Tuk ngak salah blaoh, dom danak dak ini meda daong peih talaih dom tavak tave ka hạ tầng, pandar hu siam jang dom kein lagaih di tỉnh, cak rok patagok bruk rivang ma-in, dui pachreih urang buh jien tame ngak mbang. Kadha vak di Lưu Sơn, urang vak di Rayo sap ndom VN daok di TP.HCM hu ndom tal bruk ini:

Tui dom urang ilamu gah pabah lamnge, dom danak dak jalan mbak nao mai hu makna biak praong, tagok hu abih pren khang di dom pabah lamnge Cái Mép-Thị Vải, tỉnh Bà Rịa-Vũng Tàu. Dalam nan, cao tốc Biên Hòa-Vũng Tàu saong tatua Phước An nan lac dua danak dak prong bo bhap bani, karja saong dom doanh nghiệp pabah lamnge daok caong maong. 

Danak dak tatua Phước An pambuak jalan dom pabah lamnge haong huyện Nhơn Trạch, tỉnh Đồng Nai, jeng lac labik pambuak dom jalan prong lac jalan Vành đai 3 TP.HCM; pambuak Bình Dương haong labik pabah lamnge Cái Mép - Thị Vải tapa Đồng Nai. Daok jalan cao tốc Bến Lức - Long Thành meda daong ka bruk pajeng ba pandap panda meng Bhum taneran kraong Cửu Long, Đồng Nai tal dom labik jaik taphia saong dom pabah lamnge  Cái Mép - Thị Vải samar jang, daong palagaih cak rok patagok kinh tế - xã hội di Bà Rịa - Vũng Tàu, Đồng Nai saong di taong abih bhum Đông – Tây Nam bộ.

Ong Nguyễn Xuân Kỳ, Tổng thư ký Hiệp hội pabah lamnge  Đông Nam Á brei thau, dalam 2-3 thun tal, dom danak dak nan meda rik daong ngak brei salih bahrau mbaok meta jalan mbak nao mai di bhum gah Meraong bo abih di nyu lac di bhum Đông Nam bộ saong daok daong patrun jien sahui logistics ka doanh nghiệp: "Cái Mép oh duk haong dom pabah lamnge di Việt Nam bo njauk  duk haong khu vực, tỉnh Bà Rịa – Vũng Tàu njauk pambak tame kein lagaih oh labik halei hu yau ini, nan lac hu dom pabah lamnge aia dalam. Kadua nan lac tuk peih tabiak 3 jalan prong ini (cao tốc Biên Hoà – Vũng Tàu, tatua Phước An saong jalan tapen tasik 994) ye dom tổ hợp công nghệ, kapul nyaom prong meda tame Bà Rịa – Vũng Tàu, kayua lac urang  pambak tame kein lagaih, caik labik ngak bruk  di pak  ini piah  pablei pandap panda tapa Mỹ".

Ong Phạm Ngọc Hải, akaok Kapul Du lịch tỉnh Bà Rịa – Vũng Tàu mboh lac, ini jalan peih tabiak ka patagok du lịch di tỉnh. Dom doanh nghiệp saong karja tỉnh njauk rami ramik veik pandap panda  brei ka bruk rivang ma-in, pandap panda daong pabak tame piah ngak jeng pandap panda rivang ma-in, jak ba manuac urang buh jien tame ngak, yaih khan bruk rivang ma-in piah cak rok patagok: "Jalan tapen tasik meng Vũng Tàu tal Bình Châu, huyện Xuyên Mộc daok hu mblang taneh biak prong piah ka Bà Rịa – Vũng Tàu cak rok patagok bruk rivang ma-in chất lượng glaong, pakat dunya, ini lac pren khang piah ka tỉnh cak rok patagok. Rilo urang ngak mbang praong pakat dunya meda duah tal labik ini tuk tỉnh padang ngak hu jalan 994. Dahlak saneng lac, urak ini dom urang buh jien tame ngak daok kuhria caga duah thau ka bhum taneh ini".

Urang pal akaok tỉnh Bà Rịa – Vũng Tàu brei thau, Sarak 24/2022 di Bộ Chính trị ka cak rok patagok kinh tế - xã hội saong khikm kajap quốc phòng, an ninh bhum Đông Nam Bộ tal thun 2030, jalan mong tal thun 2045 brei thau lac, tal 2030 tỉnh meda hu jeng pasak kinh tế tasik negar, Ban Vũng Tàu hu jeng pasak rivang ma-in pakat dunya, dom labik tapen tasik meng Phú Mỹ tal Bình Châu, huyện Xuyên Mộc meda hu jeng pasak rivang ma-in pakat negar.

Tui ong Nguyễn Công Vinh, Phaok akaok UBND tỉnh Bà Rịa – Vũng Tàu, langiu di dom danak dak jalan mbak pambuak dom bhum, tỉnh jeng daok jhul khang peih ngak dom jalan labik tame mblang kapal haok Long Thành.  Anak tal, tỉnh daok pambuak bruk  haong dom mentri, ngành Trung ương piah padang ngak pasak pasang iek pandap panda di Cái Mép - Thị Vải, pambuak haong pasak pablei salih tự do: "Jalan cak rok patagok di Bà Rịa – Vũng Tàu anak tal nan lac meda pataom tame padang ngak labik ngak kong ilamu glaong, dom tổ hợp ngak kong – dịch vụ - đô thị tui jalan ngak bahrau. Raja-ei jeng hu adat brei ka Bà Rịa – Vũng Tàu peih ngak dom đề án ini. Yau nan ye, tuk dom urang buh jien tame ngak mai ini ye tỉnh jeng hu blaoh gah hạ tầng, gah quy hoạch piah duh ka dom urang buh jien tame ngak mbang".

Meng hatai kham merat glaong saong bruk kham merat di abih hệ thống chính trị, bruk sangka di Raja-ei, caong lac bruk peih ngak dom dự án di Bà Rịa-Vũng Tàu hu njauk vaktu ba tabiak. Cao tốc Biên Hòa-Vũng Tàu, jalan tapen tasik saong mbaik tatua tapa kraong Thị Vải hu ngak salah blaoh meda  ngak ka hatai caong khin jeng bruk biak, dui katut panak tukvak nao mai di Bà Rịa-Vũng Tàu haong dom labik karei dalam bhum Đông – Tây Nam bộ, peih tabiak rilo jalan cak rok patagok bahrau./.