Atah di ini labaih 1 bilan di 12 labik kaok dalam taneh ia hu ba gauk peih ngak danak dak padang ngak jalan radaih cao tốc Bắc-Nam gah Timun tukvak 2021 – 2025. Di labik akaok tỉnh Hậu Giang, gam haong bruk hu mbaok di Phó Thủ tướng Rajaei, urang par akaok dom Mintri, dom gah di Trung ương, dom tinh, ban bhum ĐBSCL, daok hu rilo rahra di tỉnh Hậu Giang chreih chrai mai uan tabuan anak bruk praong ini.

Ong Nguyễn Thanh Hoàng daok di xã Vị Thắng, huyện Vị Thủy, tỉnh Hậu Giang brei thau, rahra daok pak ini pachreih tui biak glaong ngan haong danak dak ini, nan ye dahlau di tuk taduan jien bồi thường, nao daok di labik daok bahrau jaik mateh bilan, yaok urang dalam palei ong daok, labik hu Danak dak nao tapa, eng paik mek njam patam, kaoh phun mbang baoh, panduan ba sang danaok nao labik karei piah jao mbaok taneh:“Tal urak ini, kol dahlak hulin hu jao blaoh paje. 5-10-20 thun hadei, puk palei drei cak rok patagok meng hu jalan cao tốc ini, abih di nyu nan lac padai, brah, pandap kaya nong… dom pandap karei pajeng ba hu samar ye nyu cak rok di bhum palei drei min.”

Danak dak jalan cao tốc Bắc - Nam gah Timun tukvak 2021-2025 atah jaik 730 km, abih tih jien buh tame ngak jaik 147.000 tỷ đồng, praong 4 jalan radaih, meda ngak salah di thun 2025 saong ba tame pandar meng di thun 2026. Danak dak ini hu parabha jeng 12 danak dak thành phần padang ngak độc lập.

Danak dak thành phần labik Cần Thơ - Hậu Giang saong Hậu Giang - Cà Mau nao tapa 5 tinh, ban. Dalam nan labik nao tapa tỉnh Hậu Giang atah jaik 64km, meblah 57% jalan di labik meng ban Cần Thơ tal tỉnh Cà Mau, hu labaih 2.000 baoh sang pambak tal, 10 kapul njauk panduan ba dom công trình hạ tầng kỹ thuật, ngan haong mblang taneh pataom mek jaik 362ha.

Ong Nghiêm Xuân Thành - Ủy viên Ban Chấp hành Trung ương Đảng, Bí thư Tỉnh ủy Hậu Giang brei thau, ini lac jalan cao tốc camriep hu padang ngak nao tapa tỉnh Hậu Giang. Thau cambaih yaom glaong di danak dak jalan mbak praong di taneh ia ini, nan ye tukvak tapa Hậu Giang ngak khang piah ngak salah bruk peih mbaok jalan aval jang tukvak ba tabiak di sarak 18 di Rajaei: “Pakat ủy, kanja tỉnh hu peih bruk taom mbaok, ginum biai haong rahta, ndem mayai nao mai haong rahra saong samar langyah dom caong khin njauk adat, tui jalan khik caga quyen lợi siam di abih ka rahra saong patagok bruk ba akaok nao dahlau. Pakat ủy abih di nyu nan lac urang dang akaok ye njauk jak ba dalam sang, gauk gar hu taneh dalam labik njauk pataom mek brei ba akaok nao dahlai dalam bruk pachreih tui dom sarak saong samar jao taneh piah peih ngak danak dak.”

Đại tá Nguyễn Hữu Ngọc- Tư lệnh Binh đoàn 12, Taong Yam ndok Tổng Công ty Xây dựng Trường Sơn, Mintri Quốc Phòng, brei thau: Binh đoàn 12 padang ngak dom labik jalan cao tốc di danak dak jalan cao tốc Bắc - Nam gah Timun, tukvak 2021 – 2025. Taeng labik Cần Thơ – Hậu Giang, kapul hu peih 7 nyaom padang ngak ngan haong jaik 100 kỹ sư, urang ngak gam haong rilo sruh radaih. Meng hu Hậu Giang ngak siam bruk jao taneh nan ye ba mai rilo mbuan lagaih ka kapul dalam bruk padang ngak.“ Tỉnh Hậu Giang lac sa labik ngak biak siam bruk peih mbaok taneh, palagaih ka po thầu. Dalam tukvak tapa, hu bruk pato tacei tapak di Bí thư tỉnh,  akaok UBND tỉnh hu pambuak bruk haong po buh jien tame, ngak bruk haong po thầu piah ba mbuan lagaih ka po thầu piah hadei di tuk peih ngak ye kol dahlak ba tangin tame padang ngak chip.)

Danak dak padang ngak jalan radaih cao tốc Bắc– Nam gah Timun tukvak 2021 – 2025 hadei di tuk ngak salah meda lac jalan cao tốc biak siam, hu prein khang, nduac samar, pabak hu bruk pajeng ba, pambuak dom pasak kinh tế, chính trị, dom labik kinh tế, labik ngak kong praong. Patrun bruk gar jalan saong bala di jalan mbak, pambuak pagam saong patagok dom siam lagaih dom jalan radaih daok hu buh jien tame ngak. Peih tabiak jalan piah patagok kinh te xã hội ka dom tỉnh, ban hu danak dak nao tapa; abih di nyu nan lac patagok ka abih bhum taneran kraong Cửu Long./.