Birau peih sruh radaih kong nong pajeng pandap ngak nong meng puh mai sang veik, ong Lương Văn Hợp daok di palei O Pếch, xã Ia Pếch, huyện Ia Grai chreih chrai brei thau, jalan labaih 10km pambuak xã Ia Tô daok ngak jaik blaoh. Jalan ngak samar yau nan, sa binah lac meng hu 47 baoh sang bhap bini halan hatian brei taneh, yah sang, kaoh phun pala piah peih praong jalan:

“Dahlak alin brei 60 phun caphe, tak klaak phun caphe, yah danieng paga piah ngak jalan ka mikva nao mai, ka anek taco harei hadei. Dahlak mboh hu rilo kein laba.”

Rah tui jalan ini ralo meng lac phun kong nghiep lavik harei, hu yaom yau caphe, phun mbang baoh. Ong  Nguyễn Trọng Túc daok di palei O Pếch, xã Ia Pếch khan lac, tuk hu jak ba brei taneh, ong saong mikva suh sah lo kayua lahik taneh lahik jien mek tame. Min hu pathau khan, jak ba lac bruk ngak jalan ba mai kein laba suai lavik di bhap bini dua xã, daong bruk nao mai, pajeng ba kaya nong hu mbuan lagaih, sang ong pachreih tui:

“Sang dahlak alin taneh praong 1met meteh, atah 100met. Angaok taneh hu sa pala phun bời lời saong 60 phun café. Taphia taneh sang dahlak, hu sang ong Nghiêm jeng alin brei taneh hu pala sa talei panat Thái daok brei baoh. Bhap bini hu sa jalan nao mai praong laneng.”

Di xã Ia Khai, huyen Ia Grai, jalan pambuak tapa xã Ia Krái jeng daok hu padang ngak, dalam nan hu bhap bini alin taneh peih praong. Muk Nguyễn Mai Lương, Akok UBND xã Ia Khai brei thau, meng thun 2023 tal ini, hu labaih 100 sang kaoh brei taneh piah ngak jaik 20km jalan palei, jalan xã, jalan tabiak labik pala, ngak:

“ Rilo sang oh ka thau cambaih ye oh khin alin brei. Pambak tame bruk jakba, đảng ủy, UB bhap bini xã hu ginum biai, da-a taha palei, bi thu chi bộ, dom urang hu angan je piah padang kapol pathau khan dom sang nan. Harei ini urang oh thau cambaic ye harei paguh khol dahlak mai gaok veik”

Di huyen kathaot taphia negar Ia Grai tuk peih ngak dom danak dak jalan mbak, karja palei gaok rilo kan kandah ka jien bayar taneh. Nan ye taong abih pakat chính trị hu jak ba, pathau khan, ieu bruk ba tangin tame daong di bhap bini. Meng thun 2022 mbiah tal ini, hu yaok ribau sang alin brei yaok pluh ribau met yung taneh, ngak hu jaik 60km jalan di dom xã Ia Pếch, Ia Yok, Ia O, Ia Krái.

Ong Nguyễn Văn Hà- Ban Dân vận Huyện ủy Ia Grai brei thau, bilan 10 thun 2023, BCH Đảng bộ huyện Ia Grai brei tabiak Sarak 15 ka patagok bruk pan akaok di pakat ủy ngan haong bruk pathau khan, jak ba brei taneh ngak jalan di huyen tal thun 2030. Meng tuk hu sarak, dom pakat uy đảng, karja, kapol nyaom dom palei jeng hu padang mban tacei ba jalan ka bruk jak ba brei taneh ngak jalan, pamong tal thun 2030 peih praong 600km jalan:

“Kham merat tal thun 2025, dalam huyen jak ba bhap bini brei taneh peih praong jalan huyen, jalan xã, jalan đô thị. Bruk pamong tal di sarak 15 lac ngak brei salih birau khang taong abih gah jalan mbak nao mai dalam huyen tal thun 2030, ba mbuan lagaihka bruk nao mai di bhap bini, peih tabiak jalan kham merat tal thun 2030, huyen Ia Grai mek hu tanut chuan palei pala birau”.

Bruk jak ba bhap bini alin brei taneh ngak jalan di huyen Ia Grai hu ba tame sarak, peih ngak tal puk palei saong taduan hu bruk njauk hatai pachreih tui di bhap bini. Ini lac jalan peih tabiak ka huyen samar ngak brei salah jalan mbak, pabak prein khang gah kinh te - xa hoi di bhum taphia negar Gia Lai./.