Uranaih hu bac pak di mblang tasik 

Harak ndom puac di dom urang lambaok jeng ndom lac: dom bruk mblung ia pandik harao dalam tukvak tapa di dalam tỉnh rilo meng lac kayua amaik ame nao ngak mbang atah, takik hu tukvak sangka, tui iek uraniah, saong daok kayua amaik ame atau urang khik iek uraniah ka oh sahneng ginup, takik caik hatai dalam bruk khik caga, tui iek anek bhik di drei. Langiu di nan, kayua uranaih oh ka hu pabak ilamu pacang caga dom bala kan kandah nan ye mbuan ba tal mblung ia. Amuk Cấn Thị Hà, Phaok akaok UBND huyện Bác Ái, tỉnh Ninh Thuận lac:

“Bác Ái ye amaik ame rilo meng nao ngak puh, nan ye bruk khik iek anek bhik di drei daok cadu. Hatai sahneng di dom adei jeng daok biar, bruk mblung ia lac bruk biak pandik harao. Piah pasiam bruk ini, anak tal, kol dahlak daok brei padang ngak dom jalan tacei pato patagok bruk pathau khan, jak ba piah paglaong hatai saheng di bol bhap rahra, piah ka dom adei thau bruk mbuan metai lahik tuk nao tapa kraong, tapa danao, bingun. Pambuak bruk haong dom kapul nyaom patagok bruk pathau khan piah ka bhap bini paglaong hatai sahneng jang“

Daok jalan ngak di palei piah pacang, plaih mblung ia uraniah, amuk Nguyễn Thị Khánh Hải, Phaok Chủ tịch pan bruk UBND xã Phước Vinh, huyện Ninh Phước, brei thau:

“Anak tak, caga ka bilan padeih hè, xã kol dahlak jeng brei patagok bruk pathau khan. Tacei pato dom sang bac dalam xã pataom tame dom jalan ngak, kakei dom anek saih tuk padeih hè brei paglaong hatai sahneng piah patrun patakik bruk mblung ia dalam xã.”

Ong Nguyễn Long Biên – Phó Chủ tịch UBND tỉnh ndom lac, makna ba tal mblung ia di uraniah lac kayua rilo sang padang ngak jaik kraong, craoh, danao, bingun, oh hu paga pacang. Rilo labik tuk padang ngak, caik veik lubang dalam oh hu biển cảnh báo, oh kuac li-ua ka nyu samu veik hadei di tuk ngak salah, mbuan ba tal mblung ia ka uraniah. Biển báo, biển cấm di dom labik ia dalam mbuan mbung ia daok kurang. Taphia nan, hatai sahneng di menuac sia ka bruk mblung ia daok biar nan ye bruk mblung ia uranaih jeng daok rah tabiak.

“Lahik sa uranaih kayua mblung ia lac sa bruk pandik harao biak praong, saong amaik ame oh thei khin laik tame bruk pandik harao nan. Kayua yau nan ye, dahlak caong khin dom Sở, mban, ngành, dom kapul nyaom njauk paglaong bruk ngak di drei, pambuak gauk peih ngak hu siam dom jalan pacang caga mblung ia uraniah dalam tỉnh Ninh Thuận di kol drei saong dahlak caong lac, meng bruk ba tangin tame di abih gah meng tỉnh tal puk palei, bruk mblung ia dalam tỉnh hu trun daok biak takik dalam tukvak anak tal.”

Anak meta, Ninh Thuận samar brei ngak dom “biển cảnh báo nguy hiểm” di dom labik mbuan hu bala mblung ia, bhian peih dom tal pato caluai dalam sang bac. Daok brei pambak tabiak panuac ndom lac “Njauk ngak piah palahik bruk mblung ia”. Piah patrun patakik bruk uraniah mblung ia, brei hu bruk ba tangin tame di baoh sang, di sang bac saong di abih menuac sia./.

Urang lang:Mousaphuong- 8/5