Mblang hamu palei Như Bình, xã Phước Thái, huyện Ninh Phước lac labik hu palih ruah piah ngak iek bruk ngak padai tui jalan VietGap. Dalam vụ ini, xã Phước Thái ngak iek labaih 15ha, hu 20 baoh sang pataom mbaok tame. Ong Nại Thành Nhàn, Xã Phước Thái, huyện Ninh Phước brei thau:“Ngak padai tui VietGap, mikva khaol dahlak oh pruh jru halak piah hadei ini pablei hu yaom jang.”

Meng rilo thun hu ilamu haong bruk ngak padai, dom urang nong yau  ong Đổng Bin mboh lac, ngak padai aia tui chuẩn VietGap oh lac tok ngak patrun hu phun jien buh tame ngak bo daok patrun bruk pandar jru pacang caga phun pala, rik daong khik caga alam môi trường saong khik siam pren yava ka urang hu mbaok ngak tapak. Ong Đổng Bin, Xã Phước Thái, duk bruk ngak padai tui chuẩn VietGap haong jalan ngak meng kan daih, yau ini: “ngak padai tui mô hình VietGap anak meta nan lac patrun phun jien buh tame ngak ka mikva. Meng nan, nagvom dahlak hu mbaok tame danak dak VietGap, ngak piah ka hu asal padai hacih pablei tabiak darak pasar, yaom pablei tabiak glaong jang.”

Piah daong ka urang nong ngak hu kein laba, HTX Ngak nong Như Bình hu parabha bruk ngak cambaih laih ka tổ pala, ngak, tổ ilamu kỹ thuật, tổ pasang iek. HTX dang tabiak peih ngak, daong ka urang nong saong pasang iek catang bruk ngak, nan ye bruk peih ngak tuk akaok mereip mboh hu rilo mbuan laghaih. Ong Quảng Đại Luyến, Akaok HTX Ngak nong Như Bình, xã Phước Thái brei thau:“Peih ngak tui danak dak VietGap kasa nan lac patrun hu phun jien buh tame ngak brei ka mikva, patrun hu mbang pruh jru, patrun khak hóa học, patagok kein laba brei ka mikva. Taphia di nan, sa binah ngak patrun bruk pambak tal alam môi trường, khik siam pren yava ka mikva.”

Hadei di tuk ngak iek bruk ngak padai tui chuẩn VietGAP, huyện Ninh Phước meda ngak harak gar tut angani mã số labik pala ka asal padai saong padang angan je brah Phước Thái. UBND xã Phước Thái jeng daok ngak harak gar piah ba asar brah hu mbaok tame dak hạng, piah hu brei angan lac pandap OCOP dalam thun 2023. Ong Nguyễn Hữu Đức, Phaok akaok UBND huyện Ninh Phước ndom lac:“Urak ini, bruk  blei brah hacih, padai angaok darak pasar lac biak prong. UBND huyện Ninh Phước daok tacei pato dom xã, gam haong dom xã viên pacang labikg piah ngak tui jalan hacih. Dalam nan, hu ngak tabiak tui chuẩn VietGap, pamaong tal ngak tabiak pandap panda hữu cơ dalam huyện Ninh Phước. Khaol dahlak daok ngak iek, meyah ngak siam ye pambak prong tabiak. 

Hadei di vụ Hè-thu thun 2023 ini, huyện Ninh Phước meda pambuak bruk haong dom doanh nghiệp piah ba pajaih padai Đài Thơm 8 tame ngak angaok mblang taneh jaik 100ha, peih tabiak jalan pala ngak samu gauk, daong ka urang nong paglaong jien mek tame meng bruk ngak padai. Bruk ngak padai tui chuẩn VietGAP lac jalan ngak piah ka urang nong huyện Ninh Phước paglaong chất lượng padai brah, pamaong tal bruk pablei tabiak negar langiu./.