Dalam huyện hu jaik 1.020 bruk ngak nong ba jien mek tame meng 50-500 triệu đồng sa thun

Phụng Hiệp lac bhum taneh dhaong abih di tỉnh Hậu Giang. Kak kajap haong phun padai, phun tabau rilo thun min jien mek tame oh tani tanat nan ye atah di ini dom thun, ong Lê Văn Sáu daok di palei Tân Thành, xã Tân Bình salih tapa pala phun durian Ri 6. Meng 5.000m2 tuk camereip, tal urak ini ong Sáu cak rok bein phun durian tagok labaih 5ha, dalam nan hu meteh mblang taneh pala daok tabiak mboh. Dua thun tapa, yaok thun bein durian di ong Sáu hu labaih 90 tấn baoh saong hu urang mai tal bein piah blei ngan haong yaom tani tanat lac 50 rabau đồng sa kg. hadei di tuk kaoh abih jien buh tame, ong Sáu mek tame hu jaik 3 tỷ đồng. “Pilih ruah phun durian ye mai peih bruk ngak mbang meng pala phun durian. Bruk pala phun durian biak hu kein laba. Urak ini, dalam palei Tân Thành, xã Tân Bình hu labaih 40% mikva pala phun durian.”

Dom thun tapa, yaok thun huyện Phụng Hiệp salih meng 500- 600ha taneh pala phun tabau, taneh pala takik hu laba tapa pala dom janih phun karei hu yaom glaong. Kuhria meng thun 2017 tal urak ini, dalam huyện hu labaih 2.600ha taneh pala hu salih janih phun, rik daong paglaong mblang taneh pala phun mbang baoh di dalam huyện meng labaih 8.000ha di thun 2017 tagok tal labaih 10.600ha di akaok thun ini. Hadei di tuk salih janih phun pala, tuk camriep rilo janih phun pala lagaih haong taneh riya di pak ini nan ye brei năng suất glaong, gam haong nan tuk paik baoh hu blei veik abih haong yaom tani tanat, nan ye sang bein di pak ini biak chrieh chrai, uan tabuan. Amuk Trần Thị Quyên, sang bein pala baoh menaih MD2 di xã Phương Bình, huyện Phụng Hiệp brei thau:“Năng suất pala di pak ini mboh hu siam. Tui kuhria sa công, sa thun hu yaok ppluh tấn. 5 ribau 700 đồng sa kg yaom pablei abih, oh kuhria baoh sit atau praong”..

Tui yaok pataom di gah ngak nong huyện, dalam abih tih labaih 2.600ha taneh salih tapa pala dom janih phun karei, tal urak ini hu labaih 80% mblang taneh hu laba glaong jang meng 2-3 mbang dut saong dahlau dieh. Urak ini, dalam huyện hu jaik 1.020 bruk ngak nong ba jien mek tame meng 50-500 triệu đồng sa thun. Dalam nan hu jaik 109 bruk ngak tui jalan công nghệ glaong, ngak tui jalan VietGap, Globap Gap ngan haong jien mek tame meng 100 triệu đồng tal labaih 3 tỷ đồng yaok thun.

Tui taong yaom rah tapa, yaom lac bruk salih phun pala di huyện Phụng Hiệp dalam tukvak tapa rah tabiak samar min bhap bini jeng daok ngak njauk tui bruk quy hoạch di huyện, meng nan pilih ruah phun pala ka nyu lagaih haong taneh riya saong langik tasik di yaok bhum. Ini jeng lac sa dalam dom jalan lagaih piah ka huyện peih ngak dom sarak ka bruk cak rok patagok gah ngak nong pambuak haong du lịch. Ong Trần Văn Tuấn, akaok jabat ngak nong saong patagok palei pala huyện Phụng Hiệp brei thau:“Dom bruk salih janih phun pala pandar ilamo, công nghệ glaong, pandar khak vi sinh hữu cơ lagaih haong mikva. Mikva kan kathaot jeng meda pandar hu dom bruk ngak sit, mikva kaya meda  ye pandar bruk ngak praong jang. Dalam tukvak tapa dom bruk ngak ini cak rok patagok biak glaong saong hu bhap bini pachrieh tui, abih drei hu mbaok tame. Tapa pasang iek ye hu rilo bruk hu labik pablei siam”.

Meng siam lagaih, kein laba di bruk salih janih phun pala ba mai, huyện Phụng Hiệp hu paglaong yaom bruk pala drak di mangaok 1 ha taneh ngak nong di huyện hu jaik 134 triệu đồng sa thun, kein laba kuhria rah tapa lac 50 triệu đồng sa thun, meng nan rik daong patrun baoh sang kan kathaot di huyen daok labaih 4,5%./.

Urang lang: Thu Thao – 29/03