Thanh long hu pablei tabiak negar langiu hu yaom biak glong 

Bình Thuận lac pasak pala thanh long di negar ngan haong mblang taneh praong labaih 33.000 ha, sản lượng baoh thanh long hu 700.000 tấn. Urak ini thanh long Bình Thuận pablei dalam negar jaik 15% sản lượng, daok 85% hu pablei tabiak negar langiu, dalam nan rilo meng pablei tapa Trung Quốc.

Tukvak tapa, kayua jit ruak Covid-19, ngak ka bruk pablei thanh long tabiak negar langiu gaok rilo kan kandah, yaom thanh long trun khang ngak ka urang nong khat saong patih tangin. Kayua yau nan ye, rilo sang bein kaoh tak phun thanh long ngan haong rilo kadha karei di gauk piah salih jalan ngak mbang bahrau.

Dalam tuk yau nan, Chi cục pala drak – Pacang khik phun pala Bình Thuận hu panuac kakei urang nong njauk saneng ka nyu cambaih saong kuhri kuhria ka nyu tani tanat bruk kaoh klaak phun thanh long. Kayua thanh long lac phun mhang baoh lavik thun, meyah kaoh klaak, tuk padang gilac bein ye abih rilo jien ndo saong rilo thun hadei meng hu baoh. Dalam tuk nan, ngan haong darak pasar Trung Quốc, bruk pablei tapa gaok kan kandah meda lac tok rah tabiak dalam tukvak anak meta. Kayua yau nan ye, dalam tuk cang bruk pablei thanh long tabiak negar langiu hu peih siam gilac veik, anak meta, mikva njauk padeih paik baoh, khik iek bein thanh long, plaih ngak ka phun nyu thu lagu, thu dhar thu phun.

Piah khik veik bein thanh long haong jien ndo buh tabiak takik, ong Đỗ Văn Bảo, Akaok Chi cục Pala drak – pacang khik phun pala Bình Thuận brei thau: siam di abih mikva urang nong njauk ngak hareik dalam bein ka nyu haci hacih, pruh aia ka phun thanh long saong buh takik khak limo, khak van ro jeng meda khik hu bein.  

Piah jhul patagok bruk pablei kaya nong hu khang kajap, dalam nan hu thanh long, UBND tỉnh Bình Thuận tacei pato Sở Ngak nong saong patagok palei pala jhul khang cak rok patagok dom bhum nguyên liệu kaya nong pandap panda pataom sa labik, khang kajap; gam haong nan peih bruk brei saong khik iek catang mã số labik pala, mã số labik tapaok baoh; patagok bruk tacei pato bhap bani, doanh nghiệp peih ngak chuẩn hóa chất lượng tui dom tanut chuẩn VietGAP, GlobalGAP, hữu cơ… pabak tui  tanut chuẩn ba tabiak di darak pasar labik blei tame di negar langiu…

Langiu di nan Sở Công thương Bình Thuận daok huk pambuak bruk haong dom tỉnh tapen negar gah Barak piah duah thau, samar khan brei thau ka sarak, jalan ngak, bruk pablei salih biên mậu di dom pabah mbang negar, jalan peih ngan haong Trung Quốc piah ka dom doanh nghiệp hu jalan ngak ka nyu siam mekre; pajeng ba pandap panda tagok pabah mbang tapen negar, jalan peih ka nyu laghaih haong bruk thông quan di dom pabah mbang negar, jalan peih.

Pachreih ba, daong palaghaih ka dom doanh nghiệp jhul khang bruk pablei kaya nong tabiak negar langiu meng jalan chính ngạch tui jalan tasik piah patrun tải ka dom pabah mbang negar jalan radaih. Jhul khang dom bruk pambuak cung cầu, pablei kaya nong di tỉnh Bình Thuận haong dom tỉnh, ban. Peih ngak dom bruk xúc tiến thương mại ka nyu samu gauk, njauk bruk saong mek hu kein laba, peih prong darak pasar dalam saong langiu negar, samar jhul pakhang bruk pablei tabiak dom janih kaya nong hu sản lượng prong daok tame bilan atau jaik tame bilan paik baoh./.

Urang lang: Jasi -4/4