Mai bhum taneh Hậu Giang meda mboh lac, rilo labik du lịch chreih chrai hu tamuh tabiak meng adat cambat, jalan ndiuk rai di rahra bhum kraong ia miền Tây, mai tal kraong Ngã Bảy dalam kadha daoh tân cổ hu angan lac “Ghe chiếu Cà Mau” danei angan grauk labik, gam haong dom ilamo hadah krah di kraong Xà No – lac jalan padai brah saong dom bein phun bak baoh ngak jeng angan je ka Hậu Giang. 

Atau mai tal huyện Long Mỹ labik hu urang Khmer daok rilo abih di tinh, tuai damuai hu gam haong mikva mbang dom pandap mbang di palei yau ye baoh ma-mbat, tame dom phum sóc hu mbaok tame ngak bruk haong mikva, hu mboh dom baoh paha ndung mbak ilamo di urang Khmer hadah tagok di kreih phum sóc; Mai tal bhum manaih Cầu Đúc, bhum pala pa-aok cuah Hòa Lộc, huyện Châu Thành A, tal ban sit Long Mỹ, piah paik dom baoh quýt đường Long Trị, palei hala di huyện Vị Thủy.  

Amuk Nguyễn Thị Lý - Phó Yam ndok Sở Ilamo - Thể thao saong Du lịch tỉnh Hậu Giang brei thau lac, tinh daok padang ngak iek Danak dak cak rok patagok du lịch rahra di dalam tỉnh tal thun 2025, piah ngak habar dalam tukvak anak tal, padang hu pandap du lịch rahra biak siam lagaih, ndung bak ilamo karei. Gam haong nan, tapa bruk pambuak dom mạng xã hội, yaih khan tal tuai damuai dom pandap daok hu tui bilan, piah ka tuai mai tal Hậu Giang tuk halei jeng mboh lac hu taduan raok, iek praong. 

Hậu Giang hu langik tasik la-an bingi, gheih mekre, rilo janih pandap mbang saong rilo janih ilamo, pambuak haong du lich puk palei. Taphia di nan, dom yaom glaong ilamo yau ye rija roya, ilamo parang me-in, adat cambat tanarakun, bruk ngak meng tangin takai meng kan mai, ilamo dom bangsa biak hadah krah… Ini lac jalan lagaih piah cak rok patagok pandap du lịch pambuak pagam haong rahra, dui pachreih tuai damuai.

Hậu Giang hu labaih 25 labik du lịch, rilo bruk patagok hu kein laba, dui pachreih hu rilo tuai damuai, hu daong ka bhum ngak nong hu prein veik, trun dom tệ nạn xã hội, raidiuk hu siam makre jang.

Danak dak yaok xa sa pandap (OCOP) mek hu jien tame biak rilo saong hu jeng dom pandap hadaih angan je di tỉnh. Gam haong nan, rilo danak dak padang bruk ngak mbang meng du lich ngak nong tuk camriep hu jeng chuỗi pambuak gauk, njauk ndem di abih lac Danak dak peih ngak du lich ngak nong mek hu tanut chuan OCOP di huyện Châu Thành A. Ini lac bruk padang mbang ngui di dom adei saai kumei, meng bruk cak rok pataok bein baoh kayau jeng labik du lịch, meng pandar bein phun hu blaoh haong rilo janih phun pala brei baoh luac thun… pambuak haong raong ikan, pala njam phlựt (bông súng) piah ngak jeng labik gheih mekre. Tapa nan, gam daong ka tuai damuai hu thau dom pandap mbang di bhum palei.

Po ngak du lich hijao, daok di puk Xẻo Cao, xã Thạnh Xuân, huyện Châu Thành A, saai Phạm Thị Cẩm Dân khan lac: Du lịch rahra urak ini daok hu takre, kayua raidiuk bahrau, rahra urak ini takik hu ba drei tame haong langik tasik di bhum palei pala. Nan ye, bruk rivang iek bein phun mbang baoh, gam paik njam, vah ikan, ngak dom pandap mbang di palei saong ba drei tame raidiuk di mikva urang nong tuk halei jeng dui pachreih hu rilo tuai damuai hu mbaok tame. 

Pandap du lịch tui jalan hacih, siam haong alam moi truong, salamat ka prein yava di urang pandar saong yaom kaom mbiah lagaih meda peih tabiak sa jalan nao bahrau ka bhum kraong ribaong Hậu Giang dalam tukvak anak tal.

Ong Trần Việt Phường – Akaok Kapul Du lịch ĐBSCL brei thau lac, cak rok pataok du lịch rahra pambak tame kaya nong, puk palei, yaom glaong di mbaok mata puk palei, dom yaom glaong ilamo oh maong mboh, yau ye rija roya, ilamo parang me-in bhap bini, bruk ngak meng tangin, ilamo dom bangsa yau di  tỉnh Hậu Giang urak ini, lac hu bruk karei gauk di dom tỉnh dalam bhum. Njauk mayai nan lac bruk pambuak salih số ka du lịch rahra, tapa bruk salih so di gah Ngak nong saong gah Du lịch./.