Meng danak daong cak rok patagok bruk ngak mbang di Danak dak bruk ngak negar patrun kathaot khang kajap thun 2023,  sang amuk Phú Thị Chi daok di palei Hamu Craok, ban sit Phước Dân, huyện Ninh Phước biak uan tabuan tuk hu kanja daong brei 2 drei limo pajaih. Hadei di tuk taduan hu limo, sang amuk Chi hu urang jakar pachreih nong mai tal sang pato tacei jalan raong, pandap mbang ka limo, jalan ngak var raong piah ka limo praong tagok, manek siam. “Sang danak lac sang kan kathaot, nan ye kan kandah lo. Kanja daong brei 2 drei limo hu 2 bilan ini mai paje…”

Pasang likei njauk bala, sang lac sang kan lathaot, nan ye amuk Đàng Thị Cư  biak kan kandah. Atah di ini 2 adit, amuk Cư biak uan tabuan tuk hu kanja daong brei 2 drei limo pajaih. “Dahlak lac sang kan kathaot, kanja blei limo yau nan, drei biak uan tabuan…”

Ban sit Phước Dân, huyện Ninh Phước urak ini daok 380 baoh sang kan kathaot, meblah 4,76%. Piahka rahra pak ini hu bruk mbang ngui, duah jien saong patrun kan kathaot khang kajap, ban sit Phước Dân hu daong ka 52 baoh sang kan kathaot, yaok baoh sang 2 drei limo pajaih. Amuk aĐàng Sinh Ái Chi, Phó akaok UBND ban sit Phước Dân, huyện Ninh Phước brei thau: “Piah sang kan kathaot hu pambuak haong danak dak ye bhum palei jeng ba tabiak jalan ngak dahlau di abih lac nao pasang iek, taong yaom bruk di yaok baoh sang kan kathaot…”

Tui ong Nguyễn Hữu Đức, Phó akaok UBND huyện Ninh PHước, kuhria tal akaok thun 2023, huyện Ninh Phước daok 1.418 sang kan kathaot, meblah 3,48% dom baoh sang dalam ban. Piah daong ka rahra tabiak truh kan kathaot khang kajap, huyện Ninh Phước jhul khang bruk peih ngak, peih praong dom bruk pambuak gauk ngak mbang tui chuỗi giá trị, ba mai kein laba kinh te glaong, dak harei dak patagok jien mek tame, pasiam veik raidiuk ka bhap bini: “Piah ngak hu bruk patrun kathaot, rik daong padang ngak huyện palei pala bahrau, meng blaoh huyện ủy, UBND huyện hu tacei pato khang, brei pataom dom prein khang tame dalam danak dak padang ngak palei pala bahrau, danak dak patrun kathaot. Urak ini, kol dahlak hu parabha dom phun jien trun ka dom puk palei, ngak habar pataom tame daong ka mikva kan kathaot, jaik si kan kathaot, rik daong patrun kan kathaot khang kajap di dalam huyện Ninh Phước anak tal.”

Meng hu peih ngak samu gauk dom jalan ngak, tal puac thun 2022, jien mek tame kuhria rah tapa tui akaok menuac di huyện Ninh Phước mek hu jaik 65 triệu đồng sa thun. Dom baoh sang kan kathaot di huyện  trun daok 3,48%. Abih di nyu nan lac, dom baoh sang kan kathaot di dom xa bhum mikva bangsa Cam trun daok meng  1 - 2% dut saong dom baoh sang kan kathaot di dalam huyện. Urak ini, langiu di jhul khang bruk peh jien  brei mesraiy daong ka rahra, huyện Ninh Phước daok jhul khang bruk peih ngak dom jalan ngak mbang, duah jien piah dak harei dak paglaong jien mek tame, daong ka mikva tabiak truh kathaot khang kajap./.