Meng bruk jak ba di ayut sahabat, dua urang taco di amuk Lê Thị A (sa urang umo 20 thun saong sa urang umo 26 thun) daok di  tỉnh Bình Phước tapa Campuchia ngak bruk jaik 5 bilan ini mai. Tapa dom mbang dua taco payua padauk tin nhắn mai ka urang dalam sang, amuk meng thau lac, tuk tapa Campuchia, dua urang nan oh njauk ngak kong haong jien bilan glong  yau panuac sanya dahlau di nan, bo yaok harei tame mạng ngak bruk luac melam piah jak ba urang Viet ma-in saong buh jien tame game online. Muk Lê Thị A drut drui ndem meyai oh truh: Thau taco kakei lac khin laoh mai palei brei hu 250 trieu đồng, dalam tuk amuk taha ye, hu jien halei piah laoh:  “ Huac  gah nan nyu taong paoh taco drei, anit ka taco. Haduh hatai ralo, hia luac harei melam saong tok thau likau haong po  brei ka taco hu prein yawa khang kajap blaoh kuhria duah jalan ye urak ini oh thau ngak habar. Meyah urang brei mai ye brei kuhria saong  cei di kol nyu  piah duah jien laoh dom taco mai”.

Langiu di bruk njuak urang randap pachot pagat ba nao ngak ngan haong jien bilan glong di Campuchia, jaik di ini hu oh takik urang daok di rilo tỉnh, ban tuk duah bruk ngak di mangaok Internat njauk lah pachot. Tuk thau lac drei njauklah pachot, urang nan njauk jeng manuac nao pachoh urang karei tui tacei pato di dom “urang ngak po” di taneh Campuchia. Dom bruk bo urang nan njuak ngak lac tame dom ứng dụng pagon taom gaok piah ndem meyai blaoh pachot pagat meblah drap ar; atau hu jeng dom “ urang ilamu” tacei pato bruk pachot pagat urang karei buh jien tame chứng khoán, duah jien ảo…Meyah oh ngak ginup tui bruk ba tabiak, ye njauk taong paoh, daok njuak urang pablei nao blei mai yau janih pandap panda. Oh eng drei tabiak truh hu di taneh Campuchia, urang brei iew baoh sang di drei daok di Viet Nam daong atau oh daok huac metai lahik duah jalan mai gilac veik. Hu biak ralo urang ngak di Việt Nam  gaok bala yau nan, min dom urang gaok bala oh ka padeih di nan.

Biak di nyu birau ini, urang ngak tabiak negar langiu suan hukum tui jalan tapen negar Tây Nam biak sraw kadau. Meng akaok thun mbiah tal ini, Bộ đội Biên phòng tỉnh Bình Phước  mboh hu 87 mbang tabiak negar langiu suan hukum ngan haong 219 urang; 68 mbang tame negar oh hu harak adat ngan haong 192 urang; Biên phòng tỉnh Tây Ninh jeng hu daong ka 23 urang njauk pachot pagat  tapa Campuchia ngak bruk saong dauk gilac veik mai Viet Nam, atau baoh sang brei buh jien laoh meng hu mai veik saong khan brei thau. Biên phòng tỉnh Long An jeng chap mek labaih 70 urang tabiak negar suan hukum.

Tui Bộ Tư lệnh Bộ đội Biên phòng, tukvak jiak ini, dom urang duah jalan tapa negar daok tagok rilo, ngak kan kandah ka bruk khik iek. Dalam nan hu rilo urang Trung Quốc saong dom taneh ia, tapa pabah negar Viet Nam nao tapa Campuchia  suan hukum piah ma-in mbia. Dom po labik ma-in mbia  jak ba dom urang VN, Indonesia, Malaysia, Trung Quốc tapa ngak bruk dalam dom jalan ma-in mbia online tapa dom negar. Rilo urang tabiak negar meng passport, min tame negar suan hukum kayua labik ma-in mbia khik veik abih harak gar. Jeng hu urang tame negar suan hukum tapa nyaom urang dui ba ngak bruk, jalan taduan raok.

Tapa duah thau, kuhria rah tapa yaok harei hu dom pluh manuac tabiak negar suan hukum, gaok tuk tagok tal 200 urang, ralo meng daok di dom tỉnh: Bình Phước, Tây Ninh, Long An, An Giang...Bruk nan daok mblo tabiak rilo bruk ngan haong bruk khik caga labik taphia negar, pacang caga bruk pablei salih manuac, pacang caga bruk tabiak tame negar suan hukum, abih di nyu lac daok tame tabung glong di bilan hajan saong ia di gah angaok bhum taphia negar Tây Nam mai. Thiếu tướng Nguyễn Hoài Phương, Phaok Tư lệnh Bộ Tư lệnh Bộ đội Biên phòng, lac:  “ Tukvak ini di jalan taphia negar langik biak sraw kadau, tuk hajan, tuk pandiak saong ia ndik daok tuh mai. Hu dom labik bo drei oh nao pasang iek hu saong jeng hu dom labik oh tui iek lauc harei melam hu, kayua  hamu ia tame bak, labik hu bhap bini daok taphia negar, tok 2 tal 3  mbang  jhul gaiy lac tapa gah diah negar ye.”

Bruk dui ba, pablei salih manuac tapa negar hu jabat chức năng mboh lac dak harei dak rah tabiak sraw kadau, ngan haong rilo menuac ngak tangin takai ka kol nyu daok di dom tỉnh, ban ngak bruk biak kan thau di ngaok mạng ba tal rilo urang njauk lah pachot. Bộ Tư lệnh Bộ đội Biên phòng saong dom đơn vị pambuak tal daok pasang iek labik taphia negar. Taphia bruk duah chap mek khang, urang ngak praong di VN jeng hu kakei bhap bini brei caik hatai caga anak dom panuac ieu da-a lac bruk hanjol, jien bilan glong meng gah daih negar./.

Urang lang: Ai Nghiem -10/9/2022