Urak ini bhum tái định cư Phan Lâm, Phan Sơn huyện Bắc Bình, tỉnh Bình Thuận hu 2 sang bac, lac sang bac mẫu giáo Sơn Lâm, sang bac tiểu học saong trung học cơ sở Sơn Lâm. Dom sang bac di bhum glaong Sơn Lâm jeng hu padang ngak siam mekre, hu ginup dom bilik bac saong hu pabak jaik ginup abih dom pandap panda ka bruk pato pakai. Min ngan saong dom gru pato jeng daok gaok rilo kan kandah. Di sang bac mẫu giáo Sơn Lâm, anek bhik urang bangsa hu dom cei gru, anai gru sangka iek glang tani tanat abih gah. Bruk buh prein di dom gru pato oh ndom hu abih meng panuac, tok hu mboh di anak mata meng thau hu abih dom glaih glar ka bruk pala menuac di dom bhum ceik glaong bak rambah rambup ini. Anai gru Thổ Thị Mỹ Tháp, Phaok Hiệu trưởng sang bac Mẫu giáo Sơn Lâm brei thau: “ Gru pato di sang bac rilo meng lac dom gru di bhum gah ala tagok ini pato rilo thun paje, kan kandah abih jeng lac oh ka hu sang công vụ brei ka gru daok. Meng tuk ba labik pato mai pataom sa labik tal urak ini, gru pato biak rilo, tal bac dak harei dak peih praong tabiak, sang công vụ oh hu min kham merat maong 7 lac hu mbaok piah taduan raok uranaih, hadei di nan taom gaok amaik ame di anek saih piah brei thau abih janih, abih bruk, 3 thun cakak klaak chế độ bo gru pato jeng daok tagok ini haong abih hatung hatian.

Anai gru Đồng Thị Hoàng Oanh thun ini hu labaih 20 thun pato di sang bac bhum glaong ini. Sang daok di xã Phan Hiệp, atah di bhum glaong ini dom pluh mbaik jalan, min anai jeng daok nao mai dalam harei, kayua sang bac oh hu labik daok ka gru pato. Glaih glar yau nan, min meng hatai anit bruk, ranam uranaih, anai kham merat kak kajap haong tal bac meng di tuk camereip bak kan kandah. Anai gru Đồng Thị Hoàng Oanh khan lac: “Maong 6 tagok nao, mong 4 meteh biar harei mai veik, bilan hajan nao mai biak rambah. Hu sa labik jalan nhựa, jalan atah, khut mbaih mbaoh, nao sa maong meng tal labik pato, biar harei mai tal sang mong 5 meteh atau maong 6, nan oh ka ndom tal hu tuk radaih khut. Min gru pato yau urang amaik, anit bruk ngak drei meng  ranam uranaih, meyah oh anit bruk ngak ye oh ranam uranaih.”

Meng harei dua xã bhum glaong Phan Sơn, Phan Lâm oh daok dalam angan dom xã bhum glaong biak kan kandah di huyện Bắc Bình, bruk phụ cấp brei ka gru pato njauk cakak trun rilo duk haong dahlau daih. Jien mek tame njauk cakak trun rilo, ngak kan kandah tal raidiuk di dom gru pato bac di bhum glaong Sơn Lâm. Nan ye, caong khin di dom gru pato urak ini lac hu bruk sangka rilo jang di dom pakat, dom gah daong ka gru saong saih bhum glaong sahnang hatai nao pato, nao bac.

Bruk pato bac di bhum glaong biak glaih glar, abih di nyu lac bruk nao mai,… kan kandah tra lac rilo bhap bini di bhum glaong takik sangka tal bruk bac ta-a di anek bhik di drei, nan ye gru pato gam lac gru gam lac amaik pato pakai, pachreih ba dom adei dalam luac tukvak bac ta-a. Yau nan min, dom gru pato di bhum glaong Sơn Lâm jeng daok abih hatung hatian, anit sang bac, ranam tal bac, abih drei haong bruk pala menuac, abih drei ka anek saih. Gru Mai Oanh, hiệu trưởng sang bac Tiểu học saong THCS Sơn Lâm brei thau: “Gru pato nao labaih 45 km piah tal sang bac piah pato bac, kan kandah tra lac dom thun jaik di ini gru pato oh daok hu mbang jien phụ cấp pato di dom bhum bangsa, kayua palei tabiak truh angan biak kan kandah. Yaom jien bilan di gru pato jeng trun rilo, langiu di nan daok abih rilo jien sahui nao mai, nan ye gru pato biak kan piah sahnang hatai ngak bruk di sang bac.”

Yau nan min, yam tagok mangaok dom kan kandah nan lac hatai anit ranam di gru pato brei ka anek saih, nan lac dom uranaih caong thau akhar haroh di bhum glaong. Nan lac hatai caong khin sit sot, daong ka dom adei hu bac ta-a, harei hadei tabiak truh kan kathaot, eik lipa. Dom gru pato labik ini, lac dom menuac daok daong ka dom adei peih ngak hu dom caong khin nan, piah ka harei hadei di dom adei sit ini, hu hadah hadai jang, meda rik daong prein yava dak padang saong patagok puk palei di drei hu kaya meda jang, siam mekre jang./.