Di xã Snay Anhchit, huyện ChumKiri, tỉnh Kampot, negar Campuchia, bol bhap rahra diukrai pagam pambak tame bruk ngak nong, daok atah di pasak nan ye bruk ngak mbang, ngak huak saong bruk iek glang prein yava hu takik saong gaok rilo kan kandah, kurang rilo janih. Amuk Chanol mboh bộ đội Việt Nam mai iek ruak, brei jru ka amuk saong bhap bini pak ini, amuk biak drut drui: “Rup dahlak ruak biak rilo min oh hu jien taong ruak, urak ini tuk mehit hu kapul bác sĩ di Bộ Chỉ huy Quân sự tỉnh Kiên Giang mai iek ruak saong brei jru, brei pandap ka mikva labik ini, dahlak bui sambai lo. Tuk iek ruak bloh nao sang, dahlak khan veik brei mikva, puk paga thau piah mai ini iek ruak”.

Tapa ngak bruk, kapul gaok rilo kan kandah kayua langik oh lagaih, radaih nao mai oh hu, karei gauk panuac ndom biai, min anak dom kan kandah rambah rambup di mikva taneh ia ayut, yaok urang dalam kapul pachreih ba gauk kham merat yam tapa kan kandah piah ngak siam bruk. Bác sĩ Trần Thu Quỳnh, sang iek ruak Đa khoa Kiên Giang, brei thau: “Yaom lac daok rilo kan kandah dalam bruk nao mai, jru tavao saong pandap panda jamriak iek ruak, min tapa ini dahlak mboh bruk y tế di mikva labik ini daok gaok rilo kan kandah, dahlak lac bác sĩ haong dom adei sa-ai urang y tế dalam kapul kham merat abih drei piah daong gah y tế ka mikva labik ini, rik daong patrun naong trak ka  y tế pak ini.

Di labik ini, kapul y, bác sĩ Bộ Chỉ huy quân sự tỉnh Kiên Giang hu iek ruak saong brei labaih 300 pok jru ka urang jakar saong bhap bini daok pak ini, yaok pok yaom 100.000 đồng. Gam haong nan, kapul jeng hu brei 60 pok pandap ka dom sang kan kandah, yaok pok yaom 500.000 đồng. Bruk ngak ini hu caik veik rilo hatai sahneng siam ngan saong karja pak ini haong mikva taneh ia ayut ka urang lin, ka bộ đội Việt Nam dalam zaman sron mbon.

Meng thun 2015 tal ini, Bộ Chỉ huy quân sự tỉnh Kiên Giang hu padang 6 kapul iek ruak saong brei labaih 3.500 pok jru ka bhap bini di rilo xã, huyện daok gaok rilo kan kandah di Campuchia haong yaom jien labaih 400 triệu đồng. Yaok panuac tangi sua tamuh tabiak meng hatung hatian, yaok pok jru, yaok pok pandap hu alin hadiah brei, lac talei rohim anit ranam pakhang pakajap jang bruk jum pataom di bol bala saong bhap bini dua taneh ia. Đại tá Tếp Âm, Chỉ huy phó tiểu khu Quân sự Kampot brei thau: “Hu pakat angaok brei bruk ka dahlak pambuak bruk haong kapul y bác sĩ halan hatian Kiên Giang mai iek ruak, brei jru saong alin hadiah pandap. Tapa ngak bruk haong kapul di tỉnh, Kapul chuyên trách K92, kapul hu mai iek ruak brei jru dalam xã Snay Anh Chít. Dahlak pok meyaom, uan tabuan saong thau dhar phor kapul y bác sỹ di tỉnh Kiên Giang biak rilo”.

Bruk padang kapul y, bác sĩ mai iek ruak saong brei jru ka mikva xã Snay Anhchit lac bruk ngak biak hu makna di tapon nyaom bol pan phao kraong tỉnh Kiên Giang, rik daong haong karja palei di taneh ia ayut iek glang raidiuk bhap bini. Tapa nan jeng hu daong ka kapul K92 urak ini daok duah, pataom mek talang liệt sĩ urang lin halan hatian saong chuyên gia Việt Nam ndih trun di mblang mesruh Campuhia ngak hu siam bruk hu jao brei, ba ayut, sahabat metai lahik nan mai veik haong taneh ia. Ini jeng lac tuk piah kak kajap jang talei jum pataom, khik pakhang saong patagok jang talei rohim jum pataom di Việt Nam haong Campuchia./.