Hadei di sa tukvak suai lavik daok cang, di dom huyện Đồng Tháp Mười  di tỉnh Long An, yau: Vĩnh Hưng, Tân Hưng ia ndik daok mai. Yaok ribau bhap bini bhum ia ndik caong khin hu thuvi thuvar haong bruk ngak mbang di bilan ia ndik. Min biak mai ia ndik tal tukvak ini daok biar, kaya pandap di bilan ia ndik oh ka ralo, nan ye urang nong oh diukrai hu meng bruk ngak mbang bilan ia ndik. 

Sa-ai Nguyễn Văn Hùng, xã Vĩnh Đại, huyện Tân Hưng khan lac, tui ilamu di bhap bini bhum ia ndik ye meng bilan Pak tui saka ia bulan lac ramik caga pandap, gaiy chap mek ikan piah cang bilan Nam ia ndik tagok. Min thun ini, tal kreh bilan 7 saka ia bulan bo ia ndik daok biar, ba pandap panda tabiak taong mek iakn hadang oh hu hadom. Sa-ai Hùng gam haong rilo mikva dalm bhum salih tapa raong dom janih ikan piah diuk rai:

“ Tapa kreh bilan 7 ye bo ia ndik oh mboh hagait.  Daok raong ikan yaok thun  palao trun dom ikan pajaih ye mek tame hu labaih 2 tấn ikan rilo. Thun ini, palao do nan ikan min ia takik, kurang ikan klik pandap mbang di ikan raong, njauk blei pandap mbang  bo yaom pandap mbang ka ikan chiat jien yau nan ye oh hu ralo. Raong piah hu bruk ngak min, yaom kaom yau ini habar hu laba”.

Jeng daok cang ia ndik mai piah ngak mbang duah jien, rilo urang nong pala padai di Đồng Tháp Mười, tỉnh Long An salih meng ngak padai cao sản panak harei tapa ngak padai ia ndik lavik harei ngan haong pajaih Nàng Tây Đùm. Anak meta, mikva pala hu labaih 100 ha di palei Láng Sen, xã Vĩnh Đại, huyện Tân Hưng. Pajaih padai ini meda diuk hu dalam ia ndik glong saong dalam hamu meda raong ikan piah tagok jien mek ka urang ngak nong. Sa-ai Trương Văn Phú, Yam ndoc Hợp tác xã Vụ lúa mùa nổi Long An brei thau:

“ Dalam HTX jeng hu rilo bruk ngak mbang. Dalam nan meda pambuak bruk dulich, tapa nan pandar, pablei mesir, ikan pambu thu di mikva raong. HTX jeng daok kuhria peih praong jeng labik sinh thái piah taduan tuai mai rivang ma-in”.

Anak bruk kuhria mboh dahlau lac ia ndik mai suai saong oh yau bhian randap, karja bhum palei ia ndik hu tacei pato urang ngak nong raong pala kaya ikan hu jaln ngak lagaih, duah pandap mbang salih ka dom janih pandap mbang dalam bilan ia ndik. Langiu di nan, karja palei pachreih ba mikva salih janih phun pala di taneh ngak padai saong njam patam ka lagaih haong bruk rah tabiak, trun khat lahik kayua ia ndik biar. Ong Lê Văn U Thanh, Phó Akok jabat Ngak nong huyện Tân Hưng, tỉnh Long An brei thau:

  “ Urak ini di Tân Hưng pala ralo lac phun padai, daok bruk raong pala tukvak jaik ini ye pataom tame ngak ralo lac ikan pra bột. Jabat Ngak nong huyen hu daong mikva palih ruah dom pajaih siam hu yaom glong, tani tanat ye mikva brei pala birau duah jien tame, oh ngak mblak di gauk bo dom janih pajaih yaom biar yau dahlau diah”.

Luac 5 thun tapa, thun halei  urang ngak nong di Đồng Tháp Mười, Long An saong Tây Nam bộ jeng maong kaok ia ndik mai. Ia ndik oh glong jeng hu makna lac kaya ikan takik nao, kan kandah tal bruk ngak mbang di mikva bhum kraong ribaong. Tui kuhria mboh dahlau ye thun ini ia ndik meda mai min kan thau lac tuk halei, oh yau bhain randap saong urang ngak nong daok ngak randap haong bruk birau gam daok maong akok ia ndik tagok./.

Urang lang: Ai Nghiem -29/8/2022