Di Ban Buôn Ma Thuột, kaphe jeng sa janih ilamo talei pambuak manuac urang. Sa-ai kamei Phạm Thị Thanh Nga, sa urang daok di ban Buôn Ma Thuột, tinh Dak Lak brei thau, bol urang di ini menyum kaphe piah srap gap ka harei bahrau.

 “Tui urang bhap bini di ban Buôn Ma Thuột ye kaphe ieu lac sa janih menyum oh kurang hu. Menyum kaphe oh lac sa janih bhian randap blaoh nyu daok brei ka khol drei ndom meyai dak carita saong gauk saong biai ka bruk ngak mbang ndom meyai haong yut cuai hu sa hatai sa jalan. Kaphe ngan haong dahlak hulin ieu lac sa janih menyum yaok harei oh menyum oh jeng.”

Oh lac sa bruk bhian randap, kaphe daok ieu lac bruk takre saong jeng lac sa bruk ba rilo urang mai halau gha. Urang likei dam bangsa Randaiy – angan Y Pốt Niê, mada hu tukvak atah palei piah tui bruk bac si, min kaphe dui pachreih sa-ai gilac mai mbon palei, padang angan je kaphe Randaiy. Ngak kaphe tui asal bhap bini di bangsa drei, sa-ai hu ba pandap “Kaphe athak” tabiak atah grauk labik, oh lac tok sa asal kadha ka kaphe bo daok lac asal kadha ka ilamo, ka plak tangin gheih saong bruk ikak tian raong anek di dom amaik, sa-ai kamei di mbon palei. Y Pốt Niê ndom meyai lac:

“Pambuak ka ilamo saong yang ka dua lac pambual jhul ndap di drei tabiak dunya, khol dahlak hulin caong khin lac ndap ini oh tok hu di Viet Nam bo dunya daok thau tal, dalam nan hu ba ilamo menyum kaphe jeng yau ilamo bangsa drei nao pagam haong gauk tuk nan hu brei mboh yaom kaom ka hatai gul pataom yau yaom kaom ilamo nao tame bruk siam glaong di ndap kaphe.”

Tui Nai Hoa hau H’Hen Niê, kaphe ieu lac sa janih ilamo dalam inem krung meng tuk daok sit saong lac bruk mbau pahe di urang dalam baoh sang. Ndih tapui saong praong tagok di sa mbon palei kathaot di huyen Cư M’gar, tinh Dak Lak, meng tuk daok sit, nai hu bhian randap saong phun kaphe. Yaok sa mbang ndom meyai tal kaphe, Nai H’Hen, bak dom hatai chreih chrai:

“Tui hatai di Hen ka kaphe, kaphe ieu lac bruk pambuak, kaphe lac uranam, kaphe lac sa kein lagaih. Ndom mayai ka kaphe ieu lac bruk pambuak ye nan lac bruk pambuak dalam baoh sang. Hen hu menyum kaphe di ong, amuk, di ame, amaik. Kaphe jeng sa hatai anit ranam tuk Hen menyum sa glaih kaphe di halei halei, Hen brei hadar tal sang, hatai uranam mbon palei, hatai anit ranam haong dom asar kaphe.”

Tui amuk Niê Thanh Mai, Akaok Kapul Ilamo – Nghe thuat tinh Dak Lak, ilamo kaphe hu jeng sa yava, sa janih oh kurang hu di dalam raidiuk di rahra urang Ban Buôn Ma Thuột.

“Tui khol dahlak hulin ye kaphe ieu lac sa janih ilamo, kaphe lac uranam saong kaphe jeng lac piah pambuak. Khol dahlak hulin mboh lac yaok mbang Harei raya pahe jeng ba tabiak asal kadha karei di gauk, gam saong asal kadha thun ini ye khol dahlak hulin mboh lac bruk pambuak ilamo di bol bhap rahra, ilamo di dom bangsa dalam tinh. Dalam nan hu pambak praong di rilo gah saong peih tabiak ilamo di dom bangsa saong kaphe.”

Di raidiuk urak ini, yaok tanjaoh kaphe Buôn Ma Thuột ndung bak mbau pahe di ceik glai. Nan ieu lac asal kadha ka anek menuac, ka ilamo di bruk pambuak, hatai anit ranam…/.