“Bến Tre daok hu jalan Roya 60 piah nao tame dom tỉnh gah dalam, min piah nao tal hu dom labik tapen tasik ye daok biak atah, meng 40-50km. Meyah oh hu jalan tapen tasik ye biak kan piah cakrok kinh tế tasik”.

Panuac ndom di ong Trần Ngọc Tam, Akaok UBND tỉnh Bến Tre jeng lac hatai sahneng di biak rilo tinh hu tasik di bhum taneran kraong Cuu Long. Bruk di jalan tapen tasik gah pai jeng dreih yau dom danak dak jalan radaih nduac samar hu peih ngak rilo di bhum ini, nan lac jalan langyah bruk gar radaih, patrun trak damak ka jalan Roya 1A. Abih di nyu nan lac, jalan bahrau tapen tasik daok hu pabak prein khang piah cakrok kinh tế tasik saong lagaih ka gah logistic.

Hadei di roh duah saong ramik veik quy hoạch, Mintri Jalan mbak Pajeng ba hu panuac brei Mintri Ke hoach & Đau tư ka dom danak dak jalan tapen tasik nao tapa 7 tỉnh, haong yaom jien buh tame jaik 43.000 tỷ đồng tabiak meng TP.HCM nao tal mũi Cà Mau.

Kayua jalan nao mai kan kandah, nao tapa jaik abih dom pabah kraong praong jaik tasik biển Đông nan ye danak dak hu padang ngak tui yaok binah. Ong Châu Văn Bình – Bí thư huyện ủy Thạnh Phú, tỉnh Bến Tre – lac labik hu mbang tui kein lagaih meng danak jalan tapen tasik brei thau:  “Hu jalan ini, palei hu cakrok dahlau abih lac gah kinh tế kaya ikan tui jalan kong nghe glaong, patagok đô thị nao gah tasik, patui di nan lac patagok bruk chế biến. Puac di abih lac tagok khang gah du lịch saong logistics pamaong tal darak pasar TP.HCM”.

Tui Mintri Ke hoach & Đau tư, hu 2 pok jien piah buh tame ngak danak dak praong ini, lac: kadung jien di negar daong dom danak dak pambuak bhum jaik 17.000 tỉ đồng saong mesraiy di Gilang pariak Dunya rilo jang ka bhum taneran kraong Cuu Long labaih 24.600 tỉ đồng. Anak mata di mbang ka 1, Tiền Giang daok ginum biai haong dom gilang pariak piah hu phun jien mesraiy peih ngak danak dak. Ong Trần Văn Bon, Yam ndok Sở Jalan mbak Pajeng ba tỉnh Tiền Giang brei thau: “Tui bruk buh jien ngak danak dak, phun jien dom gah daong lac 90% phun jien padang ngak, dom tỉnh di danak dak brei đối ứng meng jien di kadung jien karja tỉnh piah ngak 10% bruk padang ngak, taong abih jien peih taneh saong dom jien sahui karei. Ngan saong tỉnh Tiền Giang, abih tih jien buh tame ka danak dak labik nao tapa tỉnh, lac 5.591 tỷ đồng ye tỉnh brei caga  đối ứng lac labaih 2.000 tỷ đồng”.

Jalan tapen tasik tuk ngak salah, bruk nao meng Sóc Trăng, Trà Vinh tapa Bến Tre, Tiền Giang, Long An mai TP.HCM hu mbuan lagaih, dui katut panak jalan yaok pluh km. Ong Nguyễn Văn Được – Bí thư tỉnh uy Long An ndom lac:

 “Jalan ini hu makna praong kayua nyu daong pacang biến đổi khí hậu saong daok lac sa jalan quốc phòng taphia tasik gah Timur, pasang iek bhum tasik vịnh Thái Lan gah Meraong di Biển Đông. Meng dom kadha yau nan, jalan ini njauk brei ngak dahlau di anak tal”.

Urak ini, dom tỉnh Tiền Giang, Long An, Bến Tre hu njauk gauk ka labik pambuak pagam peih ngak danak dak nao tapa dom tinh ini. Taong abih dom danak dak ini jeng lac danak dak thành phần daok angaok jalan tapen tasik, cang tal harei pambuak pagam abih gah ye nyu jeng jalan.

Jalan tapen tasik miền Tây hu peih tabiak lac jalan bharau abih. Jalan ini piah ngak jeng jalan tapen tasik 1 pakat haong gauk (lac pakat III Taneran) pacang vil val bhum taneran kraong Cuu Long. Jalan ini langiu di bruk nao mai mbuan lagaih, daok hu labik dang yau jalan ar tasik khik taneh, khik glai, pacang dauk, khik taneh pala drak ka bhap bini. Anak tal, dom pabah lamnge, labik ngak kong, dom đô thị meda tamuh tagok bak di jalan ini, peih tabiak labik cakrok bahrau. Gam haong nan, jalan ini meda daong patrun trak damak ka jalan Roya 1A. Meng tỉnh ini tapa tỉnh karei samar drah saong mbuan lagaih abih gah.

Piah ngak hu bruk ini, brei hu bruk kham merat meng T.Ư tal puk palei, tinh ban. Praong di abih jeng lac dom jalan maong saong jalan ngak praong, ngak njauk di pakat negar. Jalan tapen tasik gah Pai brei hu bruk rik daong saong brei padang ngak dahlau piah patagok glaong di abih prein khang, kein lagaih di bhum taneran kraong Cuu Long bo anak mata lac bruk nao mai mbuan lagaih, samar drah meng bhum tapen tasik mai tal pasak dom ban./.