Kol kanyah jhak lah pachot urang kamei piah pablei tapa negar langiu 

Dom thun tapa bloh, min tukvak njauk kol jhak nyu brei menyum jru ndih oh daok thau hagait saong nyu ba tapa Trung Quốc pablei jeng daok ngak ka sa-ai Thúy (umo 50 thun) daok di Hải Dương mboh huac, mboh pandik harao. Rilo mbang sa-ai nduac klaak min mbang halei jeng njauk kol nyu cap mek veik, nyu taong paoh blaoh ba nao pablei ka sang karei. Hatai caong khin mai veik palei negar tuk halei jeng pachreih dui sa-ai Thúy. Thun 2020, sa-ai Thúy pataom hu jien blei hu sa baoh phone pan tangin, ieu biai hu haong urang Việt Nam daok di Trung Quốc saong patuah hu daong nduac klah, mai veik Việt Nam. Hadar veik dom thun bilan nan, ia meta sa-ai haok trun:

Njauk kol nyu taong angaok kaok jhik tal 73 mũi, kol nyu taong bloh drei nduac nao, min sang kol nyu hu rilo meuac, drei oh thau hu abih, nan ye kol nyu cap hu drei ba mai veik.  Duah jalan nduac klaak 5 – 6 mbang min nduac oh klah. Nyu cap mai veik nyu kreik blaoh nyu taong. Jien ndo oh hu, duah jalan mai jeng oh thau mai habar.

Jeng kayua jia tui, pang tui panuac pachot di kol jhak, sa-ai Hoàng Thị Oanh (umo 37 tuổi), daok di Hải Dương jeng lac urang njauk bala di bruk pablei salih menuac. Thun umo 15, sa-ai Oanh nao ngak công nhân di Hải Dương saong njauk menuac pachot pablei tapa Trung Quốc, njauk sang gah pasang ngak pap, taong paoh.

Di Việt Nam, tui kuhria mboh di Mintri Công an, dalam 6 bilan akaok thun 2022, dalam taneh ia hu mboh, hu pasang iek, duah thau 33 bruk, 75 urang hu duas pablei salih menuac, dalam nan, tamat bruk duah thau, ba harak gar hồ sơ tapa Viện kiểm sát ieu ba tabiak truy tố 17 bruk, daok pasang iek, duah thau 15 bruk. Kol nyu pambak tame mạng xã hội piah pachot lac ba urang Việt Nam tapa taneh ia langiu ngak bruk haong yaom jien bilan glaong, bruk ngak bingi sanang, saong ba menuac tapa negar suan hukum bloh pablei tame dom labik me-in mbia online, labik massage, karaoke trá hình kayua urang negar langiu ngak po…

Tui Đại tá Nguyễn Văn Hiệp, Phó Tư lệnh Bộ đội biên phòng Lai Châu, bruk duah mboh, pasang iek, langyah kol pablei salih menuac gaok rilo kan kandah kayua duas pablei salih menuac takik hu mboh saong takik cap mek hu; urang gaok bala di bruk pablei salih menuac, tuk nduac klaak hu saong mai hu veik Việt Nam atau hu daong pa-klah meng tố giác tố cáo, meng khan brei thau. Kayua yau nan ye kan pataom hu chứng cứ piah kaoh duas. Langiu di nan, kol nyu pandar công nghệ thông tin piah taom gaok, ndom biai nao mai nan ye oh thau mbaok kol nyu. Piah pacang cakak, piah jhul kadun likuk bruk pablei salih menuac, Đại tá Nguyễn Văn Hiệp mboh lac njauk patagok bruk pambuak gauk di rilo gah.

Taphia bruk pasang iek, duah thau, palai tayah saong daong pa-klah dom urang njauk bala di bruk pablei salih menuac, ye bruk taduan raok, iek glang, daong dom urang gaok bala ba drei mai veik haong raidiuk lac bruk hu makna biak praong. Urak ini, yaok ratuh urang gaok bala di bruk pablei salih menuac daok dang anak dom kan kandah ka rilo bruk, dalam nan hu bruk pambuak tal adat hukum tuk mai veik palei negar.

Urak ini, bruk “Baoh sang sron mbon” di Hội Liên hiệp Urang kumei Việt Nam lac sa dalam dom bruk brei mboh hatai kham merat dalam bruk daong dom urang njauk bala ba drei mai veik haong puk palei, lac labik caik hatai jia ka dom urang gaok bala. Hải di 15 thun peih tabiak, “Baoh sang sron mbon” hu daong ka labaih 25 rabau mbang urang kumei njauk taong paoh, ba pablei; jaik 1.600 urang njauk ba nao pablei hu daok plaih mbaok di “Baoh sang sron mbon”, dom urang nan hu tư vấn tâm lý, hu pato bruk ngak, brei thau adat hukum piah mai veik haong raidiuk sron mbon. Amuk Dương Thị Ngọc Linh, Yam ndok Pasak saong Patagok (Hội Liên hiệp urang kumei Việt Nam) mboh lac, dom bộ ngành njauk ba tangin tame, brei hu sap ndom haong gauk piah padang jalan ngak, ramik veik sarak piah daong hu siam jang ka dom urang njauk bala:

Piah daong ka urang kumei pacang, plaih hu bruk pablei salih menuac, Hội LH urang kumei VN hu pathau khan brei dom adei sa-ai kumei thau bruk pandar công nghệ số salamat, di cư salamat saong njauk adat hukum; daong ka urang kumei cakrok kinh tế, ba jalan ngak mbang duah jien, ba bruk ngak brei ka adei sa-ai kumei pak di dalam palei piah plaih bruk tabiak dom ban praong saong tabiak negar langiu. Ka 3 lac pambuak bruk di rilo gah dalam pabak khau tin, daong ka adei sa-ai kumei njauk bala pablei salih menuac hu daong samar di abih, piah dom adei sa-ai mboh hu sanang hatai.)

Hu bloh yaok rabau urang njauk ba nao pablei salih haong yaok rabau dalikan, thar vak karei di gauk, min makna praong jeng lac kayua raidiuk kan kandah saong kurang thau. Piah oh jeng urang njauk bala di kol pablei salih menuac, yaok urang brei paglaong hatai sangka, eng drei thau khik caga rup drei saong gauk gar di drei./.

Urang lang: Hanipha- 20/8