Urak ini, bruk tamuh tabiak di công nghệ số daok ngak kan kandah tal ilamu bac meng kan, kayua daok meriak gauk khang haong mạng xã hội saong pandap pang, iek. Dang anak dom cuang kandah di zaman số, hatai sahneng ka tapuk saong ilamu bac brei hu dom salih karei ka nyu lagaih haong zaman bahrau. Kayua ilamu bac meng kan daok njauk tapa mbaok meng bruk patagok di công nghệ min nyu daok jeng jalan peih tabiak tukvak patagok bahrau ka ilamu bac.

Công nghệ patagok dui tui rilo jalan bac bahrau hu tabiak rai, yau ye: tapuk menyai (audio book), tapuk pambuak bruk nao mai, tapuk thực tế ảo saong abih di nyu lac tapuk điện tử (e-book). Yaom lac hu hasit bruk oh lagaih tuk brei hu jamriak, pandap panda chuyên dụng min pabak veik, urang puac tapuk hu dalam tangin sa gilang tapuk, meng dom tapuk bahrau tabiak, tal rilo tapuk văn học kinh điển di yaok abap dahlau.

Bruk pambak tame kein lagaih di công nghệ ba mai siam mekre ka urang puac tapuk gam ilamu bac. Raidiuk urak ini ngak ka anek menuac dak harei dak jar var jang, nan ye bruk patabiak dom baoh tapuk tapa jalan kĩ thuật số lac bruk njauk hu. Meng nan, kol drei tame jaik “nguồn tri thức” hu samar drah saong mbuan lagaih jang. Urak ini, rilo jabat, kapul nyaom tal menuac urang daok kham merat hu mbaok tame bruk patagok ilamu bac pambak tame bruk pandar công nghệ. Bruk ini hu brei mboh biak cambaih tapa bruk cakrok siam lagaih di bruk gilang tapuk số di sang bac đại học jeng yau rilo labik karei. Langiu di nan, dom tác giả, labik xuất bản, cty patabiak tapuk... jeng pandar blah mạng xã hội yau sa jalan khau tin piah yaih khan tapuk tal urang puac tapuk.

Meng dom siam lagaih tuk camereip ngak hu meng pandar công nghệ patagok ilamu bac hu brei mboh salih số lac jalan nao lagaih dalam harei hadei. Min bruk patagok ilamu bac dalam tukvak urak ini, lac sa bruk oh mbuan, brei hu rilo jalan ngak samu gauk, pambak tal menuac puac tapuk, abih di nyu lac rai dam dara urang daok ranaih.

Tui nan, brei sangka pato pakai ka urang bac, abih di nyu lac urang puac tapuk daok ranaih, thau cambaih labik dang di ilamu bac meng di dalam sang, sang bac, tal jabat, kapul nyaom saong bol bhap rahra. Di yaok baoh sang, amaik ame brei paglaong hatai takre ka bruk puac tapuk saong padang hatai takre nan ka anek bhik. Sang bac njauk peih rilo mbang pakacah puac tapuk; mbang ndom biai nao mai, harei pataom tapuk. Abih di nyu lac, dom gilang tapuk brei hu số hóa tapuk - tài liệu piah ka urang puac tapuk thau hu mbuan lagaih jang, bhian ba dom tapuk bharau, chất lượng tagok blah web. Dom labik xuất bản njauk paglaong chất lượng asal kadha saong jalan xuất bản phẩm, samar drah pandar bruk salih số tame bruk patabiak tapuk điện tử. Meng nan, bruk puac tapuk saong ilamu bac dalam zaman công nghệ số meda hu bruk salih karei./.