Boh durian hu mek kanduh piah ngak khak hữu cơ

Rah tui dom jalan  tỉnh lộ 864, 868 di  huyện Cai Lậy, tỉnh Tiền Giang, mbuan mboh rilo mbuk  kanduh boh durian klaak rilo harei, mbuan si ba tal nerak tasuak. Kayua lac hadei di tuk mek ralow durian, dom labik pablei salih klaak veik tong abih kanduh boh durian ni atau pah urang pajeng nao klaak di labik karei. Sa po blei boh durian di xã Tam Bình, huyện Cai Lậy brei thau, njauk pah  200 ribau đồng sa radaih, piah pajeng kanduh boh durian nao klaak di labik karei. Jiak abih dom labik pablei salih boh durian oh ka langyah hu kanduh boh kayau ni:

“ Kanduh ni lac nerak, tuh ngak khak, pah 200 ribau đồng sa radaih. Bhap bini rahra duh hatai rilo biak, urang nao tuh ngak hagait ngak, drei oh thau, urang tuh di pak halei urang tuh”.

Dok  muk Nguyễn Thị Điệp, po labik blei boh durian di  xã Long Trung, huyện Cai Lậy jeng ndom lac, jalan ngak lac, pajeng kanduh durian klaak tame mblang bein, hadei di sa tuk vak  ralai  bruk hu mek ngak khak.

Hu thau, boh durian tuk biak prong, baoh  oh mekre bhian hu dom labik blei blah kanduh mek ralow pablei, oh pablei baoh tamo kayua yaom biak bier. Nan ye, dom kanduh boh durian klaak veik biak prong. Taeng di huyện Cai Lậy, tỉnh Tiền Giang tame bilan paik baoh, yaok harei klaak tabiak yaok pluh  tấn kanduh song asar di boh kayau ni.

Ong Nguyễn Văn Sang, Akaok UBND xã Tam Bình, huyện Cai Lậy brei thau, dahlau deih hu doanh nghiệp mai pataom mek kanduh boh durian nao ngak khak hữu cơ, min urak ni, padeih veik. Xã dok jak ba dom labik blei, dom doanh nghiệp pablei salih boh kayau ni  pambuak bruk song radaih tuh hareik thải mek nao klaak di mblang hareik pataom mek di tỉnh. Daok bruk tuh pataom kanduh boh durian di taneh bein, ye oh pachreih ba, kayua mbuan si nerak môi trường song tamuh tabiak pandiak ngak ka phun durian tamuh oh siam:

“ Binah kanduh  xã jak ba dom sang pablei salih, dom po vựa mbaoh tangin tame harak pambuak bruk  song doanh nghiệp Nhật Toàn ba nao langyah, khik ramik hacih saat môi trường. Thun 2021, kanduh boh durian hu dom  doanh nghiệp ngak khak hữu cơ pataom mek abih. Min,  xã daok jak ba dom doanh nghiệp pataom mek ngak habar khik hu  môi trường di xã dalam tuk vak anak tal”.

Tui  Tiến sĩ Nguyễn Thị Ngọc Trúc, Phó Trưởng Bộ môn Nông học- Viện phun mbang boh gah merong brei thau, kanduh boh durian brei hu pa-auk  jeng khak  hữu cơ biak siam ka phun pala, dok klaak tabiak ba tal nerak môi trường song ngak tamuh anek ruak ka anek menuac song athur rong . Tiến sĩ Nguyễn Thị Ngọc Trúc hu panuac brei thau:        `        

“ Kanduh boh durian caik ka nyu mbau bruk, meda pambak ruak tabiak ia, taneh, ba ruak ka anek menuac, ka alam môi trường, athur rong. Meyah hu jamriak drei tacaoh , cakak nyu tabiak dak sit dak samar ralai, hadei di nan srau haong cur bloh pacang bạt veik . Hadei di sa adit  peih bạt tabiak srau song  vi sinh paralai kanduh durian jeng janih mùn, pa-auk jeng khak ”.

Oh lac di boh durian, bo dom janih pandap ngak nong karei di dom bhum palei pala , dok njauk klaak saoh, kayua urang oh thau pa-auk khak. Dalam tuk nyu nan lac janih dinh dưỡng pabak veik ka taneh siam di abih./.

Urang lang: Hanipha- 27/5