Subuh page awal, langik oh ka dah jangaih dua anek amaik di saai Sồng Thị Chư daok di xã Nà Nghịu, huyện Sông Mã (Sơn La) daok hwui hwar caga tapuk siphau, pandap bac magru gam saong dom pandap karei piah gam haong gauk nao bac. Yaok hasa adit hu 5 van, tuk anek kumei di drei nao tal sang bac pakat Tiểu học Nà Nghịu, jang ieu lac tuk masa amaik jang nao sang bac magru huruh brei ka dom urang ka oh thau akhar tapuk di palei. Bac magru huruh akhar tapuk ieu lac mboh mbuan sanang min tapi bruk ini mada gam haong hatai caong lawik labaih 30 thun tapa di urang kumei bangsa Mông ini. Hatai kham marat nao bac oh piah duah hu ilamo, piah patrun glaih glar kan kandah, di dalam raidiuk, nyu daok ieu abih di nyu saai Sồng Thị Chư caong lac meda pambuak gam haong dom anek daok di umur thun nao tal sang bac di drei: “Drei praong thun umur paje bo oh thau akhar huruh, oh thau tatih thau kuhria mboh biak kankandah biak rilo; pablei tangei oh thau hadom kilo, hadom yến… Thun ini drei nao bac, drei nao pablei manuk, pablei tangei, pablei bei blom meda thau kuhria thau tatih hadom jien, meda mbuan jang, bilan tet thun barau ini meda bui sambai jang dom thun dahlau. Drei meda kham marat bac piah brei 4 urang anek amaik di drei thei thei jeng thau akhar”.

Labaih jaik 80 urang bac, meng anak dara tal dom muk anai, amuk kumei buk patih gam daok bac saong gauk. Dalam dom urang nan, rilo urang ka oh bhian mboh krein akhar huruh oh krein laik taka apa. Mada jeng hu urang hu nao bac mang dalau, min tapi klak lawik oh daok hadar, oh daok thau akhar.

Labaih 3 bilan meng di tuk peih bac, anai gru Lò Thị Phước, Sang bac Tiểu học Nà Nghịu, huyện Sông Mã ba abih hatai kham marat yam tapa dom kan kandah di sap ndem, panuac puac, akhar huruh, di dalam bac magru pato padar ka urang bac:“Tal bac hu rilo bangsa yau ye Mông, Thái, Sinh Mun, Khơ Mú, rilo urang bac ka oh thau sap Yuan sap Viet, yau nan ye dalam tuk pato, gru pato njauk ndem mayai sap bangsa urang takik di labik piah langyah, pato tacei. Urang bac rilo meng lac dom urang gaok kan kandah, klam bút, tapuk, siphau oh hu yau nan ye kon dahlak hulin jeng daong ka urang bac. Di ilamo ye lac oh thau hagait, ka oh thau mbaok huruh akhar, jang yau ka oh thau cih vak, dreih yau ye anek saih barau tame tal 1…”

Dalikan bruk gein di xã Nà Nghịu yau ye hala binguk gam gam di 4 tal pato akhar di bhum huyen tapen negar Sông Mã dalam thun bac ini. Meng masa ini mbiah tal thun 2025, Sông Mã meda hu 18 tal bac brei ka mikva urang bangsa; peih bruk pato mageu di dom labik bhum atah biyah, bhum ceik glaong tapen negar, dom labik daok hu rilo ka oh thau khar huruh saong caong hu bac piah thau akhar thau huruh.

 Ong Nguyễn Công Viên, Akaok Jabat Pato magru huyện Sông Mã, tỉnh Sơn La brei thau lac: “oh ieu lac dom urang ka oh thau akhar huruh, rilo urang kumei, uranaih dalam umur meng 15 tal 60 thun di dom puk palei bhum atah biyah hu takik pambuak haong ilamo bac magru bo daok mboh bruk bac blaoh paje bo var abih. Dang anak bruk nan, jabat hu ba tabiak jalan ka UBND huyện pambuak haong kapul urang kumei, Kapul urang ngak nong, Kapul dam dara pasang iek veik saong padang tabiak jalan piah pato akhar huruh ka mikva urang bangsa: “Bruk pato akhar ka dom urang ka oh thau akhar lac bruk ngak biak kan, dom urang bac rilo meng lac daok dalam umur thun daok nao ngak, jabat hu pambuak haong dom kapul politik - rahra xã hội jak ba urang bac tabiak tal bac; rami ramik dom tuk wak maong bac ka lagaih, bac tame dom maong bo urang bac takik tabiak ngak mbang, pala drak. Gru pato hu brei pilih ruah mai pato akhar huruh ka dom urang ka oh thau akhar huruh jeng lac dom urang thau cambaih, hu ilamo ka sap ndem panuac puac di puk palei, saong abih hatai, kayua dom urang ini, jalan pato jeng karei haong dom anek saih tui njauk umur njauk thun”.

Jalan bac magru duah ilamu akhar huruh di mikva bhum tapen negar Sơn La oh mbuan sanang; min tapi di dalam tal bac sang bac, meta ndung bak bui samai tuk mboh akhar huruh hu vak biak gheih ghang di blah tapuk, gam haong dom sap puac tagok. Thun barau ini hu thau akhar huruh meda jeng lac peih tabiak dom hatai caong ka raidiuk siam makre bahrau, hadah hadai jang di bhum taneh tapen negar./.