Urang nong hu rai duik ginup meda 

Xã Hòa Hiệp lac sa dalam dom xã atah bayah di huyện Xuyên Mộc. Tuk ba tangin tame padang ngak palei pala bahrau ngan haong rilo kan kandah, tavak tavaiy, hạ tầng palei pala oh siam lagaih, bruk ngak mbang kinh tế pagam pambak tame bruk ngak nong… Min nan lac bruk di labaih 10 thun dahlau, urak ini, Hòa Hiệp hu cuk tagok rup blah ao bahrau ngan haong jalan mbak nao mai pambuak pagam xã ini haong xã diah, palei ini haong palei diah hu tuh nhựa, tuh bê tông hóa dalam bui sambai, bruk chreih chai hu mboh cambaih angaok mbaok di yaok bhap bani.  

Huyện Xuyên Mộc thau lac labik puac abih di danak dak padang ngak palei pala bahrau lac paglaong rai diuk di bhap bani, tuk bhap bani hu jien mek tame tani tanat ye meda ba tangin tame haong gauk piah dak padang puk palei. Meng bruk lac manuac sia di palei pala meblah labaih 90% bhap bani, taneh ngak nong meblah jaik 79% taneh riya, labaih 10 thun tapa, huyện hu padang nền móng palei pala bahrau meng bruk ba jalan ka bhap bani cak rok patagok bruk ngak mbang pala drak hu kein laba. Langiu di bruk pathram ka urang nong ilamu kỹ thuật, huyện jeng hu jak ba salih bein tạp, taneh ngak padai sa vụ, phun kam, quýt, amariak kalu takik kein laba tapa dom janih phun pala karei hu yaom kinh tế glaong yau thanh long, darang saong dom janih phun mbang baoh karei karei.   

Ong Lê Văn Tường, daok di ấp Phú Long, xã Hòa Hiệp kak kajap haong bruk pala darang dalam rilo thun tapa. Thun 2016, ong hu puk palei brei nao pasram megru bruk pala darang hacih, gam haong tacei pato dom ilamu, harak gar piah pala darang tui jalan VietGAP. Meng salih  jalan pala, 3,4ha darang daok hu pala tui tanut chuẩn hacih VietGAP, ngan haong sản lượng jaik 25-30 tấn sa vụ. Meng chất lượng siam, darak pasar tani tanat, jien mek tame kuhria rah tapa jaik 1 tỷ đồng sa thun.

Meng hu mesraiy phun jien, amuk Lý Thị Mỹ, tổ 8, xã Bưng Riềng hu caik rok patagok bruk raong pabui glai lai. Hu mesre 50 triệu đồng, amuk Lý blei anek pajaih, ramik veik van ro piah raong pabui ka siam. Taphia di nan, amuk jeng hu karja palei brei nao hu mbaok tame dom tal pato pathram  illamu raong glang. Meng dom pluh drei tuk akaok mereip, tal urak ini sang amuk hu labaih 200 drei pabui glai lai, bruk raong glang hu cak rok, mbuan laghaih, hu ba jien mek tame meng 150-200 triệu đồng sa thun.  

Taong yaom ka bruk padang ngak palei pala bahrau, amuk Lê Thị Trang Đài, Akaok UBND huyện Xuyên Mộc brei thau, jak jeng praong abih dalam 10 thun padang ngak palei pala bahrau di Xuyên Mộc nan lac jien mek tame kuhria rah tapa yaok akaok manuac tagok biak rilo. Gam haong nan lac hạ tầng, cơ sở vật chất hu pasiam, meng nan nan rai diuk mbang ngui, daok dang di bhap bani jeng tagok tui. Kuhria tal puac thun 2020, jien mek tame kuhria rah tapa tui akaok manuac labik palei pala mek hu jaik 61triệu đồng sa urang sa thun, tagok jaik 4 mbang dut haong thun 2010.

Piah hu jak jeng yau harei ini, meng hu bruk kham merat di taong abih hệ thống karja puk palei saong abih di nyu lac bruk njauk hatai, pachreih tui di bhap bani dalam bruk peih ngak dom sarak padang ngak palei pala bahrau yau alin brei taneh ngak jalan, danak dak an sinh xã hội… Tui amuk Lê Thị Trang Đài, akaok UBND huyện Xuyên Mộc: Tuk vak anak tal huyện daok kham merat piah mek hu dom tiêu chí dalam bộ tiêu chí bahrau. Sangka patagok glaong di abih dom pren khang di puk palei, pambuak pagam ka nyu lagaih phun jien dalam bhap bani saong phun jien meng dom danak dak bruk ngak negar piah cak rok patagok bruk ngak mbang pala drak, paglaong rai diuk ka bhap bani, duah urang buh jien tame ngak mbang, jak ba dom DN dalam huyện peih prong bruk ngak mbang, patagok jien mek tame ka bhap bani./.

Urang lang: Jasi -27/6