Raidiuk ginup meda di rahra xã Thanh Bình hu mboh cambaih meng thun 2015, tuk peih bruk salih janih phun pala lagaih haong taneh riya di palei. Nan lac bruk ba yaok ratuh ha taneh padai, njam patam oh hu kein laba tapa pala sa janih phun thanh long hu năng suất glaong. Dalam xã urak ini hu 675 ha bein phun thanh long, ini lac bruk ngak praong di bhap bini pak ini brei năng suất 25 tấn sa ha saong hu sản lượng labaih 50.600 tấn sa thun. Ong Lê Văn Trí, sa urang daok di palei Trường Xuân A, xã Thanh Bình brei thau, meng kak kajap haong phun thanh long, raidiuk bhap bini dalam palei hu tagok, oh daok bruk eik lipa, rambah rambup: “Raidiuk urak ini ginup meda jang tuk bahrau hòa bình. Tuk mesruh metak, labik ini “gah sup, gah hadah” nan ye tuk nan rambah lo. Urak ini kan kathaot eik lipa oh daok, hu labaih drap ar hasit, mboh uan tabuan paje. Phun thanh long meng 10 thun tagok, hu menuac ndom sambai lac, pala phun thanh long khin kan kathaot jeng oh kan kathaot hu”.  

Langiu di bruk pala phun thanh long, urang ngak nong xã Thanh Bình daok hu raong tapon limo jaik 2.900 drei, labaih 300 rabau drei menuk ada saong pala yaok ratuh ha njam patam.

Tal urak ini, dalam xã hu tal 65% sang ginup meda, daok veik lac sang hu raidiuk mbiah ginup saong meng thun 2021 xã oh daok sang kathaot. Jien mek tame kuhria tui akaok menuac hu 64 triệu đồng sa thun. Abih di nyu nan lac, taong abih dom sang sarak karja jeng hu raidiuk samu atau glaong jang tanut diukrai di labik dân cư; 80% dom baoh sang bhap bini hu padang ngak meng bê tông khang kajap ...

Taphia di bruk patagok kinh tế, xã Thanh Bình daok kham merat padang ngak jalan mbak nao mai dalam palei. Langiu di phun jien di karja daong brei, bhap bini hu rik tame labaih 1,5 tỷ đồng sa thun piah ngak, piah pasiam jalan mbak puk palei. Tal urak ini xã hu tuh bê tông, tuh menyek taong abih dom jalan nao mai dom xã, dom palei atah abih tih 43 km. dalam xã urak ini hu 03 sang bac mẫu giáo, tiểu học saong trung học, Bilai y tế xã mek hu tanut chuẩn pakat negar.

Đảng bộ xã hu 213 urang đảng daok sinh hoạt di 12 chi bộ. Rilo thun gam Đảng bộ mek hu angan “Hacih sa-at – khang kajap”. Ba akaok nao dahlau dalam dom bruk ngak cách mạng dalam palei lac kreih camin abih drei ka menuac sia, puk palei di Trung tướng Nguyễn Việt Thành (daok ieu lac ong Tư Bốn) dahlau daih ngak Phó Tổng Cục trưởng Tổng Cục Cảnh sát Nhân dân- Bộ Công an. Hadei di tuk padeih hưu mai daok di palei, ong kham merat kuhria ka raidiuk di bhap bini, ka baoh sang sarak karja. Njauk ndom tal di abih nan lac yaok thun ong jeng hu jak ba meng dom doanh nghiệp, urang ngak pahla hu jaik 3 tỷ đồng piah alin hadiah pandap ka sang sarak karja, urang kan kathaot; padang sang anit ranam, ngak tatua, jalan, ramik pasiam nghĩa trang liệt sỹ, sang anit ranam, sang ilamu palei ...

    Thun 2015, xã Thanh Bình lac 1 dalam 2 xã camereip abih di huyện Chợ Gạo hu UBND tỉnh brei angan lac xã Palei pala bahrau saong daok kham merat padang ngak xã Palei pala bahrau paglaong di thun 2023. Ong Lê Anh Thủy, Phó Bí thư Đảng ủy, Chủ tịch UB bhap bini xã Thanh Bình daok brei thau lac: “ Đảng ủy- UB bhap bini xã Thanh Bình padang jalan patagok kinh tế di xã, caik hatai di abih lac gah pala drak saong raong glang. Peih ngak tui danak dak bruk ngak negar padang ngak palei pala bahrau, njauk lac biak abih drei kham merat. Tal urak ini, xã daok paglaong jang 19 tiêu chí piah padang ngak xã palei pala bahrau paglaong.”

Yaok thun xã jak ba jien padang ngak hu labaih 5 baoh sang anit ranam. Daok yaok kapul nyaom xã yaok thun jeng jakba hu labaih 100 triệu đồng piah daong ka đoàn viên, hội viên gaok kan kandah.

Lac bhum palei hu ilamu cách mạng hào hùng dalam mesruh metak, thun 1976 Thanh Bình hu pok brei angan Anh hùng tapon nyaom bol pan phao kraong bhap bini. Patagok ilamu nan, bruk pato pakai hatai thau anit ranam taneh ia di dom rai ranaih biak hu Đảng ủy, karja, kapul nyaom puk palei sangka, iek praong. Dom kapul nyaom bhian patahu khan, pato pakai ilamu meng rilo jalan piah ka dam dara, urang daok ranaih patui jalan khik ramik, paglaong hatai anit ranam taneh ia./.

Urang lang: M.Phuong – 30/4/2022