Meng lavik mai, mikva urang bangsa takik di huyện Bù Gia Mập, tỉnh Bình Phước, maong iek bol lin Đoàn Kinh tế - Quốc phòng 778 yau gauk gar adei sa-ai dalam sang. Bahrau ini, dalam dom harei puac bilan 12/2022, Đoàn hu jao brei công trình ilamo, the duc the thao ka palei Đắk Lim, xã Đắk Ơ saong 30 baoh sang “tình nghĩa Quân-Dân” brei ka bhap bani bangsa takik kan kathaot, gaok kan kandah ka sang daok dalam huyện, haong yaom jien abih labaih 3 tỷ đồng. Dom baoh sang bak hatai ranam di bol lin haong bhap bani hu pabak jang hatai jia, pren khang piah ka dom anek menuac bhian randap haong ceik glai, diuk rai oh tani tanat sa labik tame rai diuk bahrau, tani tanat labik daok, labik ngak mbang. Gam haong nan, dom urang jakar, urang lin hu gam mbang, gam daok, gam ngak bruk, gam ndom sap di mikva piah daong ka mikva pataom tame cakrok patagok kinh tế baoh sang, patruh eik patrun kathaot.

Ngak tui jalan “Patagok bruk pambuak gauk, jaik taphia gauk, daong ba bhap bani bangsa takik saong bhap bani agama”, thun 2022, dom gah dalam tapon nyaom bol pan phao kraong Quân khu 7 hu padang ngak 46 baoh sang đồng đội, tapa tanut ba tabiak 13 baoh, yaom jien ngak labaih 4,7 tỷ đồng; jao 320/260 baoh sang tình nghĩa quân-dân, tapa tanut ba tabiak lac 60 baoh sang, ngan haong yaom jien ngak abih tih labaih 30 tỷ đồng brei ka mikva bangsa takik, urang tui agama. Langiu di nan, daok hu ngak salah blaoh saong jao brei 32 labik ngan haong 291 baoh sang jaik taphia bilai bol lin bhap bani bhum taphia negar di dom tỉnh: Bình Phước, Tây Ninh, Long An; urak ini daok padang ngak 14 labik ngan haong 130 baoh sang di Tây Ninh saong Long An.

Dom công trình ilamo, the duc the thao dalam dom labik agama, sang ilamo bhum urang bangsa takik pabak hu hatai caong khin peih ngak bruk ilamo – the thao bhap bani, ba mai bui sambai biak prong ka mikva dom bangsa takik saong mikva tui agama. Amuk Thị Amina, daok di palei Cam, xã Suối Dây, huyện Tân Châu, tỉnh Tây Ninh brei thau: “Hu bruk sangka di Quân khu, Bộ Chỉ huy quân sự saong Mặt trận Tổ quốc tỉnh daong padang ngak labik me-in the thao bui sambai ka bhap bani pak ini, khaol dahlak mboh biak chreih chai. Hu labik ma-in khang kadang, dom uranaih jeng yau urang prong pathram pahat pakhang pren yava ka rup pabhap saong jak ba rilo urang hu mbaok tame bruk the duc the thao di bhap bani urang Islam”.

Thun 2022, Quân khu hu daong saong jao ka dom jabat padang ngak saong alin hadiah 57 công trình (tapa tanut ba tabiak 35 công trình), hu yaom jaik 16,5 tỷ đồng. Bruk ngak hu makna ini hu daong paglaong rai diuk ilamo ka mikva bangsa takik, mikva tui agama, nao gam haong bol lin dalam bruk dak padang saong pacang khik palei negar.

Abih di nyu lac,  tuk thun bahrau mai tal, danak dak “Tết Bol lin  -  bhap bani” hu dom puk palei, jabat peih tabiak, ngak brei hadah mekre jang hatung hatai siam mekre “Bộ đội Wa Hồ”, hatai anit ranam gauk di urang lin saong bhap bani dak harei dak khang kajap. Trung tướng Trần Hoài Trung, Bí thư Đảng ủy, Chính ủy Quân khu 7 ndom lac: “Rilo danak dak, đề án kayua Karja ba tabiak hu tapon nyaom bol pan phao kraong Quân khu hu mbaok tame ngak siam, yau bruk patruh eik, patrun kathaot, sangka siam ka rai diuk di urang kathaot, padang ngak palei pala bahrau, đô thị văn minh. Kadha nan brei mboh lac, bol lin bhap bani Việt Nam, tapon nyaom bol pan phao kraong Quân khu 7 oh lac anh hùng, khang hatai dalam mesruh metak bo daok biak tari tareng, sami samar, hadah krah dalam bruk ngak, bruk sản xuất saong 3 chức năng di bol lin nan lac bol lin mesruh metak, bol lin ngak bruk saong bol linsản xuất dak harei dak brei mboh angan je di drei saong patagok hu jak jeng siam mekre dalam jaman bahrau.”

Hadah mbaok meta haong dom bruk ngak hu dalam tukvak tapa, tapon nyaom bol pan phao kraong Quân khu 7 tuk halei jeng kak kajap, nao gam haong pakat ủy, karja dom puk palei; dom urang taha akaok palei, urang hu angan je dalam bhap bani bangsa takik, bhap bani dom agama. Tapa nan, peih ngak hu siam bruk bangsa, sarak bangsa, daong khik kajap hatai jia di bhap bani dom bangsa, bhap bani tui agama ngan haong Đảng, Karja, Bol lin, dak padang “thế trận lòng dân”, bruk gul pataom taong abih bangsa khang kajap, ngak ka thaot binguk “Bộ đội Wa Hồ” dak harei dak hadah tanjak./.