Di kreh bilan pandiak khang di Tây Nguyên, nao tal huyện tapen negar Ia H’Drai, tỉnh Kon Tum jeng mboh bak sambo màu hijao di kayau patau. Sa-ai Vy Thanh Tuần, daok di palei 4, xã Ia Đal hadah mbaok mata yaih khan ka sang danaok di drei. Sa-ai Tuần brei thau, meng palei Thanh Hoá tame padang mbang ngui atah di ini 14 thun haong 2 plaak tangin mbong patih, urak ini, yaok bilan diuk pasang sa-ai hu jien mek tame 15 triệu đồng meng bruk mbang pah kuah katak 8 ha cao su di nông trường. Dahlau Tết, sang pablei 3 drei lamo dalam tapon 17 drei, hu labaih 30 triệu đồng. Langiu di nan, sa-ai daok raong menuk, ada, pala phun pa-ok blait piah hu jien mek tame suai lavik. Hu tabiak truh kan kathaot khang kajap, Tết ini sang sa-ai Vy Thanh Tuần jeng yau dom sang di labik ini hu rilo bui sambai:“Thun camereip bahrau tame ini biak kan kandah. Jalan, pui, sang bac, bilai iek ruak oh hu hagait. Karja palei biak sangka tal mikva daok pak ini. Brei ka mikva dom drei pajaih: pabe, lamo, pabui piah raong. Meng nan, mikva pak ini cakrok kinh tế jang, patrun sang kan kathaot cambaih laih jang. Tết thun ini bui sambai jang, trei sir jang duk haong dom thun dahlau”.

Ong Trịnh Quốc Hoàn, Chủ tịch UBND xã Ia Đal brei thau, piah sang kan kathaot hu pabak prein, hu phun jien patagok kinh tế sang, bruk pandar siam phun jien mesraiy, danak dak bruk ngak di Rajaei piah ba jalan ngak mbang duah jien ka rahra lac pabah mbang tabiak truh kan kathaot ka sang kan kathaot:“Dom sang kurang phun jien ye UBND xã pambuak bruk haong Gilang pariak sarak karja brei mesraiy phun jien, ka sa lac ba bruk ngak, ka dua lac phun jien sang kan kathaot. Dom danak dak bruk ngak negar ye UBND xã daong dom sang phun pajaih, anek pajaih, daong limo binai, pabe, pabui. Langiu di nan, jien bilan urang ngak pak ini jeng hu tani tanat”.

Piah hu jeng labik hadah dalam bruk patrun kan kathaot di tỉnh Kon Tum, huyện Ia H’Drai patagok hu prein khang di drei saong pamedeih hu hatai caong tabiak truh kan kathaot di rahra. Meng hu yau nan, meng labaih 41% dom sang kan kathaot, hadei di 3 thun, huyện daok mala 8% dom sang kan kathaot min. Ong Võ Anh Tuấn, Chủ tịch UBND huyện tapen negar Ia H’Drai, brei thau: Karja, kapul nyaom meng huyện tal palei padang hu jak jeng rilo bruk cakrok kinh tế sang. Pagap yau raong kaya ikan mangaok danao thuỷ điện Sê San 4; raong athur, raong hươu mek takaiy meda; pala phun mbang baoh, phun công nghiệp… saong patagok hu dom kein lagaih di bhum taneh bharau.

Pak dalam thun 2024 ini, huyện kham merat patrun labaih 7% sang kan kathaot; kham merat dalam 2 thun daok veik di nhiệm kỳ Nyaom roya Đảng bộ huyện, taong abih dom xã jeng mek hu tanut chuẩn palei pala bahrau ngak hu bruk lac tal jhung thun 2025, Ia H’Drai lac huyện palei pala bahrau. Ngan saong dom sang kan kathaot bahrau, hu ba tame ngak urang ngak ka dom đơn vị, doanh nghiệp dalam palei, huyện Ia H’Drai hu dom sarak daong cambaih laih ka bhap bini piah khik kajap bruk patrun kan kathaot./.