Thanh long di dom urang dalam HTX tuk halei jeng hu blei yaom mangaok 10.000 đồng/kg

  Di bhum pala thanh long huyện Châu Thành (Long An), thei jeng thau tal Hợp tác xã (HTX) thanh long Tầm Vu, lac sa dalam dom HTX ngak mbang hu kein laba. Ong Trương Quang An, Yam ndoc HTX thanh long Tầm Vu hadar viek: “meng bruk urang nong pala sit sot, keinj laba takik.. nan ye di thun 2008 khol dahlak hu jak ba dom baoh sang pala thanh long dalam bhum pambuak gauk veik, rik phun jien padang HTX Thanh long Tầm Vu. Dahlak likau hu mbaok tame dom tal pasram ngak saong halain hatain tapa Đức bac megru ilamu padang ngak, bruk ngak di HTX…”. 

HTX tuk camriep bahrau hu 13 urang ngan haong mblang taneh praong labaih 13ha, phun jien điều lệ 250 triệu đồng; tal urak ini hu labaih 70 urang ngan haong mblang taneh  praong labaih 90ha, phun jien hu tagok tal 4 tỷ đồng, gam haong dom drap ar karei labaih 7 tỷ đồng. Jaik abih taneh pala thanh long di HTX jeng tui tanut chuan VietGAP, GlobalGAP; pandar công nghệ glaong tame bruk pala, ngak. HTX daok ba bruk ngak yaok harei ka labaih 140 urang ngak dalam palei, ngan haong jien mek tame meng 7 tal 8 triệu đồng sa urang sa bilan. HTX hu buh jien padang ngak sang kho praong labaih 5.500m2 piah chế biến, tame paok thanh long pablei tabiak negar langiu; padang kho laar khik piah thanh long 500 tấn. Yaok thun, yaok ribau tấn thanh long hu pablei tapa rilo negar di dunya, dalam nan hu mateh pablei tapa Trung Quốc, daok viek hu pablei tapa Hoa Kỳ, châu Âu, Nhật Bản, Thái Lan, Singapore, Ấn Độ, Các tiểu Vương quốc Ả Rập Thống Nhất… Meng nan bo jien mek tame di HTX thun hadei tuk halei jeng glaong jang thun dahlau.

Ong An brei thau, labaih 1 thun tapa, tuk darak pasa blei thanh long praong abih di Việt Nam lac Trung Quốc gaok kan kandah kayua pambuak tal jit ruak Covid-19, ngak ka urang pala thanh long having akaok, ye dom urang dalam HTX Thanh long Tầm Vu jeng daok ngak mbang hu laba. Rilo labik thanh long njauk pablei yaom dom ribau dong sa kg, urang pala khat trak. Dalam tuk HTX Tầm Vu, thanh long di dom urang dalam HTX tuk halei jeng hu blei yaom mangaok 10.000 đồng/kg, khik ka urang pala hu laba.

Tui ong Đỗ Quốc Trịnh, akaok Kapul Thanh long tỉnh Long An, oh lac HTX thanh long Tầm Vu, dom HTX thanh long karei di Long An jeng daok dang hu khang kajap anak dom kan kandah di anak meta meng darak pasa Trung Quốc. Makna lac, tuk hu mbaok tame HTX ye urang nong hu pandap piah ngak haong yaom lagaih saong hu labik pablei tani tanat; saong daok trun hu rilo jien buh tame dalam tuk pala, tagok hu chất lượng pandap panda saong tagok prein mariak gauk.  

Di huyện Chợ Gạo jaik taphia nan, labik hu mblang taneh pala thanh long praong abih di tỉnh Tiền Giang, bruk ngak mbang di HTX Mỹ Tịnh An jeng siam lagaih oh lah hagait. Yam ndoc HTX Võ Chí Thiện brei thau: “HTX hu padang tagok meng thun 2009, tal urak ini hu 250 urang, ngan haong mblang taneh praong 300ha. Thanh long di HTX hu ngak tui jalan GlobalGAP mek hu tanut chuan pablei tapa châu Âu, Hoa Kỳ, Úc... Thun 2021, dalam tuk urang pala thanh long daok having akaok kayua gaok kan kandah di darak pasa Trung Quốc, ye HTX jeng daok hu tani tanat  haong jien mek tame 50 tỷ đồng, HTX daok laba 1 tỷ 8 rituh trieu đồng; jien mek tame di yaok urang dalam HTX meng 300 - 400 triệu yaok thun”.

Ong Thiện brei thau, HTX meng lavik mai oh daok pagam pambak tame darak pasa Trung Quốc, bo hu rilo darak pasa, paglaong chất lượng kaya nong, pablei tapa rilo taneh ia, yau ye: Hoa Kỳ, Hà Lan, Đức, Italy, Bỉ, Na Uy, Thụy Sĩ… Piah ka urang dalam HTX hu sanang hatai, HTX mbaoh tangin tame harak pambuak bruk blei veik abih pandap panda ngan haong yaom blei di bein lac 10.000 đồng/kg, khik ka urang nong hu laba; tuk yaom di darak pasa glaong jang yaom sanya blei, HTX meda blei glaong jang yaom darak pasa takik di abih lac 1.000 đồng/kg.

Dalam mbang ngak bruk di tỉnh Tiền Giang meng blaoh, Akaok negar Nguyễn Xuân Phúc hu nao rivang HTX thanh long Mỹ Tịnh An. Akaok negar taong yaom glaong bruk ngak mbang, pablei salih hu kein laba, peih bruk pambuak gauk ngak mbang siam lagaih di HTX Mỹ Tịnh An. Abih di nyu nan lac pandap ngak tabiak  haong công nghệ bahrau, khik kajap chất lượng, pamaong tal bruk pablei tabiak rilo darak pasa kan tame hu tui jalan chính ngạch. Akaok negar hu ieu kakei HTX Mỹ Tịnh An patui jalan jhul khang bruk pambuak gauk, peih praong bruk ngak mbang../.

Urang lang: Thu Thao – 25/04