Amuk Trần Thị Nhung cak rok patagok bruk raong pabe pablei ralaow

Akaok bilan 7/2022, 20 sang urang nong dalam xã Bàu Lâm, huyện Xuyên Mộc hu Kapul urang nong tỉnh brei masraiy 1 tỷ đồng meng Kadung jien daong ka urang nong. Yaok sang hu masaiy 50 triệu đồng piah blei pandap panda, khak drak, anek pajaih … piah cak rok patagok bruk raong pabe saong phun maraik kalu. Tui dom urang dalam kapul, hadei di jit praong COVID-19, bruk ngak mbang duah jien di urang nong gaok rilo kan kandah, kadung jien ini lac prein khang daong ka urang nong padang veik bruk ngak mbang, pala drak, raong glang

Ong Lê Văn Đức, urang nong daok di xã Bàu Lâm brei thau lac, thun 2021, maraik kalu takik baoh, njauk di tuk hu jit ruak COVID-19 nan ye kan pablei hu, ngak ka ong abih phun jien piah buh tame ka mbang hadei. Meng 50 triệu đồng masaiy di Kadung jien daong ka urang nong, khol dahlak hu jien piah blei jru, khak drak ka phun pala pglaong năng suất, chất lượng. Oh hu kadung jien ini, khol dahlak oh thau mek jien halei piah pala veik vu hadei.

Atah di ini jaik 2 bilan, sang amuk Trần Thị Nhung, daok di xã Hòa Hiệp taduan hu jien masaiy meng Kadung jien daong ka urang nong di huyện piah cak rok patagok bruk raong pabe pablei ralaow. Tui amuk Nhung, phun jien mai biak samu piah ka sang amuk blei veik anek pajaih ka mbang raong bahrau. Caong lac mbang raong ini pabe hu tani tanat, pablei hu yaom, sang patui veik peih praong bruk raong glang piah bruk ngak mbang duah jien di dalam sang hu tani tanat jang.

Tui kapul urang nong huyện Xuyên Mộc, langiu kadung jien kanja di huyện, Kapul urang nong hu caga dom kadung jien kanja di tỉnh saong dom pok jien jak ba piah daong ka urang nong dalam huyện cak rok patagok kinh tế. Tui nan, kapul hu pambuak haong Kadung jien daong ka urang nong tỉnh peih jien brei 12 danak dak ngan haong paok jien lac labaih 6,4 tỷ đồng ka 125 baoh sang, mek veik 4 danak dak tal tukvak saong brei taong yaom 3 danak dak di xã Bông Trang, xã Phước Thuận saong xã Tân Lâm. Meng kadung jien daong ka urang nong di huyện, Kapul hu brei masaiy danak dak iek glang pa-ok blait 9 baoh sang ngan haong paok jien lac 450 triệu đồng; meng kadung jien jak ba hu peih jien brei 3 danak dak ngan haong paok jien jaik 229 triệu đồng ka 9 baoh sang.

Taphia di nan, Kapul urang nong huyện Xuyên Mộc jeng hu pasang iek bruk masaiy phun jien meng Gilang paraik sarak kanja di kapul patak pataom saong brei masaiy kayua Kapul urang nong khik ramik. Tal urak ini, abih tih jien brei masaiy di dom danak dak kayua Kapul urang nong huyện Xuyên Mộc khik ramik lac labaih 227 tỷ đồng ka  5.253 sang masaiy.

Urak ini dom danak dak brei masaiy phun jien di Kadung jien dalam huyện daok ba mai siam lagaih, tagok jien mek tame, paglaong raidiuk di bhap bini, rik daong khik kajap an ninh, trật tự di puk palei saong pamaong tal bruk peih ngak hu danak dak bruk ngak negar padang ngak palei pala bahrau paglaong. Ong Dương Tấn Linh, akaok Kapul urang nong huyện Xuyên Mộc khan lac, piah patui jalan khik ramik saong patagok dom siam lagaih meng kadung jien daong ka urang nong, Kapul bhian pato pasram ka dom urang jakar khik ramik thau cambaih ilamo, patagok pasang iek bruk khik ramik saong pandar phun jien, gam tui di nan jeng pablak rilo danak dak, pambuak rilo kadung jien karei piah dak harei dak hu daong ka rilo baoh sang urang nong cak rok patagok bruk ngak mbang, duah jien, paglaong jien mek tame../.

Urang lang: Thu Thao – 12/08