Hợp tác xã (HTX) Ngak nong Quyết Thắng, daok di phường Long Hương, ban Bà Rịa, tỉnh Bà Rịa - Vũng Tàu llac labik ba akaok nao dahlau dalam bruk buh jien tame ngak, pandar công nghệ glaong tame bruk raong hadang pablei tabiak negar langiu. Ong Nguyễn Kim Chuyên, Yam ndok HTX Ngak nong Quyết Thắng brei thau, bruk raong hadang tui công nghệ halang ia tuần hoàn, pacang sre hu HTX peih ngak meng di thun 2016. Bruk raong ini ngak ka dom hadang metai trun bier, hadang khang kadang, praong samar, dom mbang raong jak jeng  hu paglaong biak rilo. Urak ini HTX hu 3 labik raong praong labaih 5.000 m2 danao raong dalam sang halam, năng suất meng 40-50 tấn/vụ. Ong Nguyễn Kim Chuyên ndem lac: “Raong hadang tui jalan ngak meng kan, urang raong oh khik iek hu alam môi trường, ba tal bruk urang raong tuk halei jeng haduh hatai. Anak bruk nan, HTX khol dahlak hu pilih ruah bruk raong hadang tui cong nghệ glaong hệ thống tuần hoàn, pacang sre. Yaom lac raong di danao sit min brei năng suất, sản lượng saong jien mek tame glaong, hadang khik hu  hacih sa-at salamat pandap mbang, pabak hu hatai caong di darak pasa dalam taneh ia saong pablei tabiak negar langiu”.

Lac sa dalam dom labik di tỉnh hu prein khang gah ngak nong, huyện Châu Đức hu 21 kapul, manuac urang buh jien tame ngak nong pandar công nghệ glaong ngan haong mblang taneh praong abih tih labaih 618ha. Ong Nguyễn Tấn Bản, Akaok UBND huyện Châu Đức brei thau, kaya nong pandar công nghệ glaong meblah labaih 40% dalam dom bruk ngak nong di pak ini. Dalam tukvak anak tal, huyện Châu Đức meda caik tabiak taneh piah quy hoạch parabha labik chức năng bhum ngak nong pandar công nghệ glaong: “Dalam tukvak anak tal, huyện meda pataom tame ngak kaya nong pandar công nghệ glaong tui jalan pambuak chuỗi giá trị, pamaong khang tal bruk pablei tabiak negar langiu piah tagok yaom  di mangaok 1 labik mblang taneh. Daong ka urang nong hu laba di mangaok taneh ngak nong di huyện Châu Đức dalam harei hadei”.

Tui Sở ngak nong saong patagok palei pala tỉnh Bà Rịa – Vũng Tàu, Danak dak 04 di Tỉnh uỷ Bà Rịa – Vũng Tàu ka cak rok patagok bruk ngak nong pandar công nghệ glaong tukvak 2020-2025 tuk camriep hu jhul patagok gah ngak nong, palei pala. Tal urak ini, dom yaom glaong di pandap panda kaya nong pandar công nghệ glaong tui kuhria mek hu jaik 110 triệu đồng/ha, tagok 13,8 triệu đồng dut saong thun 2015.

Ong Trần Văn Cường, Yam ndok Sở Ngak nong saong patagok palei pala tỉnh Bà Rịa – Vũng Tàu brei thau, tukvak anak tal, gah ngak nong daok tacei urang ngak nong, doanh nghiệp pataom tame paglaong yaom di mangaok labik mbang taneh: “Bruk paglaong yaom meda rik daong biak praong tame bruk patagok jien mek tame ka bhap bini, ka doanh nghiệp. Kayua yau nan ye dom bruk ngak nong njauk pamaong tal bruk paglaong yaom, njauk pandar taong abih dom ilamo dalam bruk pala drak, dalam nan peih bruk yuak kuak, pataom mek saong kuhria gam bruk ngak pandap”.

Tỉnh Bà Rịa – Vũng Tàu ba tabiak jalan ngak lac: tal thun 2025 meda tagok yaom di bruk ngak saong jien mek tame di mangaok mblang taneh ngak nong rilo jang 1 mbang meteh dut saong thun 2020; pataom mek veik taong abih taneh quy hoạch cak rok patagok bruk ngak nong pandar công nghệ glaong piah peih ngak dom danak dak. Gam tui di nan jeng ngak tabiak labik ngak nong pandar công nghệ glaong di tỉnh meng kadung jien xã hội hóa./.