Sang sa-ai Hà Thị Eng daok di palei 5, xa Cư Kbang, huyen Ea Súp, tinh Dak Lak hu 6 urang, min tapi tok sa ta-eng sa-ai nao ngak duah jien rilo abih di dalam sang. Taneh ngak mbang takik, jien hu mai meng ngak pah yaok harei oh ginup piah raong 3 anek sit, amaik pasang umur taha saong pasang bhian ruak hakik. Thun 2023, mai meng hu jien daong labaih 35 trieu ndong di Danak dak pakat Negar brei patrun kathaot karo, sa-ai hu blei 4 drei limo binai ine mai raong. Tal ini, tapol limo menek hu 6 drei la oi. Sa-ai Hà Thị Eng mboh jie tame bruk hadah hadai raidiuk dalam harei hadei:

“Sang danaok oh hu hagait, taneh riya hu 5-6 sào ngak padai ye jeng hu tok 50-60 mbao min. Baoh sang hulin dahlak hu daong limo raong, hu karja palei sangka saong hu pato pakai piah raong limo. Tukvak masa mai tal hulin dahlak kham merat piah baoh sang hu truh kathaot.”

Cư Kbang sa baoh xa bhum III biak kan kandah di huyen Ea Súp, dalam huyen hu rilo urang bangsa takik, baoh sang kathaot ralo jaik 58%. Ong Cao Thanh Hoài, Phaok Bi thu Ndang uy xa Cư Kbang, brei thau, piah ngak bruk patrun kathaot karo, xa hu peih ngak samu gauk dom jalan cara langyah brei ka bruk patagok kinh te – xa hoi. Dalam nan hu ngak 3 danak dak pakat Negar hu dom salih bahrau siam mekre, daong ngak salih bahrau raidiuk di bhap bini rahra:

“Bruk ba buh akaok tame ka co so ha tang ka bruk daong patagok bruk raong glang ka mikva, dalam nan hu danak dak daong anek limo raong brei ka mikva hu njauk hatai mikva biak rilo. Tapa 1 thun pasang iek jeng yau phun prein jien hu peih ngak biak siam. Dom baoh sang kathaot yaok thun hu trun meng 5-7%."

Dalam huyen tapen negar Ea Súp, dom thun blaoh tapa, pakat uy, karja palei peih ngak hu siam lagaih dom jalan, sarak di Ndang, Karja, ngak salih hu mboh cambaih laih dalam bruk patagok kinh te xa hoi. Mboh hadah dalam nan hu padang 56 bruk daok dang mbang ngui patagok bruk ngak mbang dalam bol bhap rahra; peih yaok pluh tal pato magru bruk ngak di bhum palei; ba urang ngak bruk nao ngak hu masa panak katut di Han Quoc; daong rahra bhap bini hu mesre phun jien labaih 121 ty dong piah ngak mbang pablei salih…; brei BHYT ka labaih 53.200 baoh sang rahra; trun jien bac atau oh mek jien bac ka yaok ribau anek saih…Ong Nguyễn Thanh Tuấn, Phaok akaok UBND huyen Ea Súp, tinh Dak Lak brei thau:

“Dahlau daih dom baoh sang kathaot dalam huyen Ea Súp biak rilo, labaih 60%. Tapa 3 thun peih ngak dom danak dak patrun kathaot khang kajap, tal ini huyen hu trun daok 42% baoh sang kathaot. Piah brei ka bruk patrun kathaot khang kajap ye Uy mban bhap bini huyen mada hu peih ngak samu 3 Danak dak pakat Negar, peih ngak rilo danak dak daong ka sang daok, taneh daok, taneh ngak mbang ka dom baoh sang mikva urang bangsa takik.”

 Huyen Ea Súp daok pataom tame bruk pathau khan paglaong ilamo, ngak pamedeih hatai truh kathaot di rahra; gam haong padang saong peih praong dom bruk ngak mbang ba mai siam lagaih ka ekonomi kinh te glaong. Langiu di nan, huyen daok patui ngak bruk jak ba rilo gah rik daong prein jien buh tame padang ngak jalan mbak ha tang pakat palei pala duh patagok kinh te xa hoi, daong patrun kathaot khang kajap./.