabuan brei thau lac, mbaok mata puk palei di xã hu salih karei biak rilo dut saong dahlau deih. Meng hu jalan mbak nao mai mbuan lagaih, kaya nong oh njauk urang blei kateik yaom, dui katut panak veik puk palei haong bhum pasak, nan ye raidiuk di rahra hu glaong tagok biak rilo dut saong dahlau deih: “Tukvak tapa, mikva hu rik daong phun pala,  mblang taneh saong rik prein, jien padai tame piah gam haong kanja padang ngak puk palei bahrau. Kanja daong ba saong mikva ye rik tame piah peih praong jalan nao tame dom labik ngak, padang ngak jalan mbak puk palei. Ngak habar padang ngak puk palei hu jalan mbak nao mai, palagaih piah cak rok kinh te, daong ka mbaok mata puk palei dak harei dak siam gheih jang”.

Di puk Duệ, xã Đinh Lạc, hadei di tuk hu pok brei angan lac puk ilamo kiểu mẫu, mikva pak ini kham merat jang dalam bruk baa tangin tame haong haong kanja dak padang saong peih ngak dom asal kadha palei pala bahrau paglaong. Tui ong M’Hiu Nguyên, Bí thư Chi bộ puk Duệ, rahra mboh hu kein laba biak biai di bruk padang ngak palei pala bahrau ba mai ka drei, brei ka puk palei drei, nan ye yaok rahra thei jeng kham merat hu mbaok tame. Dalam nan, danak dak Harei sanecar palei pala bahrau daok hu pambak tabiak khang kadang, daong ka mbaok mata puk palei deih yau labik đô thị pasak: hu đien jalan truac hadah, hu radaih pataom mek nerak, jalan mbak puk palei tuk halei jeng hijao, hacih, mekre. Ong M’Hiu Nguyên, ndem lac: “Urak ini di puk Duệ daok peih ngak biak siam. Urang jakar saong rahra jeng ba tangin tame pachreih tui Harei sanecar palei pala bahrau. Jalan mbak tuk halei jeng hijao, hacih, mekre, nerak tachrauk hu pataom mek, gom truac hadah yaok labik dalam puk palei, dom jalan dalam palei jeng hu tuh bê tông... mbaok mata puk palei hu salih bahrau.”

Di Linh lac huyen bo urang bangsa takik meblah rilo, labaih 40%, dalam nan rilo meng lac urang K’ho. Tal urak ini, dalam huyen hu 18/18 xã mek hu angan palei pala bahrau, 2 xã palei pala bahrau paglaong saong 1 xã palei pala bahrau kiểu mẫu. Ong Vũ Đức Nhuần, Phó akaok UBND huyện Di Linh brei thau lac, piah patui veik peih ngak hu siam lagaih danak dak padang ngak palei pala bahrau dalam vaktu 2021-2025, mBan thường vụ huyện ủy Di Linh hu padang ngak danak dak 4, peih ngak Danak dak Harei sanecar padang ngak palei pala bahrau di grauk dom puk palei. Tapa jaik 1 thun peih ngak, danak dak hu pambak tabiak khang kadang dalam yaok rahra saong urang jakar, urang ndang. Dalam nan, bruk ngak di rahra dak harei dak brei mboh saong patagok hu siam lagaih. Ini hu maong lac bruk piah ka huyen mek hu dom asal kadha caong hu saong ginup piah pamaong tal bruk hu pok brei angan palei pala bahrau di thun 2024. Ong Vũ Đức Nhuần, ndem lac: “Dalam tukvak tapa ye tal harei sanecar, harei adit ye urang dang akaok huyện, Bí thư huyện, urang pan akaok UBND huyện ye kol dahlak parabha gauk trun dom xã piah pachreih ba, blaoh gam haong mikva peih ngak dom asal kadha yau peih thoan dom binek, pato tacei mikva salih số...Hu ngak brei pambak tabiak khang dalam mikva ka bruk ngak di drei dalam padang ngak palei pala bahrau”.

Tui jalan patagok dom prein khang di bruk jumpataom bangsa, mek rahra ngak pasak, lac pasak dalam peih ngak bruk padang ngak palei pala bahrau, jia lac huyện Di Linh meda samar mek hu dom asal kadha hu ba tabiak, rik daong dak padang bhum ceik glaong Di Linh dak harei dak kaya mada, siam mekre./.