Yau nan, bruk pato megru, bac bruk ngak, parabha gah ka anek saih hadei di bac tamat THCS di Bà Rịa – Vũng Tàu tuk camereip hu ba mai bruk sahanang hatai ka amaik ame saong anek saih halei oh? Kadha vak di Gia Khang, urang vak di rayo sap ndom VN daok di TPHCM hu ndom ka bruk parabha gah ka anek saih hadei di THCS di Bà Rịa – Vũng Tàu. 

Ong Phạm Minh Lý, huyện Đất Đỏ, tỉnh Bà Rịa – Vũng Tàu hu anek daok bac tal 9 di pak ini brei thau, lac urang ngak ame, ong duh hatai lo tuk anek di drei daok caga yam tame jalan ka harei hadei, ka bruk ngak. Hadei di tuk hu mbaok tame dom mbang tacei jalan bruk ngak ka anek saih THCS di palei, ong Lý hu ba tabiak jalan bruk ngak lagaih haong prein bac di anek drei.

Tui ong Lý, langiu di bruk tacei ba jalan bruk ngak ka anek saih di dom kapul nyaom, sang bac, ye amaik ame lac hu labik dang biak praong dalam bruk tacei ba jalan harei hadei ka anek di drei. Bruk pilih ruah bruk ngak daok iek tui jien ndo di sang hu takik atau lo, abih di nyu lac prein bac ta-a di dom anek: "Dahlak jeng mboh lac, anek bhik di drei oh abih hatai haong bruk bac ta-a, prein bac oh khang ye amaik ame njauk sahneng kuhria veik ka nyu lagaih, pilih ruah ka anek sa bruk ngak halei nan lagaih haong prein yava, lagaih haong prein bac, haong bruk di sang piah ka dom anek tui bac, hadei ini dom anek meng hu bruk ngak tani tanat".

Adei Trần Nhật Minh, anek saih tal bac 9, ban Bà Rịa khan lac, dahlau daih adei caong khin pakacah tame sa sang bac đại học halei nan, min hadei di tuk hu tacei pato jalan bruk ngak, adei mboh prein bac di drei oh ginup tame tal bac 10 công lập nan ye salih jalan tame dom sang bac bruk ngak.  Nhật  Minh lac: "Adei mboh lac drei oh khin bac tra, nan ye adei caong tame sa sang bac bruk ngak, adei bac ngak bruk điện. Điện dân dụng daong ka drei hu sa bruk ngak tani tanat saong urak ini  lac bruk oh kurang hu dalam raidiuk yaok harei, meda ngak bruk di dom doanh nghiệp".

Tui yaok pataom di Sở pato Megru tỉnh Bà Rịa – Vũng Tàu, dom anek saih hadei di tuk bac salah danak dak THCS bo oh ginup prein tame tal bac 10 công lập ye rilo meng tui bac di dom sang bac bruk ngak, pato megru thường xuyên, THPT langiu công lập saong hu dom adei daok bac veik piah thun hadei pakacah gilac veik. Jaik di abih lac thun bac 2021-2022 hu tal 30% anek saih tui bac di dom sang bac bruk ngak, thun bac 2022-2023 lac 35% ngan saong 5.270 anek saih.

Tui amuk Trần Thị Ngọc Châu, Yam ndok Sở Pato Megru tỉnh Bà Rịa – Vũng Tàu, kadha bahrau dalam bruk tacei ba jalan, pato pakai bruk ngak ka anek saih di thun bac ini, lac hu da-a dom chuyên gia, urang tâm lý pambuak bruk, daong gru pato ngak bruk tacei ba jalan bruk ngak ka anek saih: "Kol dahlak daok pathau khan, bruk pilih ruah di anek saih, jalan nao karei nan lac bruk pilih ruah lagaih haong prein di anek saih. Abih di nyu lac bruk pilih ruah ini oh hu bruk “so sánh” di dom adei bac bruk ngak, dom adei daok bac phổ thông atau tame bac megru thường xuyên. Dom adei meda thau hu bruk pilih ruah di drei lac lagaih haong rup di drei, prein bac di drei tui jalan cakrok di xã hội".

Piah ka danak dak “pato megru bruk ngak ba jalan parabha gah ka anek saih dalam pato pakai phổ thông tukvak 2018-2025” hu jak jeng saong lagaih haong bruk di anak meta ye bruk salih bahrau jalan pato pakai, tacei ba jalan bruk ngak  di gah pato megru lac bruk njauk ngak, daong ka amaik ame saong anek saih hu jalan sahneng njauk, ba tabiak jalan ngak njauk ka bruk ngak di harei hadei. Abih di nyu lac bruk tacei ba jalan bruk ngak brei hu ngak meng avak piah ka amaik ame, anek saih hu rilo tukvak piah sahneng kuhria,, pilih ruah jalan nao ka nyu lagaih. Ngan saong bruk bac bruk ngak, njauk sangka tal sarak daong jien sahui pato pakai saong gah kakei pato pakai piah dui pachreih urang bac./.