Amuk Đào Thị Cách, umo 80 thun, sang daok di labik ka 14 Trần Nguyên Hãn, phường 1, Ban Vũng Tàu brei thau, kayua caong pabak harak gar pambuak tal bruk mbang drap ar nan ye amuk nao tal labik 1 bambang di UB bhap bini phường 1, Ban Vũng Tàu piah likau sao y harak khai tử di pasang. Tuk mai tal UB bhap bini phường amuk hu urang ngak di gah 1 bambang pato tacei biak cambaih laih, langyah cambaih laih nan ye amuk oh nao mai rilo mbang, lahik tukvak. Amuk Cách brei thau, oh lac harak gar mbang ini bo dom mbang dahlau amuk mai tal gah 1 bambang di phường jeng hu pato tacei biak cambaih laih:  "Dahlak nao ngak veik harak khai tử ka pasang dahlak, dom adei kamuen ngak samar drah lo. Bruk duh rahra di dom adei biak chreih chrai, siam mekre lo. Dahlak lac urang praong thun umo nan ye dom harak gar ka oh thau ye dom adei pato tacei, langyah cambaih laih piah ngak samar dom harak gar. Biak samar drah, dahlak ngak blaoh saong bahrau mek harak gar".

 UB bhap bini Phường 1, Ban Vũng Tàu brei thau, bruk “2 oh – 3 hu” lac: “Oh luai harak gar kandaong veik, oh caik ka rahra nao mai rilo mbang; Hu thau ka bruk ngak, hu cambuai klao, hu panuac thau dhar phol” hu peih ngak meng thun 2022. Hadei di 1 thun peih ngak bruk nan, phường du taduan 5.505 harak gar, taong abih rahra njauk hatai tapa phiếu taong yaom, oh hu panuac ndom biai halei. Amuk Thái Thị Hồng Minh, Phaok akaok UB Bhap bini phường 1 brei thau, bruk ngak “2 oh – 3 hu” pamaong tal jalan ngak ka rahra hu kein laba, paglaong bruk ngak di urang jakar, công chức dalam bruk ngak: "Meng bruk nan, dalam thun 2023 kol dahlak padang veik 1 bruk “1 gaok – 3 thau”, lac sa urang halei, kapul halei tuk mai tal phường gaok urang jakar, công chức halei ye thau hu 3 asal kadha lac: thau abih dom khau tin, ka 2 lac thau harak gar online saong thau taong abih dom asal kadha bo rahra caong langyah javap jaloi. Piah ngak, taong abih urang jakar padang bruk ngak saong paglaong bruk ngak, kham merat paglaong ilamo bruk ngak di drei".

Lac sang kan kandah, bilan 6/2024, ong Nguyễn Văn Luật daok di palei Suối Nghệ, xã Suối Nghệ hu taduan mek 4 drei pabe (yaok drei yaom 3,5 triệu đồng) meng bruk “Tagok dua mbang drei pajaih” di Ủy ban Mặt trận Negar Việt Nam xã Suối Nghệ, huyện Châu Đức. Harei taduan mek pabe pajaih, ong Luật oh sahneng lac caong lapei nan jeng biak. Tal tuk ini, hadei di 2 bilan raong kareik tapon pabe menek hu 2 drei: "Tapon pabe bahrau menek 2 drei, meda urang ikak kaiy blei jaik 10 triệu, Tuk raong mboh pabe praong tagok, tani tanat dreih yau drei hu jien patak pataom, biak chreih chrai. Caong ka tapon pabe dak harei dak rilo piah daong ka sang kan kandah karei yau sang drei, bo urang oh hu jien piah peih praong bruk ngak".

 Meng thun 2013 tal ini, bruk pakacah “Jak ba gheih” pagam haong bruk pakacah gauk anit ranam taneh ia, dom bruk jak ba kayua dom pakat, dom gah peih tabiak dak harei dak hu peih ngak khang, praong. Ong Nguyễn Văn Lợi, Phaok mBan Jak ba, tỉnh uỷ Bà Rịa – Vũng Tàu brei thau, dalam thun ini, hu yaok ribau bruk “jak ba gheih” hu peih ngak, dalam nan hu 9 bruk hu pok meyaom saong hu pilih ruah peih praong dalam dom thun hadei: " Bruk pakacah “Jak ba gheih” mBan Jak ba hu patui veik peih ngak yaok thun, kayua ini lac bruk ngak gam gam di mBan thường vụ tỉnh uỷ. yaok thun hu peih tabiak bruk pakacah jak ba gheih, saong hu jalan peih ngak. Dom puk palei pasang iek, taong yaom saong tut angan hu mbaok tame. Yaok thun mban Jak ba tỉnh ủy brei pilih ruah tabiak 20-30 bruk ngak piah pok meyaom, meda peih praong tabiak dalam tỉnh".

Bruk pakacah “Jak ba gheih” di Bà Rịa – Vũng Tàu hu brei thau, lac sa dalam dom bruk ngak praong, gam gam dalam bruk jak ba; lac jalan langyah hu yaom glaong, ba brei njauk gauk dalam rahra; jak ba dom kapul, dom gah, patagok prein khang gul pataom rahra, daong ka rahra dak harei dak jia tame saong jaik taphia haong karja jang, daong ngak hu bruk chính trị di tỉnh.