Labik khik iek dalam bhum khik ramik langik tasik Nà Hẩu praong abih tih labaih 16 rabau héc ta, daok dalam 4 xã lac: Nà Hẩu, Đại Sơn, Mỏ Vàng saong Phong Dụ Thượng, huyện Văn Yên, tỉnh Yên Bái. Labik ini hu glai ram biak praong, biak rilo janih, ndung bak mbaok meta di bhum ceik gah barak Việt Nam haong rilo janih athur, phun kayau quý hiếm yau phun chò nâu, dổi, trám, de, lát hoa, pơ mu... labik khik ramik ini jeng lac labik daok di jaik 72 janih athur, 240 janih cim, jaik 50 janih bò sát, dalam nan hu rilo janih dalam Tapuk Bhong Việt Nam saong dunya yau ye sơn dương, cagau, vượn đen tuyền, voọc xám, kara kanduh akaok praong, kỳ đà hoa; cim hồng hoàng…

Daok dalam bhum khik iek di labik khik ramik, ngan haong labaih 4.500 héc ta glai đặc dụng, xã Nà Hẩu hu labaih 460 sang urang Mông daok diukrai. Piah khik caga siam dom glai ram, meng lavik mai, mikva hu ba tabiak dom adat ka bruk khik iek glai saong hu bhap bini iek praong, ngak tui. Sa dalam dom adat nan, lac bruk kakuh glai. Harei ini, adat nan hu tagok jeng Harei Roya Glai Nà Hẩu di tuk akaok thun haong rilo adat cambat gheih mekre yau ye: Pok paling pandap yang glai, pok likau yang glai brei kaya glai, likau ka hajan siam, hangin lagaih, kayau patau siam, mekre, pala hagait hu nan. Ong Sùng A Xà, sa urang daok di palei Bản Tát, xã Nà Hẩu brei thau: “Tui adat cambat di urang Mông ye meng kan dahlau hu blaoh adat kakuh glai. Yaok thun, gru ieu yang meda ngak dom phép bùa piah khik dom glai, khik halau ia. Meyah urang halei ngak suan, jah tak glai, kaoh phun kayau praong, meda njauk ruak kik”

Meng adat cambat, tanarakun iek praong glai, khik iek glai, maong glai lac baoh sang praong di bhap bini, nan ye puk halei, palei halei di Nà Hẩu jeng hu sa labik glai pakauk, glai ginreih. Labik glai ini daok di labik mekre abih di palei, hu rilo janih phun praong quý hiếm… Meng dom adat "oh brei gaok tame”, nan ye glai tuk halei jeng hu khik caga siam saong dom glai nan hu jeng labik khik ramik langik tasik. Sa-ai Sùng A Chua, sa urang likei daok ranaih di xã Nà Hẩu brei thau: “Tapa adat kakuh glai, kol adei hu ong muk, amaik ame pato tacei iek glang, khik caga glai ka nyu siam, oh jah tak glai piah pacang glut jaleih haluk... Meng nan, piah ka glai hu jeng labik sinh thái di xã urak ini saong ka harei hadei”.

Daok gah chức năng lac Hạt Kiểm lâm Văn Yên, mBan Khik iek labik khik ramik langik tasik Nà Hẩu, kham merat pambuak bruk haong karja xã peih bruk jao labaih 3.700 héc ta glai tamo đặc dụng brei ka bhap bini dom palei dalam xã khik iek, piah ka mikva hu jien mek tame meng dịch vụ môi trường glai. Xã jeng hu padang dom kapul, nyaom  khik iek saong pacang caga khuah glai. Gam haong nan, lac patagok pathau khan, pato pakai bhap bini, peih bruk brei ka mikva mbaoh tangin tame harak sanya khik iek, pacang khuah, padam khuah glai; langyah catang dom bruk ngak suan … Ong Vũ Minh Phúc - Akaok Hạt Kiểm lâm Văn Yên, tỉnh Yên Bái brei thau: “Kol dahlak thau lac bhap bini, menuac daok di pak nan, menuac hu mbaok tame khik iek gali, lac tanye, lac meta, lac tangin pambuak atah, daong ka kiểm lâm mboh, thau, langyah samar drah dom bruk ngak suan. Nan ye dalam dom thun tapa saong tukvak anak tal, kol dahlak daok ginum, biai haong mikva, caik hatai tui pang meng puk palei, tapa nan padang ngak dom danak dak, dom jalan ngak ka nyu lagaih, paih ngak habar khik iek hu siam taneh glai daok hu yau urak ini, pacang cakak tal tanut biar di abih dom bruk ngak suan”.

Bruk iek praong, khik ramik glai meng abih hatung hatian di bhap bini pak nan, gam haong bruk kham merat di gah chức năng, dom glai ram, đặc dụng dalam bhum khik iek di labik khik ramik langik tasik Nà Hẩu hu hijao mekre tui thun bilan. Tapa nan, mikva hu pacang khik, raidiuk dak harei dak glaong tagok saong praong jang nan lac hu ba Nà Hẩu jeng labik dui pachreih tuai damuai atah jaik mai ravang me-in, duah thau./.