Tuai mai tal Phìn rilo meng lac “mboh karei saong hu angan je” bo Homestay di sa-ai ba mai

Sùng Mí Phìn menek tabiak saong praong tagok angaok bhum taneh akaok abih di taneh ia pak palei Lũng Hòa B, xã Sà Phìn, huyện Đồng Văn (t.Hà Giang). Urang likei ndih tapui thun 1994, hu thait thaok sit ini, daok hu angan haong danak dak “Cakrok du lịch khang kajap” mek hu giải Nhì bruk pakacah “Hatai sahneng padang mbang ngui hadah krah dam dara palei pala pakat negar”; saong hu pilih ruah lac kreih camin hadah di tỉnh Hà Giang.

Lac urang anek di bhum Cao nguyên patau Đồng Văn, Phìn thau cambaih ka raidiuk pak ini, tuk vil val, maong pak halei jeng mboh patau haong patau. Hadei di sa tukvak pasang iek, Sùng Mí Phìn mboh lac bhum taneh palei drei daok hu rilo prein khang ka patagok du lịch, meyah oh pagam pambak tame ye biak damen.

Hatai takre nao pak ini pak daih lac sa binah, min prein pachreih ba Sùng Mí Phìn khang hatai tui bruk ngak du lịch, jeng yau bruk bac sap Anh, lac bruk tabiak meng “mblang patau ia bulan”.

Phìn khan lac: Tuk daok daong amaik pablei pandap di labik “mblang patau ia bulan” ye hu tuai negar langiu mai tangi sua dua amaik anek di sa-ai ka angan ieu di bhum palei ini, jeng yau makna di nyu. Dua amaik anek di sa-ai tuk nan oh thau langyah habar brei ka tuai thau. Daok Phìn ye mboh biak damen kayua oh yaih khan hu bruk mekre di labik ini – bruk bo sa-ai mboh hadah mbaok meta tuk hu sua tangi tal. Dom harei hadei, sa-ai jeng daok sahneng miat ka bruk nan. Blaoh Phìn khang hatai nao bac sap Engris piah salih bruk nan.

Puac thun 2018, Sùng Mí Phìn khang hatai nao tal Sa pa – labik hu biak rilo urang Mông gheih sap Engris, piah bac sap negar langiu. Urang khik ramik tal bac nan, lac sa-ai Tẩn Thị Su – Urang padang tabiak danak dak Sapa O’Châu, saong hu tạp chí hu angan je lac Forbes pok angan dalam 30 Under 30 (lac 30 urang naih gheih di abih umo mala 30 thun). Sa-ai Su taduan pato saoh, oh mek jien di Phìn saong tacei ka sa-ai jalan ngak du lịch njauk makna.

Thun 2019, Sùng Mí Phìn palao tal bac sap Anh di Sa pa piah mai veik haong cao nguyên patau Đồng Văn, ba tangin tame ngak du lịch tui jalan Phìn sahneng mboh saong bac hu. Phìn hu taduan raok dom tuai du lịch camereip abih di “White Hmong Homestay” di drei (hu makna lac Homestay di urang Mông mbong patih – sa kapul di bangsa Mông angaok Cao nguyên patau), piah yaih khan hu ilamu, janih biak karei, biak gheih di Hà Giang ka tuai dalam saong langiu taneh ia thau.

Meng jalan ngak brei Homestay jeng “sang daok biak biai”, patrun patakik di abih bruk “dịch vụ hóa du lịch”, lac bruk bo Phìn daok huac ngak lahik nao ilamu meng kan), pamaong tal bruk ngak brei tuai hu ba drei tame biak di abih, jaik di abih haong raidiuk di urang Mong ka tuai damuai.

Kayua yau nan ye, Sùng Mí Phìn oh salih karei rilo baoh sang di drei, yaok bruk ngak di tuai nyu yau dom menuac dalam palei daok pak ini. Urang tame harei bahrau saong tamat sa harei yau dom menuac dalam palei biak biai. Mesup, bak yot angaok ka-ing tagok puh, cakak hareik, paik njam, pala tangei… bilan halei bruk nan, biar harei dui merai menyim khan bai; melam ngak mbang huak saong mbang dom pandap mbang meng kan, ndom biai nao mai ka dom bruk hit ngak mbang yaok harei… Tuk oh ka hu Covid-19, kuhria rah tapa Homestay di Sùng Mí Phìn taduan raok jaik 100 tuai yaok bilan. Tuai mai tal Phìn rilo meng lac “mboh karei saong hu angan je” bo Homestay di sa-ai ba mai.

Phìn jeng hu tacei labik mai tal angaok Google Map piah brei ka menuac sia thau lac, di labik ini hu 1 Homestay, daok bruk tuai negar langiu mai tal saong mai veik haong sa-ai, yaih khan Homestay di sa-ai haong rilo urang karei jeng mai meng urang ba drei tame bloh mboh takre. Phìn khan lac, sa-ai hu kein lagaih di labik lac thau cambaih ka raidiuk saong ilamu meng kan, nan ye tuk Phìn ba tangin tame ngak, Phìn hu amaik ame adei sa-ai puk palei sangka pachreih tui, Phìn jia lac drei nao njauk angaok jalan padang mbang ngui./.

Urang lang: M. Phương – 06/03