Labik inem mek sajarah Sài Gòn - Gia Định 

Hadei di harei peih paha, ong Võ Văn Kiệt ngak rilo bruk praong, yau ye Akaok UB bhap bini ban raya HCM, Bí thư Thành ủy TPHCM. Dalam tuk daok ngak Bí thư Thành ủy TP. Hồ Chí Minh, ong hu 2 mbang nao rivang ong Võ Văn Chung (daok ieu lac Hai Chung) sang daok di xã Lương Hòa Lạc, huyện Chợ Gạo (tỉnh Tiền Giang); dalam nan hu sa mbang ndih veik di sang urang nong ini.

Ong Võ Văn Chung tuk nan lac Akaok HTX ngak nong An Phú (xã Lương Hòa Lạc) biak hu angan je dalam bruk ngak nong, abih di nyu nan lac bruk ngak padai pajaih pabak ka mikva urang nong. Thau lac urang nong ngak mbang naih joi, ong Võ Văn Kiệt mai rivang saong alin ka ong Chung 2 drei pabui pajaih Prang. Ong Hai Chung buh jien ngak var piah raong saong pabam pajaih. Tal urak ini tapon pabui di sang ong Chung hu labaih 700 drei, dalam nan hu 200 drei pabui binai, 50 drei pabui tano, dom drei daok veik lac pabui ralaow. Langiu di bruk pablei pabui ralaow, pabui pajaih, ong Chung daok ngak bruk “gieo tinh pabui nhân tạo” ka mikva dalam bhum.

Tuk daok diuk di dunya, ong Võ Văn Kiệt nao ravang saong ngak bruk haong tỉnh Tiền Giang biak rilo mbang. Yaok mbang nao tal, ong jeng caik tukvak nao puk palei, rivang urang jakar, urang lin, duah thau raidiuk di bhap bini, anek saih. Rup binguk salut but, jaik taphia haong bhap bini ndung bak ilamo di urang Nam bộ di ong tuk halei jeng daok dalam hatai di urang jakar saong bhap bini Tiền Giang. Ong Đoàn Văn Khanh, sa urang praong thun ngak bol lin dahlau deih daok di xã Song Thuận, huyện Châu Thành, tỉnh Tiền Giang khan lac: “ Wa Sáu Dân- Võ Văn Kiệt lac sa urang oh huac trách nhiệm, oh huac kan kandah, glaih glar. Ngan haong Tiền Giang, ong lac urang biak jaik taphia, biak caik hatai sangka. Tuk nan, ong ndem lac Tiền Giang lac Đông Đô, njauk kham marat tagok, Đông Đô hu dahlau Tây Đô hu hadei. Ong sal capha trun ravang bhap bini, nao takai atau nao meng ca nô, meng gaiy mboh biak anit ranam”.

Dalam bruk mesuh haong kol Mỹ daong taneh ia, ong Võ Văn Kiệt saong dom urang jakar pakat glaong karei hu tukvak mai labik cách mạng di xã Tân Phú Tây (huyện Mỏ Cày Bắc, tỉnh Bến Tre). Dalam tukvak mesuh, ong khik talei rahim biak kajap, jumpataom haong bhap bini, gam haong mikva pak ini yam tapa dom thun bilan mesruh metak biak kan kandah.

Hadei di tuk taneh ia sron mbon, ong Võ Văn Kiệt hu rilo mbang mai labik mesuh meng kan, rivang veik mikva dahlau daih raong pacang drei saong hu daong ka mikva katung đien mai pandar di bhum căn cứ cách mạng dahlau daih. Ong Trần Công Ngữ, dahlau daih ngak phó akaok UBND tỉnh Bến Tre khan lac: “ Xã Tân Phú Tây  hu ong Võ Văn Kiệt brei 500 triệu đồng ba jalan dien mai tal palei, lac bruk biak hu yaom glaong. Bhap bini chreih chrai, uan tabuan lo, meng gom manyek salih tapa gom dien lac sa bruk salih bahrau biak praong oh saneng tal hu. Dahlak mboh lac mbang camriep  sa xã bhum căn cứ cách mạng bo hu điện,  bhap bini biak uan tabuan. Kol dahlak daok kuhria ngak sa inem mek sajarah Sài Gòn- Gia Định di pak nan. Urak ini, labik ini jeng hu tuai mai rivang iek lac sa labik bhong”.

Bruk salut but, siam hatung hatain, jaik taphia haong rahra,  nao rahra uan, daok rahra anit di ong Võ Văn Kiệt tuk halei jeng lac thaot binguk siam mekre caik veik dalam hatai di yaok urang Việt ka sa urang lin cộng sản, urang par akaok gheih ghang, siam hatung hatai saong lac kreih camin hadah kan var hu./.

Urang lang: Thu Thao – 21/10